«استانا» حالىقارالىق قارجى ورتالىعى (احقو), Atameken Business Channel جانە Bloomberg نيۋ-يوركتە جەرگىلىكتى ۋاقىت بويىنشا 12.30-دا ۇشجاقتى كەلىسىمگە قول قويد6 دەپ حابارلادى abctv.kz.
كەلىسىم شارتقا سايكەس Atameken Business Channel احقو-نىڭ رەسمي اقپاراتتىق سەرىكتەسى اتاندى. كەلىسىمنىڭ جارامدىلىق مەرزىمى – ۇزارتۋ مۇمكىندىگىمەن ەكى جىل. احقو مەن Bloomberg اراسىنداعى ىنتىماقتاستىق تۋرالى العاشقى ۋاعدالاستىققا قر پرەمەر-ءمينيسترى باقىتجان ساعىنتاەۆ اقش-قا جۇمىس ساپارىمەن بارعان كەزدە قول جەتكىزىلگەن بولاتىن.
2017 جىلدىڭ 12 ساۋىرىندە قر پرەمەر-ءمينيسترى باقىتجان ساعىنتاەۆ اقش-قا جۇمىس ساپارىمەن بارعاندا نيۋ-يوركتىڭ ەكس-مەرى رۋدولف دجۋلياني جانە مايكل بلۋمبەرگپەن كەزدەسكەن ەدى. كەلىسسوز بارىسىندا تەلەكوممۋنيكاتسيا ينفراقۇرىلىمىن دامىتۋ سالاسىنداعى ىنتىماقتاستىق, سونداي-اق «استانا» حالىقارالىق قارجى ورتالىعىن (احقو) دامىتۋعا قاتىستى ماسەلەلەر تالقىلانعان.
كەلىسسوزدىڭ ەڭ باستى ناتيجەسى – استانادا Bloomberg-ءتىڭ تەلەارناسىن جانە كەڭسەسىن اشۋ ۋاعدالاستىعىنا قول جەتكىزۋ بولدى. «Atameken Business Channel مەن Bloomberg-ءتىڭ ىنتىماقتاستىعى قازاقستان بيزنەسمەندەرىنىڭ ينۆەستيتسيالىق مۇمكىندىگى تۋرالى اقپاراتتى الەم بيزنەسمەندەرىنە جەتكىزۋ, ءبىزدىڭ ەلگە قاراجات تارتۋ جانە جەتەكشى وڭىرلىك قارجى ورتالىعىنىڭ دارەجەسى دەگەن اتاققا يە بولۋ», – دەدى احقو باسقارۋشىسى قايرات كەلىمبەتوۆ. سودان كەيىن كەلىسىمگە Atameken Business Channel قوسىلدى.
«بىرنەشە مينۋت بۇرىن نيۋ-يوركتە ءبىز ءۇشىن وتە ماڭىزدى ۇشجاقتى كەلىسىمشارتقا قول قويىلدى. بۇل جارتى جىلدان استام ۋاقىت بويعى كۇردەلى كەلىسسوزدەردىڭ جەمىسى. ءبىزدىڭ ۇلكەن كوماندا كەلىسىمشارتتى الۋ ءۇشىن جۇمىس جاسادى, ال بۇگىن سول جۇمىستىڭ ناتيجەسىن كورىپ وتىرمىز. بارلىعىڭىزعا ۇلكەن راقمەت ايتقىم كەلەدى. «استانا» حالىقارالىق قارجى ورتالىعى ءوزىنىڭ رەسمي اقپاراتتىق سەرىكتەسى رەتىندە Bloomberg-پەن قاتار ABCTV-نى تاڭداعانى ءبىز ءۇشىن قۋانىشتى جاعداي. احقو-مەن سەرىكتەستىك بىزگە ورتالىقتىڭ اقپاراتىن قازاق جانە ورىس تىلىندە تاراتۋعا قۇقىق بەرەدى. ال Bloomberg-پەن سەرىكتەستىككە كەلەتىن بولساق, وندا ونىڭ اياسىندا ءبىزدىڭ قىزمەتكەرلەر ۇزدىك ترەنەرلەردەن ۇيرەنىپ, Bloomberg-ءتىڭ گونكونگ, نيۋ-يورك, لوندونداعى كەڭسەلەرىندە تاعلىمدامادان وتەدى. وسى كەلىسىمشارتتىڭ اياسىندا ىسكەري جۋرناليستيكانىڭ الەمدىك كوشباسشىسىمەن جۇمىس ىستەۋگە مۇمكىندىك الدىق. بۇل جاڭا ساپالى دەڭگەيگە كوتەرىلۋگە مۇمكىندىك بەرەدى دەپ ويلايمىز», – دەپ Atameken Business Channel-ءدىڭ باس ديرەكتورى يۋليا سينچۋك كەلىسىمشارتقا قول قويۋ جايىنا توقتالدى.
