تۇپقاراعان اۋدانىندا تاۋلىگىنە 50 توننا وندىرىستىك قۋاتى بار جاڭا كاسىپورىن اشىلدى. جوبا قۇنى – 1,5 ميلليون دوللار. زاۋىتتا پاستەرلەنگەن تۇيە ءسۇتى, يوگۋرت, ىرىمشىك, شۇبات, بيو كەفير, بيو قايماق, شالاپ, تان جانە تاعى باسقا ءونىم شىعارىلادى. مۇندا 20 ادام جۇمىس ىستەيدى.
- قازاقستان رەسپۋبليكاسىندا اگروونەركاسىپتىك كەشەندى دامىتۋدىڭ 2013-2020 جىلدارعا ارنالعان «اگروبيزنەس-2020»باعدارلاماسى كاسىپورىنداردىڭ باسەكەگە قابىلەتتىلىگىن ارتتىرۋعا جانە تۇتاستاي العاندا اگروونەركاسىپ كەشەنىن دامىتۋعا باعىتتالعان. سوندىقتان, ءبىرىنشى كەزەكتە مالدىڭ سانىن كوبەيتۋ جانە ازىق-ت ۇلىك ونىمدەرىن ءوندىرۋ جوبالارىن جۇزەگە اسىرۋ قاجەت. وسى ماقساتتا ينۆەستورلار تارتۋعا جانە كاسىپكەرلىكتى قولداۋعا قولجەتىمدى نەسيەلەر بەرۋ جۇمىستارى قولعا الىنۋ كەرەك. سوندىقتان بيىلعى جىلى ەلىمىزدە العاش رەت «دامۋ» قورىمەن بىرلەسە وتىرىپ شاعىن جانە ورتا بيزنەس جوبالارىنا 1%-بەن نەسيە بەرۋدى باستايمىز, - دەدى ايماق باسشىسى ە. توعجانوۆ.
اتالمىش اۋدانداعى ايتۋلى نىسانداردىڭ ءبىرى - «Caspian Offshore Construction»جشس-ى. 2003 جىلى قۇرىلعان 100% قازاقستاندىق كەمە قاتىناسى كومپانياسى – كاسپي تەڭىزىندەگى تەڭىز قىزمەت كورسەتۋ پاركىنىڭ وپەراتورى. كومپانيادا 591 قىزمەتكەر بار, ونىڭ ىشىندە 389-ى ەكيپاج مۇشەلەرى.وتكەن جىلدىڭ سوڭىندا كومپانيا فلوت سانى 40 كەمەگە جەتتى, ونىڭ 19-ى «NسOس» -كە تيەسىلى.2018 جىلى كاسپي تەڭىزىنىڭ قازاقستاندىق سەكتورىندا جۇمىس ىستەۋ ءۇشىن كومپانيا تاعى 7 كەمەنى جۇمىلدىرۋعا نيەتتى. قازىرگى تاڭدا كومپانيا بازاسىندا بولاشاق تەڭىزشىلەردىڭ كۋرسى ۇيىمداستىرىلىپ, وندا جەرگىلىكتى مەكتەپتەردىڭ 30 وقۋشىسى ءبىلىم الۋدا.
گۇلايىم شىنتەمىرقىزى, «ەگەمەن قازاقستان»