پولشا پرەزيدەنتى: قازاقستان يادرولىق قاۋىپسىزدىكتى قولداۋ جولىندا ماڭىزدى قادامدار جاسادى

ءسوز باسىندا اندجەي دۋدا وتە ماڭىزدى تاقىرىپتا جوعارى دەڭگەيدە پىكىرتالاس ۇيىمداستىرعان قازاقستانعا العىس ايتتى. «بۇل ءسىزدىڭ ۇزاق ۋاقىت بويى قاۋىپتى قارۋدى تاراتپاۋعا تىرىسقان ەڭبەگىڭىزدى كورسەتەدى. يادرولىق قارۋدان باس تارتقان مەملەكەت رەتىندە قازاقستان وسى ماسەلەنى ءوز دەڭگەيىندە تالقىلاۋعا اتسالىسادى دەگەن سەنىمدەمىن. سەبەبى قازاقستان سەكىلدى يادرولىق قارۋدان باس تارتقان مەملەكەتتەر وتە از», دەي كەلە اندجەي دۋدا نۇرسۇلتان نازارباەۆتىڭ سول كەزدەرى سويلەگەن ءسوزىن ەسكە الدى. «نۇرسۇلتان نازارباەۆ العاش رەت يادرولىق قارۋدان باس تارتۋ تۋرالى شەشىمىن جاريالاعاندا, بۇل ءوزىنىڭ مەملەكەتى ءۇشىن جاساعان ەڭ جاقسى تاڭداۋى ەكەنىن ايتقانى ەسىمدە. سول كەزدەن بەرى قازاقستان ءوزىنىڭ شەشىمىنە بەرىك ەكەنىن كورسەتتى. سونىمەن قاتار مەن قازاقستاننىڭ جاقىندا تومەن بايىتىلعان ۋران بانكىن قۇرعانىن اتاپ وتكىم كەلەدى. بۇل يادرولىق قاۋىپسىزدىكتى قولداۋ جولىنداعى ماڭىزدى قادام جانە بۇل بەيبىتسۇيگىش مەملەكەتتەر اراسىنداعى اشىق قارىم-قاتىناستى نىعايتادى», دەدى پولشا پرەزيدەنتى.

اندجەي دۋدا بۇۇ قاۋىپسىزدىك كەڭەسىنە شاقىرعانى ءۇشىن نۇرسۇلتان نازارباەۆعا العىسىن ءبىلدىردى. «مەن پولشا پرەزيدەنتى رەتىندە بۇۇ-نا ءبىرىنشى رەت كەلىپ وتىرمىن. بۇگىنگى قاراستىرىلىپ جاتقان ماسەلەلەر پولشانىڭ قاۋىپسىزدىك كەڭەسىندەگى باسىمدىقتارىمەن بايلانىستى. ونىڭ ىشىندە حالىقارالىق قاۋىمداستىققا مۇشە مەملەكەتتەردىڭ اگرەسسيالى جانە زاڭسىز ارەكەتتەرىنە قارسى حالىقارالىق قۇقىقتىڭ جاڭا جولدارىن قولداۋ دا قاراستىرىلعان. مەنىڭ ويىمشا, كەز كەلگەن زاڭسىز ارەكەتتى حالىقارالىق ەرەجەلەردى بۇزۋ دەپ قابىلداۋ كەرەك. سەبەبى ونداي ارەكەتتەر مەملەكەتتەردىڭ بەيبىت قاتىم-قاتىناستارىن بۇزادى», دەدى ا.دۋدا.

پولشا پرەزيدەنتىنىڭ ايتۋىنشا, بۇۇ قاۋىپسىزدىك كەڭەسى وتىرىسىنداعى كۇن تارتىبىندەگى ماسەلەلەردىڭ بارلىعى وتە ماڭىزدى. سونىمەن قاتار تەك يادرولىق قارۋ ەمەس, بيولوگيالىق جانە حيميالىق قارۋدىڭ, بالليستريكالىق راكەتانىڭ دا قاۋپىن ەسكەرۋ كەرەك. ء«بىز حيميالىق قارۋدىڭ قولدانىلاتىن كەزدەرىن ءجيى كەزدەستىرىپ جاتامىز. قاۋىپسىزدىك كەڭەسى الەمگە وسى ماسەلەگە بايلانىستى ۇندەۋ جاريالاعانى ءجون», دەدى ا.دۋدا. سونىمەن قاتار پولشا پرەزيدەنتى سولتۇستىك كورەيانىڭ ارەكەتتەرىن ايىپتاپ, 2018 جىلى وڭتۇستىك كورەيادا وتەتىن وليمپيادا ويىندارىنىڭ قاۋىپسىز جەردە, بارلىق مەملەكەتتەر اراسىنداعى دوستىق جانە بەيبىت قارىم-قاتىناستا وتكەنى دۇرىس دەپ ويلايتىنىن ايتتى.

ءسوز سوڭىندا پولشا پرەزيدەنتى وتىرىسقا بۇكىل الەم ەلدەرى ءۇشىن ماڭىزدى تاقىرىپتى تاڭداعانىنا العىس ايتتى. «پولشا ءسىزدىڭ يادرولىق قاۋىپسىزدىككە بايلانىستى باستامالارىڭىزدى قولدايدى. مۇنداي قارۋ شەكارالاردى بۇزىپ, الەمدەگى بەيبىتشىلىككە قاۋىپ توندىرەدى. سوندىقتان ءبىز بۇۇ اياسىندا ارىپتەستىك قارىم-قاتىناستى نىعايتا بەرۋىمىز كەرەك», دەدى ا.دۋدا.