وسكەمەن مەن اياگوزدەگى اسكەري بولىمدەر جاۋىنگەرلىك دايارلىقتارىن پىسىقتادى

وسكەمەن گارنيزونىنىڭ 27943 اسكەري بولىمىندە روتالىق – تاكتيكالىق توبىنىڭ جاتتىعۋى ۇيىمداستىرىلدى. ءبولىمىنىڭ جاۋىنگەرلىك ازىرلىك جوسپارىنا سايكەس اتىسقا تارتىلعان بارلىق قۇرىلىمدار جاۋىنگەرلىك ازىرلىكتىڭ جوعارعى دەڭگەيىنە كەلتىرىلدى. جاۋىنگەرلىك ماشينالار پاركىنە كەلىپ, بەلگىلەگەن شارتتى اۋدانعا مارشتى جۇزەگە اسىرۋ جونىندە وقۋ-جاۋىنگەرلىك تاپسىرماسىن الدى. جەكە قۇرامنىڭ قيمىلى انىقتالعان سوڭ كولوننا وقۋ پوليگونىنا جول تارتتى. مارش كەزىندە موتواتقىشتار بولىمشەلەرى تاكتيكالىق دايىندىق بويىنشا نورماتيۆتەردى ورىنداۋدان شەبەرلىكتەرىن شىڭدادى.

وقۋ پوليگونىندا موتواتقىشتار جانە بارلاۋ بولىمشەلەرىنىڭ جاۋىنگەرلىك اتىسىن ساپالى جۇرگىزۋ ماقساتىندا بارلاۋ روتاسىنىڭ كومانديرى, كاپيتان مەرەي يسەنوۆ بارلاۋ روتاسىنىڭ 1 – بارلاۋ ۆزۆودى 1 – بولىمشەسىنىڭ جەكە قۇرامىمەن «بارلاۋ بولىمشەسى ىزدەۋدە» تاقىرىبىندا, 1-ءشى موتواتقىشتار روتاسىنىڭ كومانديرى, اعا لەيتەنانت ە.مۇقاتاەۆ 1 موتواتقىشتار روتاسىنىڭ 1 موتواتقىشتار ۆزۆودى 1 موتواتقىشتار بولىمشەسىنىڭ جەكە قۇرامىمەن «موتواتقىشتار بولىمشەسى قورعانىستا» تاقىرىپتارىندا نۇسقاۋشىلىق – ادىستەمەلىك دارىستەر وتكىزدى. سونداي-اق, ديۆەرسانتتى-بارلاۋ توپتارى مەن ەسەپتوپتار اۋەدەگى قارسىلاستىڭ شابۋىلدارى كەزىندەگى جانە زالالسىزداندىرىلماعان اۋداندى ءجۇرىپ وتۋدەگى قيمىلداردى دا مەڭگەردى. وسىلايشا ەڭ الدىمەن زەنيتتى ەسەپتوپتاردىڭ, زەنيتتى ديۆيزيوندار بولىمشەلەرىنىڭ, بۇدان سوڭ موتواتقىشتار بولىمشەلەرىنىڭ, 1 جانە 2 موتواتقىشتار باتالونىنىڭ, سوڭىندا شتابتىق باتالوننىڭ بارلاۋ روتاسى بولىمشەلەرىنىڭ اتىسى جۇزەگە استى.

جاۋىنگەرلىك اتىستىڭ ناتيجەسىندە كىشى سەرجانت ا.قۇماروۆ, كىشى سەرجانت دۋلات راقىموۆ, سەرجانت ايدىن نۇرسۇلتانوۆ, سەرجانت ا.جەلنەبەكوۆ, سەرجانت ولجاس سەيىتقازين وزدەرىنىڭ جوعارى كاسىبي بىلىكتىلىكتەرىن كورسەتە ءبىلدى.

