The Diplomat جۋرنالى قازاقستان پرەزيدەنتى نۇرسۇلتان نازارباەۆتىڭ اقش پرەزيدەنتى دونالد ترامپپەن كەزدەسۋى تۋرالى ماقالا جاريالادى. وندا كەزدەسۋ بارىسىندا تالقىلانۋى مۇمكىن تاقىرىپتار مەن قازاقستان تۋرالى جازىلعان. نازارلارىڭىزعا جۋرنالداعى "ترامپ قازاق پرەزيدەنتىمەن كەزدەسەدى" اتتى ماقالانىڭ ىقشامدالعان اۋدارماسىن ۇسىنامىز.
16 قاڭتاردا نۇرسۇلتان نازارباەۆ دونالد ترامپپەن ءبىرىنشى رەت كەزدەسەدى. اق ءۇي وكىلدەرىنىڭ حابارلاۋىنشا, ەكى ەل باسشىلارى كەزدەسۋدە ەكىجاقتى ەكونوميكالىق ىنتىماقتاستىق پەن ايماقتىق قاۋىپسىزدىك ماسەلەلەرى بويىنشا ستراتەگيالىق سەرىكتەستىكتى نىعايتۋ جولدارىن تالقىلايتىن بولادى. سونىمەن قاتار كۇن تارتىبىندە اۋعانستان تاقىرىبى دا بار. ارينە, ورتالىق ازيا ەلدەرىنىڭ باسشىلارى اقش-قا كەلگەندە اۋعانستان ماسەلەسى تالقىلانباي قالمايدى. بىراق بۇل تاقىرىپ وزىنىڭ ماڭىزدىلىعىن جويعان جوق. سەبەبى اۋعانستانداعى سوعىس جاڭا ساتىعا ءوتتى.
سونىمەن قاتار 2017 جىلى سولتۇستىك كورەيانىڭ يادرولىق قارۋعا بايلانىستى امبيتسياسى دا ۋشىعىپ كەتتى. بۇل تاقىرىپ قازاقتاردىڭ جۇرەگىنە جاقىن ەكەنى ءسوزسىز. سەبەبى 1991 جىلى بۇل ەل كەڭەس وداعىنان قالعان يادرولىق قارۋدان باس تارتقان بولاتىن. سودان بەرى 25 جىل ىشىندە استانا يادرولىق ەنەرگيانى بەيبىت جولدا پايدالانىپ, يادرولىق قارۋدى تاراتپاۋ جولىن قاتاڭ ۇستانىپ كەلەدى.
2015 جىلى قازاقستان اتوم ەنەرگياسىنىڭ حالىقارالىق اگەنتتىگىمەن (ماگاتە) تومەن بايىتىلعان ۋران بانكىن قۇرۋ تۋرالى كەلىسىم جاسادى. ەلدەر تبۋ-دى بانكتەن ەلەكتر ەنەرگياسىن ءوندىرۋ ءۇشىن عانا الا الادى. سول ارقىلى مەملەكەتتەر ۋراننىڭ تارالۋ قاۋپىن ازايتىپ وتىر. 2017 جىلى تامىز ايىندا بانكتىڭ قويماسى اشىلدى. ءبىر ايتا كەتەرلىگى, قازاقستان ەڭ ءىرى ۋران ءوندىرۋشى مەملەكەتتەردىڭ ءبىرى سانالادى. 2016 جىلى ۋراننىڭ الەمدىك ءوندىرىسىنىڭ 39 پايىزى قازاقستانعا تيەسىلى.
ترامپتىڭ اۋعانستانداعى وڭتۇستىك ازيا ستراتەگياسى مەن پاكىستاننىڭ تەررورشىلاردى قورعايتىنى ۆاشينگتون ءۇشىن ورتالىق ازيا ەلدەرىنىڭ ساياسي ماڭىزىن ارتتىرا تۇسپەك. ءبىز قالاساق تا, قالاماساق تا,ورتالىق ازيا سوڭعى 20 جىلدا اۋعانستان پروبەلماسىمەن قاتار اتالىپ كەلەدى. ال بۇل ايماقتاعى ەكونوميكاسى دامىعان ەڭ بەلسەندى مەملەكەت قازاقستان ەكەنى ءسوزسىز.
نۇرسۇلتان نازارباەۆتىڭ اقش-قا ساپارى قازاقستان ءۇشىن دە ماڭىزدى كەزەڭمەن تۇسپا-تۇس كەلدى. 1 قاڭتاردا قازاقستان بۇۇ قاۋىپسىزدىك كەڭەسىندەگى توراعالىعىن باستادى. وسىعان بايلانىستى استانا بىرنەشە ماڭىزدى بريفينگتەر وتكىزىپ, تاقىرىپتاردى بەكىتتى.
2017 جىلى قىركۇيەك ايىندا دونالد ترامپ پەن نۇرسۇلتان نازارباەۆ تەلەفون ارقىلى سويلەسكەن بولاتىن. اقش بۇقارالىق اقپارات قۇرالدارى بۇل تۋرالى شاعىن عانا اقپارات تاراتۋمەن شەكتەلدى. بىراق قازاقستاندىق باق تولىق مالىمەت كەلتىرگەنىن بايقاۋعا بولادى. مىسالى, نۇرسۇلتان نازارباەۆ دونالد ترامپپەن تەلەفون ارقىلى سويلەسكەندە وعان ەكسپو-2017, ماگاتە سەكىلدى ماسەلەلەر تۋرالى ايتىپ بەرگەن. سونىمەن قاتار سول كەزدەسۋدە دونالد ترامپ قازاق پرەزيدەنتىن اقش-قا رەسمي ساپارمەن شاقىرعان. ال قازاقپاراتتىڭ حابارلاۋىنشا, ەكى مەملەكەت باسشىلارى رەسەي-اقش قارىم-قاتىناسى تۋرالى ايتىپ, ن.نازارباەۆ ۆاشينگتون مەن ماسكەۋ اراسىنداڭى جاعدايدىڭ رەتتەلەتىنىنە ۇمىتپەن قارايتىنىن جەتكىزگەن.