سەنات توراعاسى ق.توقاەۆ فينليانديا رەسپۋبليكاسى پارلامەنتىنىڭ دەپۋتاتى, ورتالىق ازيا ەلدەرىمەن دوستىق پارلامەنتتىك توبىنىڭ توراعاسى ۆيللە سكينناري باستاعان دەلەگاتسيانى قابىلدادى, دەپ حابارلايدى سەناتتىڭ ءباسپاسوز قىزمەتى.
كەزدەسۋ بارىسىندا ەكىجاقتى قاتىناستار جانە پارلامەنتارالىق ىنتىماقتاستىق ماسەلەلەرى تالقىلاندى. سەنات توراعاسى 1917 جىلى تاۋەلسىزدىك العاننان بەرى فينليانديا جوعارى دەڭگەيدەگى ەكونوميكالىق جانە تەحنولوگيالىق دامۋ ناتيجەسىن كورسەتىپ كەلە جاتقانىن اتاپ ءوتتى. ق.توقاەۆتىڭ ايتۋىنشا, فينليانديامەن قارىم-قاتىناس, اسىرەسە «جاسىل» تەحنولوگيالار مەن جاڭارتىلاتىن ەنەرگيا كوزدەرىن پايدالانۋ ترانسفەرتى ماسەلەلەرى بويىنشا تاجىريبەسى مول سۋوميمەن ىنتىماقتاستىق قازاقستانعا زور ىقىلاس تۋعىزىپ وتىر.
ق.توقاەۆ الەمدىك جانە ءداستۇرلى دىندەر ليدەرلەرىنىڭ 2015 جىلعى V سەزىنىڭ جۇمىسىنا قوسقان ۇلەسىنە وراي فينليانديا پرەزيدەنتى س.نينيستيوگە ريزاشىلىق ءبىلدىردى جانە حالىقارالىق مامانداندىرىلعان ەسكپو-2017 كورمەسىنە بەلسەندى قاتىسقانى ءۇشىن فين باسشىلارىنا العىس ايتتى. تاراپتار استاناداعى ەكسپو الاڭدارىندا كورسەتىلگەن جوبالار: بۇۇ «جاسىل» تەحنولوگيالار مەن ينۆەستيتسيالىق جوبالاردى دامىتۋ جونىندەگى حالىقارالىق حاب, «استانا» حالىقارالىق قارجى ورتالىعى, حالىقارالىق ءىت-ستارتاپ تەحنوپاركى اياسىندا بۇدان بىلايعى ىنتىماقتاستىقتىڭ كەلەشەگى تۋرالى تۋرالى پىكىر الماستى. فين دەپۋتاتىنىڭ ايتۋىنشا, بۇل سالانىڭ ەكىجاقتى ىنتىماقتاستىق الەۋەتىن ىسكە اسىرۋدىڭ زور مۇمكىندىگى بار.
سەنات توراعاسى قازاقستان مەن فينليانديانىڭ كولىك-لوگيستيكا سالاسىنداعى, اسىرەسە, قىتايدىڭ ء«بىر بەلدەۋ, ءبىر جول» جانە قازاقستاننىڭ «نۇرلى جول» باعدارلاماسىن ۇشتاستىرۋ تۇرعىسىندا ارىپتەستىك قاتىناستارىنىڭ كەلەشەگى زور ەكەنىن اتاپ ءوتتى. ء«بىز فينليانديانى بالتىق جاعالاۋىنداعى ەلدەر مەن سولتۇستىك ەۋروپا ايماعىنداعى جەتەكشى كولىك حابى رەتىندە قاراستىرامىز», دەدى ق.توقاەۆ.
سەنات توراعاسى ءبىلىم بەرۋ سالاسىنداعى ىنتىماقتاستىققا باسا نازار اۋدارا وتىرىپ, كەڭىنەن تاجىريبە بولىسۋگە, سونداي-اق وقىتۋشىلار مەن ستۋدەنتتەردى الماستىرۋعا شاقىردى.
پارلامەنت جوعارعى پالاتاسىنىڭ باسشىسى پرەزيدەنت ن.نازارباەۆتىڭ جىل سايىنعى جولداۋى تۋرالى حاباردار ەتىپ, ءتورتىنشى ونەركاسىپتىك رەۆوليۋتسيا جاعدايىنداعى ەلىمىزدى جاڭعىرتۋدىڭ 10 نەگىزگى مىندەت جايىندا ايتىپ بەردى.
ۆ.سكينناري جولداۋدى جوعارى باعالاي وتىرىپ, ەكى ەلدىڭ الدىندا تۇرعان: تسيفرلاندىرۋ, ەكونوميكالىق رەفورمالار, «جاسىل» تەحنولوگيالاردى دامىتۋ قاجەتتىگى, سىبايلاس جەمقورلىقپەن كۇرەس جانە باسقا دا جاۋاپتى مىندەتتەردىڭ ورتاقتىعىن اتاپ ءوتتى. «بۇل قاتەرلەردى ويداعىداي ەڭسەرۋ ءۇشىن بىزگە بىرگە جۇمىس ىستەۋ كەرەك», دەدى فين پارلامەنتشىسى. ول قازاقستان الدىندا اۋقىمدى مىندەتتەردى شەشۋدە فينليانديانىڭ جاردەمدەسۋگە ءازىر ەكەنىن ناقتىلادى.
سەنات باسشىسى ەكىجاقتى پارلامەنتتىك ءوزارا ءىس-قيمىلدىڭ قارقىنىنا ريزاشىلىق ءبىلدىرىپ, فين تاراپىن پارلامەنتتىك دەلەگاتسيالار الماسۋعا شاقىردى.