نيۋ-يوركتە بىرىككەن ۇلتتار ۇيىمىنىڭ شتاب-پاتەرىندە مەملەكەت باسشىسى نۇرسۇلتان نازارباەۆتىڭ توراعالىعىمەن قاۋىپسىزدىك كەڭەسىنىڭ «جاپپاي قىرىپ-جوياتىن قارۋدى تاراتپاۋ: شارالار مەن سەنىم» تاقىرىبى بويىنشا جوعارى دەڭگەيدەگى پىكىرتالاس ءوتتى.
جيىندى اشقان ەلباسى قازاقستاننىڭ بۇۇ قاۋىپسىزدىك كەڭەسىندەگى باسىم باعىتتارىنا توقتالدى. سونىمەن قاتار پرەزيدەنت قازاقستان 2018 جىلعى قاڭتارداعى توراعالىعى مەرزىمىندە تابىستى جۇمىس ىستەپ جاتقانىن اتاپ كورسەتتى.
ء«بىز قازاقستاننىڭ بۇۇ قاۋىپسىزدىك كەڭەسىنىڭ تۇراقتى ەمەس مۇشەسى بولىپ سايلانۋىن جانە بۇگىنگى توراعالىق قىزمەتىمىزدى الەمدىك قوعامداستىقتىڭ ەلىمىزگە جانە ونىڭ بەيبىتشىل ساياساتىنا دەگەن سەنىمى دەپ بىلەمىز. ورتالىق ازيانىڭ بۇل مارتەبەلى قىزمەتتەگى ءبىرىنشى مەملەكەتى رەتىندە ءبىز وڭىرىمىزدەگى حالىقتاردىڭ دۇنيەجۇزىلىك ۇيىمنىڭ وسى ماڭىزدى «ۇنىنە» اينالدىق», دەدى پرەزيدەنت. نۇرسۇلتان نازارباەۆ قازاقستاننىڭ بۇۇ قاۋىپسىزدىك كەڭەسىندەگى ءبىرىنشى جىلى وتكەنىن ايتىپ, ەلىمىزدىڭ كەڭەستىڭ كۇنت تارتىبىندەگى وزەكتى ماسەلەلەردى شەشۋگە قاتىسۋ بارىسىندا بارىنشا بەلسەندى, كونسترۋكتيۆتى جانە ءادىل بولۋعا تىرىسقانىن جەتكىزدى.
«اۋعانستان/تاليبان, يليم/دايش, ءال-كايدا جانە سومالي/ەريترەي جونىندەگى كوميتەتتەردى باسقارا وتىرىپ, ولاردىڭ جەمىستى قىزمەت ەتۋىنە ءوز ۇلەسىمىزدى قوسىپ كەلەمىز», دەي كەلە نۇرسۇلتان نازارباەۆ الەمدىك قوعامداستىق ‒ الۋان ءتۇرلى جانە كوپ قىرلى سيپاتى ارقىلى كۇشەيە تۇسكەن ءبىرتۇتاس ورگانيزم ەكەنىن ايتتى. «ول جەر بەتىندەگى ۇلتتار مەن حالىقتار اراسىندا تەڭگەرىم مەن ۇيلەسىم بولعان كەزدە عانا العا باسىپ, دامي الادى. سول سەبەپتى ءبىز قۇقىق ۇستەمدىگىنە نەگىزدەلگەن قاۋىپسىز الەم مەن ادىلەتتى الەمدىك تارتىپكە بىرلەسە قول جەتكىزۋىمىز كەرەك. بۇل ىستە بۇۇ قاۋىپسىزدىك كەڭەسىنىڭ ءرولى زور جانە وعان تاريحي ميسسيا جۇكتەلەتەنى دە ءسوزسىز», دەدى مەملەكەت باسشىسى.