وزبەكستان تاراپى سامارا - شىمكەنت تاسجولىنداعى اۆتوبۋس ءورتىنىڭ سەبەبىن انىقتاۋعا كومەكتەسكەن قازاقستانعا العىس ءبىلدىردى, دەپ حابارلايدى وبلىس اكىمىنىڭ ءباسپاسوز قىزمەتى.
اقتوبە وبلىسى, ىرعىز اۋدانى, قالىباي اۋىلى ماڭىندا اۆتوبۋس ورتەنىپ, پوليتسيا, توتەنشە جاعدايلار قىزمەتى, دارىگەرلەر مەن پسيحولوگتار كومەك كورسەتكەن بولاتىن. اقتوبەگە كەلگەن وزبەكستان رەسپۋبليكاسىنىڭ قازاقستانداعى ەلشىسىنىڭ كومەكشىسى تيمۋر راحيموۆ قازاق ەلىنە ءوز العىسىن ايتتى.
«توتەنشە جاعداي تىركەلىپ, وزبەكستان رەسپۋبليكاسىنىڭ ازاماتتارى قازا بولدى. الدىمەن قازاقستاننىڭ پرەزيدەنتىنە, ۇكىمەتىنە, بارلىق مەملەكەتتىك ورگانىنا العىسىمىزدى بىلدىرەمىز. تەرگەۋ جۇمىستارى جەدەل اياقتالىپ, ءبىز جاپا شەككەندەر مەن قازا بولعانداردىڭ دەر كەزىندە وتانىنا جەتكىزىلەتىنىنە سەنىمدىمىز»,- دەدى ت.راحيموۆ.
ايتا كەتەيىك, كەشە اقتوبەگە وزبەكستان رەسپۋبليكاسىنىڭ توتەنشە جاعدايلار ءمينيسترى رۋستام دجۋراەۆ باستاعان ارنايى توپ كەلدى. ولاردىڭ قۇرامىندا دەنساۋلىق ساقتاۋ, ىشكى ىستەر ورگاندارىنىڭ قىزمەتكەرلەرى مەن ديپلوماتتارى بار. اقتوبە وبلىسى اكىمىنىڭ ءباسپاسوز قىزمەتىنىڭ حابارلاۋىنشا, قازىرگى ۋاقىتتا وقيعانىڭ نەدەن بولعانى انىقتالىپ جاتىر. ءورتتى ءسوندىرۋ, مۇردەلەردى انىقتاۋ, تاسىمالداۋ جۇمىستارىنا ىشكى ىستەر ورگاندارىنىڭ, توتەنشە جاعدايلار قىزمەتىنىڭ, پروكۋراتۋرا, وبلىس اكىمدىگى, جەرگىلىكتى جول قىزمەتىنىڭ 80-نەن استام قىزمەتكەرى مەن 30 تەحنيكاسى جۇمىلدىرىلدى.