امانكەلدى كەنەنباەۆ كوپشىلىككە ءوزىنىڭ كەسكىندەمەلىك شىعارمالارىمەن عانا ەمەس, جيۆوپيس, گرافيكا, مۇسىندىك تۋىندىلارىمەن دە كەڭىنەن تانىلعان تالانت يەسى.
سۋرەتشىنىڭ ءا.قاستەەۆ اتىنداعى مەملەكەتتىك ونەر مۋزەيىندە اشىلعان «سۇلۋتوبە» اتتى جەكە كورمەسىنە بارىپ, ءارتۇرلى جىلدارداعى 67 شىعارماسىمەن تانىسۋدىڭ ءساتى ءتۇستى.
سۋرەتشىنىڭ تۋعان جەرىنىڭ قۇرمەتىنە وراي اتالعان كورمە, قىلقالام مەن جونعىش شەبەرىنىڭ ويلارى مەن كوزقاراستارى تۋرالى بايانداۋمەن قاتار, ءومىر مەن تابيعاتتىڭ بارلىق بوياۋلارىن سىڭىرگەن. 1980 جىلى اكادەميالىق مانەردە ورىندالعان شىعارمالارى تۋعان ەلىنىڭ قاسىرەتىنە تولى كوپ فيگۋرالى كومپوزيتسيالاردى بىلدىرەدى. ماسەلەن, اۆتور ءوزىنىڭ «قيلى كەزەڭ» دەپ اتالاتىن شىعارماسىن بالالىق شاعىنا ارناعان. شىعارمادا سوعىس تاقىرىبى, اسىرەسە ايەلدەر مەن بالالاردىڭ بەينەسى ارقىلى وتكىر بەرىلگەن. سۇم سوعىستىڭ اۋىرتپالىعىن ارقالاعان بەيبىت تۇرعىنداردىڭ ۇزدىكسىز ەڭبەگى مەن ازابىنىڭ الدىندا قاھارماندىق پەن تەبىرەنىس كەيىن شەگىنەدى, سول ارقىلى سۋرەتشىنىڭ ىشكى سەرپىلىسى ەستىلە تۇسەدى. «تۇيىققا تىرەلۋ» اتتى تۋىندىسىندا قازاقستاننىڭ رەسەيگە قوسىلۋىنا ارنالعان ءىس-شارالار كورىنىس تاپقان. بۇل شىعارماسى ارقىلى سۋرەتشى سول كەزەڭدەردىڭ تاريحىن ءوز بايقاعاندارىمەن ۇشتاستىرا ۇسىنادى. ءۇش اپتا بويى الماتىلىقتاردىڭ نازارىنا ۇسىنىلاتىن شىعارماشىلىق كورمەدە بۇدان بولەك سۋرەتشىنىڭ ونەرسۇيەر قاۋىمنان ءوز باعاسىن العان كوپتەگەن شىعارمالارى قويىلعان.
«پەيزاجداردا اۆتور بىرتىندەپ تابيعاتتىڭ ءومىرىن, ونىڭ كۇيىن بەرۋدەگى ناقتىلىعى مەن دالدىگىنەن باس تارتادى. اعاشتاردىڭ دىڭدەرى مەن بۇتاقتارىنىڭ, ساۋلەت قۇرىلىستارىنىڭ سولقىلداق, ايەل بەينەلەرىنىڭ ناقتى ەمەس تاڭعاجايىپ فورمالارى اسپاننىڭ كوك, ءشوپتىڭ جارقىن جاسىل, جارقىراعان كۇن نۇرىمەن قاراما-قارسى كەلىپ, جاڭارۋدىڭ قۋانىشتى سەزىمىن تۋدىرادى. سۋرەتشىنىڭ شىعارمالارى جارىق پەن اۋە كەڭىستىگىنە تولى, وندا اۋقىمدى بوياۋلار ءتۇسى مەن بەدەرىن, قوزعالىسىن كورسەتە بىلەدى. ولار سەزىم مەن كۇيزەلىسكە بايلانىستى كۇردەلەنەدى. قۋانىش قايعىلى سەزىممەن ارالاسادى, قايعى جارىق كوڭىل كۇيمەن بويالادى. امانكەلدى كەنەنباەۆتىڭ كەنەپتەرىندە قازاق جەرىنىڭ كورىنىستەرى سۇيىسپەنشىلىكپەن جانە شەبەرلىكپەن بەينەلەنگەن, ول سول ولكەنىڭ تابيعاتى مەن سۋرەتشىنىڭ جان دۇنيەسىن بىلدىرەدى», دەيدى كورمە جەتەكشىسى سۆەتلانا كوبجانوۆا.
ارمان وكتيابر, «ەگەمەن قازاقستان»
الماتى