اۆتوبۋس اپاتىنان قازا بولعانداردىڭ تولىق ءتىزىمى جاريالاندى.
توتەنشە جاعدايدان قازا بولعانداردىڭ ءتىزىمى وزبەكستاننىڭ توتەنشە جاعدايلار مينيسترلىگىنىڭ سايتىندا جاريالاندى.
الدىن الا جاسالعان تىزىمدە 29 ادام بار. قازا بولعانداردىڭ بارلىعى - ەر ادامدار, نامانعان وبلىسىنىڭ تۋمالارى. قازا بولعانداردىڭ ۇلكەنى 41 جاستا, ال كىشىسى 19 جاستا. وسىعان دەيىن ءىىد وكىلدەرى 52 جولاۋشىنىڭ اۆتوبۋس ەسىگىن اشا الماي, وتقا ورانعانىن حابارلاعان ەدى. ۆەدومستۆو مالىمەتىنشە, اۆتوبۋستىڭ ەسىگى بۇعاتتالىپ قالعان. سوندىقتان جولاۋشىلار اۆتوبۋستان شىعا الماي قالعان. سونداي-اق, اۆتوبۋستىڭ ورتەنۋ دەرەگى بويىنشا قىلمىستىق ءىس قوزعالعانى حابارلانعان ەدى. اقتوبە وبلىسىنىڭ تجد ءباسپاسوز قىزمەتىنىڭ مالىمەتىنشە, ورتكە قىسقا تۇيىقتالۋ سەبەپ بولعان.
"باستاپقى الدىن الا نۇسقا - قىسقا تۇيىقتالۋ. قازىر بۇل نۇسقا دا وزگەلەرمەن قاتار تەكسەرىلىپ جاتىر", - دەپ حابارلادى اقتوبە وبلىسىنىڭ تجد ءباسپاسوز قىزمەتى.
ايتا كەتەيىك, وسىعان دەيىن اقتوبەدە اۆتوبۋس ورتەنىپ, 52 ادامنىڭ قازا تاپقانى جايلى حابارلانعان بولاتىن. Ikarus ماركالى اۆتوبۋستىڭ 18 قاڭتاردا ساعات 10:30-دا اقتوبە وبلىسى ىرعىز اۋدانىندا سامارا - شىمكەنت تاسجولىنىڭ 1068 شاقىرىمىندا قالىباي اۋىلىنان 10 شاقىرىم جەردە ورتەنگەنى ايتىلعان ەدى. اۆتوبۋستىڭ ىشىندە 55 جولاۋشى جانە ەكى جۇرگىزۋشى بولعان. ونىڭ بەسەۋى اۆتوبۋستان شىعىپ ۇلگەرگەن.