بىرىككەن ۇلتتار ۇيىمى قاۋىپسىزدىك كەڭەسىنىڭ وتىرىسىندا مەملەكەت باسشىسى نۇرسۇلتان نازارباەۆ ءىس-قيمىلدى تولىقتاي قامتيتىن بىرلەسكەن جوسپار ودان ءارى تابىستى ىسكە اساتىندىعىنا سەنىم ءبىلدىردى. سونداي-اق سولتۇستىك كورەيانىڭ يادرولىق پروبلەماسىن رەتتەۋدىڭ ماڭىزى زور ەكەنىنە توقتالدى.
«كەيبىر قاتىسۋشىلار تاراپىنان ءوز مىندەتتەمەلەرىن جۇزەگە اسىرۋدا تۋىنداعان قيىندىقتارعا قاراماستان ءىس-قيمىلدى تولىقتاي قامتيتىن بىرلەسكەن جوسپار ودان ءارى تابىستى ىسكە اسادى دەپ سەنەمىن. وسىنداي كونسترۋكتيۆتى ءتاسىلدى سولتۇستىك كورەيانىڭ يادرولىق پروبلەماسىن رەتتەۋدە دە قولدانۋعا بولادى دەپ ويلايمىز», دەگەن نۇرسۇلتان نازارباەۆ كورەيا تۇبەگىندەگى قازىرگى وقيعالار تەرەڭ قاراما-قايشىلىقتىڭ بار ەكەنىن كورسەتەتىندىگىن ايتتى.
وسى رەتتە پرەزيدەنت نۇرسۇلتان نازارباەۆ مۇددەلى تاراپتاردىڭ سولتۇستىك كورەيا ماسەلەسىن نەعۇرلىم جىلدام ءارى كونسترۋكتيۆتى جولمەن شەشۋگە شاقىردى.
«سەنىم احۋالىن قالىپتاستىرۋدىڭ جانە پحەنياننىڭ كەلىسسوز ۇستەلىنە ورالۋىنىڭ ماڭىزدى شارتى رەتىندە «يادرولىق بەستىكتىڭ» كحدر-ءدىڭ قاۋىپسىزدىگىنە كەپىلدىك بەرۋىن جاقتايمىز. مۇددەلى تاراپتار قاجەت ەتكەن جاعدايدا, قازاقستان كەلىسسوز الاڭىن ۇسىنۋعا دايىن», دەدى ن.نازارباەۆ.