«روتالاردىڭ كۇردەلى جاعدايداعى قيمىل-ارەكەتى مەن اۋىزبىرشىلىگىن تەكسەرۋ ماقساتىنداعى تاكتيكالىق جاتتىعۋ اسكەري ءبولىمنىڭ جاۋىنگەرلىك ازىرلىك جوسپارىنا سايكەس جۇزەگە استى. ول 2 موتواتقىشتار باتالونىندا جاۋىنگەرلىك اتىسپەن «مەملەكەتتىك شەكارانى كۇشەيتۋ كەزىندەگى قورعانىس ۇرىسىن جۇرگىزۋ» تاقىرىبىندا ءوتتى. روتالىق-تاكتيكالىق توبى جاتتىعۋدىڭ جوسپارى بويىنشا بەيبىت تۇرعىندارعا زاردابى تيەر, ايماقتاعى اسكەري-ساياسي جاعدايدىڭ ۋشىققانىن پايدالانىپ, مەملەكەتتىك شەكارانى بۇزۋ ارقىلى زاڭسىز قارۋلانعان لاڭكەستەر شەكارا جانە اكىمشىلىك عيماراتتار مەن نىسانداردى باسىپ الىپ, ەلدىڭ تىنىشتىعىن بۇزۋدى كوزدەيدى. زاڭسىز قارۋلانعان قۇرامنىڭ كوزىن جويۋ جانە مەملەكەتتىڭ اسكەري قاۋىپسىزدىگىن قامتاماسىز ەتۋ ماقساتىندا بۇيرىق العاننان كەيىن روتا كومانديرى, اعا لەيتەنانت ماقسات قالمىرزاەۆتىڭ جەتەكشىلىگىمەن 4 موتواتقىشتار روتاسى دابىلمەن كوتەرىلىپ, شوعىرلانۋ اۋدانىنا مارش جاسادى. جاتتىعۋعا قاتىسۋشىلاردىڭ بىرىككەن جەدەل قيمىلىنىڭ ناتيجەسىندە قارسىلاس توپتىڭ كوزى تۇگەل جويىلدى. روتالىق – تاكتيكالىق توبىنىڭ جاتتىعۋى ءوز ماقساتىنا جەتتى. جەكە قۇرام تاكتيكالىق كاسىبي قيمىلداردى جۇزەگە اسىرۋدىڭ ءادىس-تاسىلدەرىن جەتىلدىرىپ, شەبەرلىكتەرىن ودان ءارى ارتتىردى», - دەيدى 27943 اسكەري ءبولىمىنىڭ كومانديرىنىڭ تاربيە جانە يدەولوگيالىق جۇمىستار جونىندەگى ورىنباسارى اسىل ەرعاليەۆ.

ال اياگوزدەگى 10810 اسكەري ءبولىمى موتواتقىشتار بولىمشەسىندە بولىمشەلەردىڭ جاۋىنگەرلىك ۇيلەسىمدىلىگىن پىسىقتاۋ كەزەڭى باستالدى. اتالعان شارا شەڭبەرىندە جاۋىنگەرلىك دايىندىق جوسپارىنا سايكەس اسكەري قىزمەتشىلەرگە «بولىمشەنىڭ جاۋىنگەرلىك اتىستى قولدانا وتىرىپ شابۋىلداۋى», «بولىمشەنىڭ جاۋىنگەرلىك اتىستى قولدانباي ەلدى مەكەندە ءىس-قيمىل جاساۋى» جانە تۇنگى جاعدايدا «بولىمشەنىڭ جاۋىنگەرلىك اتىستى قولدانا وتىرىپ قورعانىس جاساۋى» تاقىرىپتارىندا ساباقتار جۇرگىزىلدى. بولىمشەلەردىڭ كومانديرلەرىنە جاۋىنگەرلىك تاپسىرمالاردى ورىنداۋ كەزىندە تاجىريبەلىك ماشىقتارىن جەتىلدىرۋ جانە ولاردى تابىستى ورىنداۋ, قارسىلاستى تاۋىپ ولاردىڭ كوزىن جويۋعا ارنالعان تاپسىرمالار بەرىلدى.

سونىمەن قاتار, ساباقتار بارىسىندا جاۋىنگەرلىك اتىستار كەزىندە اۆياتسيانىڭ سوققىسى, زارارسىزداندىرىلعان مەكەننەن ءجۇرىپ ءوتۋ, جەكە قۇرامدى ءتۇسىرۋ, مينا-جارىلعىش قورشاۋدان ءوتۋ, سونداي-اق الدىڭعى شەپتە قارسىلاسقا شابۋىلداۋ جانە كوزىن جويۋ سياقتى تاقىرىپتار كەڭىرەك پىسىقتالدى. «وزدەرىڭىز بىلەسىزدەر, جاۋىنگەرلىك دايىندىق جوسپارىنا سايكەس 2018 جىلدىڭ 8 قاڭتارى مەن 2 اقپان ارالىعىندا بولىمشەلەردىڭ جاۋىنگەرلىك ۇيلەسمىدىلىگى وتۋدە. ءبىز بۇگىن بولىمشەلەرمەن جاۋىنگەرلىك اتىس بويىنشا نۇسقاۋلىق-ادىستەمەلىك ساباقتارىن وتكىزدىك. بولىمشەلەردىڭ جاۋىنگەرلىك اتىستارى قورعانىس, شابۋىلداۋ جانە ارنايى وپەراتسيالار تاقىرىبىن قامتىدى», - دەدى 10810 اسكەري ءبولىمى كومانديرىنىڭ جاۋىنگەرلىك جانە دەنە دايىندىعى جونىندەگى ورىنباسارى, پودپولكوۆنيك ءادىل تۇرعىنباەۆ.

ازامات قاسىم, «ەگەمەن قازاقستان»