شاكەن ايمانوۆ اتىنداعى "قازاقفيلم" كينوستۋدياسى "مۇزبالاق" اتتى تولىقمەترلى كوركەم انيماتسيالىق ءفيلمنىڭ ترەيلەرىن جاريالادى. بۇركىت پەن ادامنىڭ دوستىعى تۋرالى باياندايتىن بۇل مۋلتفيلم قر مادەنيەت جانە سپورت مينيسترلىگىنىڭ تاپسىرىسى بويىنشا تۇسىرىلگەن, - دەپ حابارلايدى كينوستۋديانىڭ ءباسپاسوز قىزمەتى.
ءفيلمدى رەجيسسەر-انيماتور - تۇردىبەك مايدان جانە تىلەك تولەۋعازى جاساپ شىققان.
ەكى جىل كولەمىندە جاسالعان بۇل فيلمدە 40-قا جۋىق كينەماتوگرافيانىڭ وسى جانرىندا ەڭبەك ەتىپ جۇرگەن وتاندىق ماماندار ىستەگەن. ۇزاقتىعى 65 مينۋت قۇرايتىن مۋلتفيلم 2D جانە 3D فورماتىندا جاسالعان جانە ءار سەكۋندىندا 24-25 كادر سۋرەت سالىنعان. كەيىپكەرلەردى دىبىستاۋعا ەرجان جارىلقاسىن ۇلى, جانات تىنىباەۆ, سامات قورداباي, تولەباەۆ ەرعالي دۇيسەن ۇلى, الما ادىلقىزى ەسىمدى تەاتر جانە كينو اكتەرلەرى قاتىسقان.
ء"بىز وسى "مۇزبالاقتى" جاساۋدان بۇرىن "تاستۇلەك" اتتى قىسقا مەترلى انيماتسيالىق ءفيلمدى اياقتاعان كەزىمىز, "قازاقفيلمگە" باقىت عافۋ ۇلى باسشى بولىپ كەلگەن بولاتىن. ول كىسى انيماتسيا بولىمىنە كەلىپ ءبىزدىڭ "تاستۇلەك" انيماتسيالىق ءفيلمىمىزدى كورىپ, ۇناتىپ, كوڭىلىنەن وتكەننەن كەيىن, وسى ءفيلمدى ارى قاراي تولىقمەتراجدى ەتىپ جاساۋدى تاپسىرىپ, قولدايتىنىن ايتتى. سودان باستاپ وسى تاقىرىپ نەگىزىندە جاڭا تولىقمەتراجدى "مۇزبالاق" ءمۋلتفيلمىنىڭ ستسەناريىن جازدىق, جاڭا كەيىپكەرلەردى قوستىق جانە ەكشن جانرىندا تۇسىرەمىز دەپ شەشتىك. مادەنيەت جانە سپورت مينيسترلىگىنىڭ قولداۋىمەن وسى ءمۋلتفيلمدى جاساپ شىقتىق", - دەدى تىلەك تولەۋعازى.
اۆتورلار "مۇزبالاق" اتتى انيماتسيالىق ءفيلمى ارقىلى تاريح قويناۋىنا ەنىپ, جوعالىپ بارا جاتقان, قازاقتىڭ عاسىرلار بويى قالىپتاسقان ساياتشىلىق مادەنيەتىن كورسەتۋ ارقىلى, اداممەن بۇركىت اراسىنداعى سەنىم نەگىزىنە قۇرالعان دوستىقتى جاس ۇرپاق ساناسىنا ءسىڭىرۋدى كوزدەيدى. "بەس جاسار بۇركىتتى قازاق مۇزبالاق دەيدى. قازاق بۇل تاكاپپار قۇسقا جاس ەرەكشەلىگىنە قاراي ات قويادى. ءبىز اڭعا شىقپاساق تا, اڭشىلاردىڭ اڭگىمەسىن تىڭداپ وستىك. ۇلكەندەرمەن ەرىپ, اڭدى قالاي تۇزاققا تۇسىرۋگە بولاتىنىن دا شەت جاعالاپ كوزىمىزبەن كوردىك. قىراندى قالاي قوندىرىپ, تۇعىرىنا قالاي وتىرعىزۋ قاجەتتىگىن, اتتى قالاي باپتاپ, قالاي جاراتاتىنىن, قۇستى قالاي قولعا ۇستاۋعا بولاتىنىن بىزدەي ەشكىم بىلمەسى انىق", - دەدى تۇردىبەك مايدان.
ەسكە سالايىق, كينوستۋديا 2017 جىلى ەكى تولىقمەترلى انيماتسيالىق ءفيلمدى ءوندىردى. سونىڭ ءبىرى "مۇزبالاق" بولسا, ەكىنشىسى رەجيسسەر اداي ءابىلدانىڭ تاريحي تۇلعا, قولباسشى كۇلتەگىن تۋرالى كارتيناسى. اتالعان فيلمدەر تولىققاندى اياقتالعان جانە پروكاتى مەن تۇساۋكەسەرى ۇستىمىزدەگى جىلدىڭ كوكتەمىنە جوسپارلانعان.