نۇرسۇلتان نازارباەۆ اقش-تىڭ ەنەرگەتيكا ءمينيسترى ريك پەرريمەن كەزدەستى. بۇل تۋرالى akorda.kz حابارلادى.
مەملەكەت باسشىسى كەزدەسۋدە اقش پرەزيدەنتى دونالد ترامپپەن جۇرگىزىلگەن كەلىسسوزدەر بارىسىندا قول جەتكىزىلگەن ناتيجەلەرگە توقتالدى.
نۇرسۇلتان نازارباەۆ قازاقستان مەن اقش-تىڭ مۇناي-گاز سالاسىنداعى ىنتىماقتاستىعىنا وڭ باعا بەرىپ, تەڭىز جانە قاشاعان كەن ورىندارىنداعى جوبالاردىڭ جۇزەگە اسىرىلۋى جونىندە ايتتى.
مەملەكەت باسشىسى قازاقستانداعى ءونىمدى قايتا وڭدەۋ ىسىندە ينۆەستورلاردىڭ كۇش-قۋاتتارىن ارتتىرۋى قاجەتتىگىنە نازار اۋداردى.
قازاقستان پرەزيدەنتى ەلىمىزدەگى جاسىل ەنەرگەتيكانى دامىتۋعا ارنالعان جوبالاردىڭ جۇزەگە اسىرىلۋى جونىندە اڭگىمەلەپ, ر.پەرريدى تومەن بايىتىلعان ۋران بانكىنىڭ اشىلۋى تۋرالى حاباردار ەتتى.
اقش-تىڭ ەنەرگەتيكا ءمينيسترى كەزدەسۋگە ريزاشىلىعىن ءبىلدىرىپ, ينۆەستيتسيالىق ىنتىماقتاستىقتى نىعايتۋعا سەپتىگىن تيگىزەتىن نەگىزگى فاكتورلاردى اتادى.
كەزدەسۋ سوڭىندا تاراپتار مۇناي-گاز جانە ەنەرگەتيكا سالالارىنداعى ەكىجاقتى قاتىناستاردى ودان ءارى دامىتۋعا قاتىستى پىكىرلەرىمەن ءبولىستى.