وسكەمەندەگى ولگا رىپاكوۆا اتىنداعى جەڭىل اتلەتيكا مانەجىندە وليمپيادا ويىندارىنىڭ چەمپيونى ولگا رىپاكوۆانىڭ جۇلدەسى ءۇشىن 2000 جىلى تۋعان جانە جاسى ودان ۇلكەن سپورتشىلار اراسىندا IV ءداستۇرلى حالىقارالىق تۋرنير ءوتتى.
ءدۇبىرلى دوداعا كەلگەن بالعىن سپورتشىلاردى شىعىس قازاقستان وبلىسى دەنە شىنىقتىرۋ جانە سپورت باسقارماسىنىڭ باسشىسى اسقار موجانوۆ قۇتتىقتادى. «سىزدەردى بۇگىنگى حالىقارالىق ءتۋرنيردىڭ وتۋىمەن وبلىس باسشىلىعى جəنە باسقارما اتىنان شىن جۇرەكتەن قۇتتىقتايمىن. وسىنداي كەرەمەت جەڭىل اتلەتيكا مانەجىندە حالىقارالىق دەڭگەيدەگى جارىستىڭ وتكىزىلۋى قۋانىشتى جايت. جارىسقا جينالعان ءار جەڭىل اتلەت ءوز ەلىنىڭ نامىسىن ابىرويمەن قورعايتىنى بەلگىلى. ەندەشە, مۇنداعى قاتىسۋشىلاردىڭ بارلىعى تەك جوعارى ناتيجە كورسەتىپ, الداعى ۋاقىتتاردا سىزدەردەن ءدۇبىرلى دودالاردا جۇلدە الاتىن سپورتشى شىعادى دەگەن ۇمىتتەمىن», – دەدى باسقارما باسشىسى.
اتالعان باسقارمانىڭ ءباسپاسوز قىزمەتىنىڭ حابارلاۋىنشا, حالىقارالىق تۋرنيرگە سانى 140-قا جۋىق سپورتشى قاتىستى. وتكەن جىلى 7 ەلدەن سپورتشىلار كەلسە, بيىلعى جەڭىل اتلەتتەر جارىسىندا قازاقستاندىق سپورتشىلاردان بولەك, 8 مەملەكەتتىڭ (قىرعىزستان, وزبەكستان, تاجىكستان, ارمەنيا, ءازىربايجان, گرۋزيا, مالايزيا جانە ۋكراينا) جەڭىل اتلەتتەرى جۇلدەلى ورىنداردى ساراپقا سالدى. تۋرنير بارىسىندا سپورتشىلار بيىكتىككە سەكىرۋ, ءۇش قارعىپ سەكىرۋ, ۇزىندىققا سەكىرۋ, يادرو لاقتىرۋ, 60 م جۇگىرۋ, 60 م بارەرمەن جۇگىرۋ, 400 م جۇگىرۋ, 800 م جۇگىرۋ, 3000 م جۇگىرۋ, 4*200 م, 4*100 م, 4*400 م جانە ارالاس ەستافەتا سىندى جەڭىل اتلەتيكانىڭ باعىتتارى بويىنشا كۇش سىناستى.
سپورتشىلاردى ماراپاتتاۋ بارىسىندا ايگىلى جەڭىل اتلەتشى ولگا رىپاكوۆا جارىسقا جينالعان بارلىق قاتىسۋشىلارعا جانە حالىقارالىق ءتۋرنيردىڭ وتۋىنە اتسالىسقان شىعىس قازاقستان وبلىسى اكىمدىگى مەن قازاقستان رەسپۋبليكاسى جەڭىل اتلەتيكا فەدەراتسياسىنا العىسىن ءبىلدىردى.
ازامات قاسىم, «ەگەمەن قازاقستان»