16 قاڭتار كۇنى «استانا» حالىقارالىق قارجى ورتالىعىنىڭ ءباسپاسوز قىزمەتى رەسمي تۇردە جۇمىس ىستەي باستاعانى تۋرالى حابارلاپ, كومپانيالاردى تىركەۋ باستالدى دەپ مالىمدەدى. احقو جانىنان قارجىلىق قىزمەت كورسەتۋدى رەتتەۋ جونىندەگى كوميتەت (افسا) قىزمەت قۇرىلىپ, جۇمىس ىستەي باستادى. افسا قىزمەت كورسەتۋدىڭ كەڭ سپەكترىن, ياعني ينۆەستيتسيالاردى جانە اكتيۆتەردى باسقارۋ, private banking, قورلاردى اكىمشىلدەندىرۋ مەن باسقارۋ, كاتوديالدىق قىزمەت, يسلامدىق قارجىلاندىرۋ ىسىمەن اينالىسادى سونداي-اق وكىلدىك كەڭسەلەردىڭ جۇمىسىن ليتسەنزيالايدى.
احقو اياسىندا العاش رەت پوستكەڭەستىك كەڭىستىكتە اعىلشىن كوممەرتسيالىق قۇقى جانە لوندون, نيۋ-يورك, گونكونگ, سينگاپۋر, دۋباي سياقتى جەتەكشى قارجى ورتالىقتارىنىڭ ستاندارتتارىنا نەگىزدەلگەن ءوز قۇقى بار ارنايى زاڭدى قۇزىرەت ەنگىزىلدى. احقو-نىڭ تاۋەلسىز سوتى قۇرىلدى, ول كوممەرتسيالىق جانە ازاماتتىق داۋلاردى قاراستىرادى. سونداي-اق حالىقارالىق تورەلىك سوت قۇرىلدى. احقو بازاسىندا جوعارى تەحنولوگيالىق بيرجا (AIX) جۇمىس ىستەيدى. ونىڭ ستراتەگيالىق سەرىكتەستەرى شانحاي قور بيرجاسى جانە NASDAQ. استاناعا حالىقارالىق ساراپشىلاردى تارتۋدى جەڭىلدەتەتىن ەكسپات-ورتالىق قۇرىلدى. احقو ءبىر تەرەزە جۇيەسىن, ۆيزالاردى بەرۋ, تىركەۋدىڭ جەڭىلدەتىلگەن رەجيمىن, جۇمىسقا تۇرۋعا رۇقسات جانە باسقا دا راسمدەردى ۇسىنادى.
احقو-نىڭ نەگىزگى ستراتەگيالىق دامىتۋ باعىتتارى – كاپيتال نارىعى, اكتيۆتەردى باسقارۋ, جەكە تۇلعالاردىڭ ءال-اۋقاتىن باسقارۋ, يسلامدىق قارجىلاندىرۋ, قارجىلىق تەحنولوگيالار. ەسكە سالا كەتەيىك, 2015 جىلى قازاقستان پرەزيدەنتى نۇرسۇلتان نازارباەۆ احقو قۇرۋ تۋرالى كونستيتۋتسيالىق زاڭعا قول قويدى. احقو-نىڭ ماقساتى حالىقارالىق دەڭگەيدەگى قارجىلىق قىزمەتتىڭ جەتەكشى ورتالىعىن قالىپتاستىرۋ.