تاتار ينجەنەرلەرى «كوشپەلى قوناقۇي» ويلاپ تاپتى

تەلەارنا تىلشىلەرىنىڭ مالىمەتىنشە, قالاعا دا, دالاعا دا اپارىپ ورناتۋعا بولاتىن بۇل ۇيلەردە 1 ايعا دەيىن ءومىر سۇرۋگە قاجەتتى دۇنيەنىڭ بارلىعى بار ەكەن. اتومم - ياعني, اۆتونومدى مودۋل دەپ اتالاتىن بۇل جوبا تابيعات اياسىندا دەمالعىسى كەلەتىن تۋريستەر ءۇشىن جايلى مەكەن بولعالى تۇر.

قۇرىلىسى بويىنشا بۇل تۋريستەرگە ارنالعان اۆتونومدى مودۋل. قوناقۇيدى كەز كەلگەن جەرگە اپارىپ, جارتى ساعاتتىڭ ىشىندە ورناتۋعا بولادى.

ەندىگىدە قازاندىق ينجەنەرلەر ويلاپ تاپقان بۇل جاڭالىقتىڭ ارقاسىندا شاعىن قالالارداعى قوناقۇي تاپشىلىعى ماسەلەسىن شەشۋگە بولادى. ياعني, بەلگىلى ءبىر اۋقىمدى شارا وتكىزەتىن شاھاردا قوناقۇي جەتىسپەسە, وسى مودۋلدەردى قاز-قاتار قويىپ, قوناقتاردى قابىلداي بەرەسىز. باستىسى, بۇل تۋريزم سالاسى ءۇشىن تاپتىرمايتىن دۇنيە. سەبەبى, ونى ءتۇرلى دەمالىس ورىندارى مەن قۇرىلىس سالۋعا تىيىم سالىنعان جەرلەرگە اپارىپ قويۋعا بولادى.

جوبانىڭ جەتەكشىسى انۆار كامالوۆ بۇل ءمودۋلدىڭ تولىقتاي اۆتونومدى رەجىمدە جۇمىس ىستەي الاتىنىن ايتادى. "ايدالاعا اپارىپ قويساڭىز دا, ول ءوزىن-ءوزى سۋ, جارىق جانە جىلۋمەن قامتاماسىز ەتەدى. ماسەلەن, ەلەكتر ەنەرگياسى كۇن باتارەيالارى ارقىلى وندىرىلەدى. ال تۇرمىسقا قاجەتتى سۋ الدىن الا قۇيىلادى. ونىڭ كولەمى ءبىر ايعا دەيىن جەتەدى", - دەيدى كامالوۆ.

"بۇل جوبا وتە قىزىق ەكەن. ماسەلەن, شەتەلدىك تۋريستەر تابيعات اياسىندا دەمالعىسى كەلەدى. الايدا, ول جەرلەردە ەشبىر ينفراقۇرىلىم بولمايدى. ونى سالۋ ءۇشىن قىرۋار قارجى كەرەك. ال, مۇنداي مودۋلدەردىڭ بىرنەشەۋىن وزەننىڭ, كولدىڭ جاعاسىنا قويا سالسا, اناعۇرلىم ارزان بولار ەدى", - دەيدى ءوز كەزەگىندە كونۆەنش بيۋرونىڭ ديرەكتورى يۆان كادوشنيكوۆ.

2-3 ادامعا ارنالعان بۇل قوناقۇيدىڭ كولەمى نەبارى 19 شارشى مەتر. ەسەسىنە, ينجەنەرلەر ونى بارىنشا ءتيىمدى پايدالانۋعا تىرىسقان. وسىلايشا, مۇنداعى شاعىن-شاعىن 3 بولمەنىڭ زاماناۋي قوناق ۇيدەن ەش ايىرماسى جوق.