پرەزيدەنت نۇرسۇلتان نازارباەۆ اقش-قا رەسمي ساپارى اياسىندا اق ءۇي باسشىسى دونالد ترامپپەن كەزدەسىپ, ەكىجاقتى ستراتەگيالىق ارىپتەستىكتى تەرەڭدەتۋ جانە كۇشەيتۋ, وڭىرلىك جانە ەكونوميكالىق ىنتىماقتاستىقتى نىعايتۋ ماسەلەلەرىن تالقىلادى.
ەلباسى اق ۇيشە ارنايى شاقىرعانى ءۇشىن اقش پرەزيدەنتى د.ترامپقا العىسىن ءبىلدىردى. قازاقستاننىڭ اقش-تى سەنىمدى سەرىكتەس, الەۋەتتى ارىپتەس سانايتىنىن جەتكىزگەن ن.نازارباەۆ الداعى ۋاقىتتا ەكىجاقتى قارىم-قاتىناستى نىعايتۋدىڭ ماڭىزدىلىعىن اتاپ كورسەتتى.
ء«سىزدى اقش پرەزيدەنتى قىزمەتىنە كىرىسكەنىڭىزگە ءبىر جىل تولۋىمەن قۇتتىقتايمىن. وسى ۋاقىت ارالىعىندا ەكونوميكالىق تۇرعىدا تابىستى جۇمىس اتقاردىڭىز. ورتالىق ازيادان اق ۇيگە ارنايى شاقىرىلعان تۇڭعىش پرەزيدەنت اتانۋىم ەكى ەل اراسىنداعى بايلانىستى نىعايتا تۇسەدى. قازاقستان مەن اقش اراسىندا ءاردايىم ەكىجاقتى ساياسي قارىم-قاتىناس ورناعان. اقش تاراپى العاشقىلاردىڭ ءبىرى بولىپ قازاقستاننىڭ تاۋەلسىزدىگىن مويىندادى. سودان بەرگى 26 جىل ىشىندە ەكى ەل اراسىنداعى بايلانىس جاڭا بەلەسكە كوتەرىلدى. مەنىڭ بۇگىنگى ساپارىم ‒ سونىڭ ايعاعى. الداعى اڭگىمە بارىسىندا ەكى ەلگە دە ءتيىمدى ماسەلەلەردى تالقىلايتىنىمىزعا جانە قازاقستان مەن اقش اراسىنادعى ەكونوميكالىق ارىپتەستىكتىڭ ودان ءارى نىعايا تۇسەتىنىنە سەنىمدىمىن», دەدى ەلباسى.
ءوز كەزەگىندە د.ترامپ اقش تاراپى قازاقستاندى ورتالىق ازيا وڭىرىندەگى بولاشاعى زور, ستراتەگيالىق ارىپتەس دەپ ەسەپتەيتىنىن مالىمدەدى. ونىڭ ايتۋىنشا, قازاقستان مەن اقش اراسىنداعى ديپلوماتيالىق, ساۋدا-ەكونوميكالىق قارىم قارىم-قاتىناس جاڭا ساپاعا يە بولىپ وتىر. اق ءۇي باسشىسى قازاقستاندى وڭىرلىك بەيبىتشىلىك پەن قاۋىپسىزدىكتىڭ شەشۋشى فاكتورى رەتىندە باعالايتىنىن جەتكىزدى.
«اق ۇيدە ءسىزدى قابىلداۋ مەن ءۇشىن ۇلكەن ابىروي. بۇعان دەيىن دە ساۋد ارابياسىندا بىرقاتار ماسەلەلەردى تالقىلادىق. قازاقستان تاۋەلسىزدىك العالى بەرى كوپتەگەن جەتىستىكتەرگە قول جەتكىزدى. قازىرگى تاڭدا اقش ەكونوميكاسى ۇلكەن ءبىر بەلەستى باعىندىردى. افرو-امەريكالىقتاردىڭ جۇمىسسىزدىق بۇعان دەيىن بولماعان تومەن دەڭگەيگە تومەندەدى», دەدى د.ترامپ.
اباي اسانكەلدى ۇلى,
"ەگەمەن قازاقستان"
ارنايى ۆاشينگتوننان
سۋرەتتى تۇسىرگەن باۋىرجان جۋاسباي