وقو-دا بيىل «يندۋستريالاندىرۋ كارتاسى» شەڭبەرىندە 9 جوبا ىسكە قوسىلادى

ەلباسىنىڭ ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىن قولداۋعا ارنالعان اكتيۆ جينالىسىندا وبلىس اكىمى جانسەيىت تۇيمەباەۆ الداعى باستى ماقسات – جاڭا تەحنولوگيالىق قالىپتىڭ بارلىق ارتىقشىلىقتارىن پايدالانا وتىرىپ جاڭا ەكونوميكالىق ۇلگىگە ءوتۋ ەكەنىن اتاپ ءوتتى. قازاقستاننىڭ ۇدەمەلى يندۋستريالدى-يننوۆاتسيالىق دامۋىنىڭ ەكىنشى كەزەڭىنىڭ اياسىندا وبلىستا جالپى قۇنى 1 تريلليون 300 ميلليارد تەڭگەنى قۇرايتىن 137 جوبا ىسكە اسىرىلۋدا. بۇل جوبالار وسى بەسجىلدىقتا 18 مىڭ جاڭا جۇمىس ورنىن اشۋعا مۇمكىندىك بەرەدى. وتكەن جىلى سايرام جانە قازىعۇرت اۋداندارىندا گيدروەلەكتر ستانسالارى ىسكە قوسىلدى. ال, شىمكەنت قالاسىندا كارىزدىڭ قالدىق سۋىنان بيوگاز, ودان ەلەكتر قۋاتىن وندىرەتىن كاسىپورىن اشىلدى. وبلىستىڭ بىرنەشە اۋداندارىندا كۇن ەلەكتر ستانسالارى سالىنىپ جاتىر. «پرەزيدەنت جولداۋىندا كاسىپورىنداردىڭ ەنەرگيا تيىمدىلىگى مەن ەنەرگيا ۇنەمدەۋگە, سونداي-اق ەنەرگيا وندىرۋشىلەردىڭ ءوز جۇمىستارىنىڭ ەكولوگيالىق تازالىعى مەن تيىمدىلىگىنە قويىلاتىن تالاپتاردى ارتتىرۋ كەرەكتىگى ايتىلدى. جولداۋدا جۇكتەلگەن تاپسىرمالاردى باسشىلىققا الا وتىرىپ, ءبىز وسى باعىتتاعى جۇمىستاردى جانداندىرا تۇسەمىز. سەبەبى, وڭتۇتىك قازاقستان وبلىسى – كۇنشۋاقتى ولكە. بىزدە ءبىر جىلداعى 365 كۇننىڭ 300-ىندە اسپان اشىق بولىپ, كۇن نۇرىن توگىپ تۇرادى. ءبىز بۇل الەۋەتتى بارىنشا ءتيىمدى پايدالانىپ, ەنەرگەتيكا سالاسىن دامىتۋعا ءتيىسپىز», – دەدى وبلىس اكىمى.

سونداي-اق, وبلىس باسشىسى پرەزيدەنت جولداۋدا اۋىل شارۋاشىلىعى ونىمدەرىنىڭ ەكسپورتىن الداعى 5 جىلدا 2,5 ەسەگە ارتتىرۋدى تاپسىرعانىن ايتا كەلە: «وبلىستا تابيعي قازبا بايلىقتاردىڭ ايتارلىقتاي مول قورى جوق. ءبىزدىڭ سۇيەنەرىمىز, نەگىزىنەن وسى اگرارلىق سالا. سوندىقتان اۋىل شارۋاشىلىعى ونىمدەرىنىڭ ەكسپورتىن كەم دەگەندە 3 ەسەگە ارتتىرۋعا ءتيىسپىز», – دەدى. باسقوسۋدا ءار سالاعا جاۋاپتى باسشىلار, ساراپشىلار مەن ماماندارعا جولداۋدان تۋىندايتىن مىندەتتەردى جۇزەگە اسىرۋدىڭ ناقتى جوسپارىن قۇرۋ تاپسىرىلدى.

عالىمجان ەلشىباي, «ەگەمەن قازاقستان»