سەنات دەپۋتاتتارى بىرقاتار كەزدەسۋلەر وتكىزدى

ماڭىزدى مىندەتتەر تالقىلاندى

بۇعان دەيىن جۇمىس ساپارىمەن اقتوعاي, شەت اۋداندارىندا بولعان پارلامەنت سەناتىنىڭ دەپۋتاتى رىسقالي ابدىكەروۆ وبلىس ورتالىعىنداعى ەكى مەكەمەدە كەزدەسۋ وتكىزدى. ولاردىڭ ءبىرى – وبلىستىق اۋىل شارۋاشىلىعى باسقارماسى بولسا, ەكىنشىسى ن.نۇرماقوۆ اتىنداعى مامانداندىرىلعان مەكتەپ-ينتەرناتىندا ۇستازدار قاۋىمىمەن جۇزدەستى.

سەناتور اۋىل شارۋاشىلىعى سالاسىنىڭ ماماندارىنا ەلباسىنىڭ جولداۋىنان تۋىندايتىن نەگىزگى ماسەلەلەردى ءتۇسىندىردى. اۋىل شارۋاشىلىعى باسقارماسىنداعى كەزدەسۋدە دەپۋتات شەت اۋدانىنداعى اقادىر كەنتىنەن ءارى ورنالاسقان ءبىر شارۋا قوجالىعىندا ەلەكتر جارىعىن تۇتىنا الماي وتىرعانىن ايتا كەلىپ, ەلەكتر جەلىسىن جۇرگىزۋ مۇمكىندىكتەرىنە نازار اۋداردى. سەناتوردىڭ پىكىرىنشە, مۇنداي جەرلەردە تەك بالاما ەنەرگيانى قولدانۋ كەرەك. حالىق قالاۋلىسى اۋىل شارۋاشىلىعى سالاسىنىڭ ماماندارىنا بۇگىنگى تاڭدا شارۋا قوجالىقتارىنا ءالى دە كوپ نارسە جەتىسپەي وتىرعانىن ايتا كەلىپ, وزەكتى ماسەلەلەردى شەشۋ قاجەتتىگىن اتاپ ءوتتى.

دەپۋتات ر.ابدىكەروۆ اۋىل شارۋاشىلىعى ماماندارىنا ەلباسىنىڭ جولداۋىندا كورسەتىلگەن اگروونەركاسىپ كەشەنىن قارقىندى دامىتۋدا اقىلدى تەحنولوگيالاردى پايدالانۋ ماسەلەسىنە توقتالدى. اسىرەسە, ەگىلگەن تۇقىمدى كوپ قاراجات جۇمساماي جيناۋ جانە تەحنيكالار مەن تىڭايتقىشتاردى ءتيىمدى قولدانا ءبىلۋ قاجەتتىگى ايتىلدى. «وسىنداي جاڭا تەحنولوگيالاردى يگەرگەن سايىن كوپتەگەن ادامدار جۇمىسسىز قالا باستايدى. سوندىقتان ولاردى دەر كەزىندە زامان تالابىنا ساي تەحنيكا تەتىگىن مەڭگەرۋگە وقىتۋ مەن قايتا دايارلىقتان وتكىزۋ دە جولداۋدان تۋىندايتىن مىندەتتەر», دەدى دەپۋتات.

قاراعاندى وبلىسى تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى رۋسلان تولەپباەۆ قورشاعان ورتانى لاستايتىن ءبىرىنشى ساناتتى كاسىپورىندار ەكەنىن ايتا كەلىپ, ەكولوگيالىق كودەكسكە جەرگىلىكتى اتقارۋشى بيلىكتىڭ قۇزىرەتىنە ءبىرىنشى كاتەگورياداعى ۇلكەن كاسىپورىنداردىڭ قورشاعان ورتانى قورعاۋ باعىتىندا اتقارىپ جاتقان جۇمىستارىن قاداعالاۋعا مۇمكىندىك بەرەتىن ەرەجەلەر ەنگىزۋ تۋرالى ۇسىنىس ايتتى.   

قاراعاندى قالاسىنداعى ن.نۇرماقوۆ اتىنداعى مامانداندىرىلعان مەكتەپ-ينتەرناتىندا بولعان حالىق قالاۋلىسى وقۋ باعدارلاماسى ءۇش تىلدە قاتار جۇرگىزىلەتىن ارنايى كلاستاردى كوردى جانە ءبىلىم وشاعىنىڭ جەتىستىكتەرىمەن تانىستى.

سەناتور مەكتەپ-ينتەرناتتىڭ ۇستازدار قاۋىمىنا ەلباسىنىڭ جولداۋىنان تۋىندايتىن ماڭىزدى مىندەتتەر جايىندا جان-جاقتى ايتىپ بەردى. پىكىرلەسۋ بارىسىندا مەكتەپ مۇعالىمدەرى جوعارى بىلىكتى, سەرتيفيكاتى بار مۇعالىمدەردىڭ ايلىعى وسەتىنىن ايتا كەلىپ, بىلىكتىلىگى جوعارى, الايدا قولدارىندا سەرتيفيكاتى جوق مۇعالىمدەردىڭ جاعدايى مەن ولاردىڭ ەڭبەكاقىسى تۋرالى سۇرادى. دەپۋتات ۋاقىتى كەلگەندە ءار تۇتكىلدى ماسەلەنىڭ شەشىمى تابىلاتىنىن ايتتى.

 

پرەزيدەنت جولداۋى – باستى نازاردا

سەنات دەپۋتاتتارى ەربولات مۇقاەۆ پەن ناريمان تورەعاليەۆ باتىس قازاقستان وبلىسىنا جۇمىس بابىنداعى ساپارى اياسىندا اقجايىق اۋدانىنىڭ تۇرعىندارىمەن كەزدەستى.

چاپاەۆ اۋىلىنداعى اۋداندىق اۋرۋحانا قىزمەتكەرلەرىمەن, مۇعالىمدەرمەن جانە جاستارمەن اڭگىمەنىڭ باستى تاقىرىبى پرەزيدەنت ن.نازارباەۆتىڭ ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» حالىققا جولداۋى بولدى.

سەناتورلار جولداۋدىڭ  مازمۇنىن اۋىل تۇرعىندارىنا ءتۇسىندىردى جانە قويىلعان ساۋالدارعا جاۋاپ بەردى. حالىق قالاۋلىلارى ەلىمىزدىڭ تاۋەلسىزدىك جىلدارىندا قول جەتكەن تابىستارى مەن الەمدەگى ەڭ دامىعان 30 ەلدىڭ قاتارىنا كىرۋ جونىندەگى اتقارىلعان جۇمىستارعا, يندۋستريالاندىرۋ جانە اگروونەركاسىپ كەشەنىن دامىتۋ ماسەلەلەرىنە توقتالدى.

دەپۋتاتتار ودان باسقا جاڭا سالىق كودەسىنىڭ نەگىزگى ەرەجەلەرى, «2018-2020 جىلدارعا ارنالعان رەسپۋبليكالىق بيۋدجەت تۋرالى» زاڭ جانە پارلامەنت 2017 جىلى قابىلداعان باسقا دا ماڭىزدى زاڭدار جايىندا اڭگىمەلەدى.

كەزدەسۋگە قاتىسۋشىلار دەپۋتاتتارعا اۋدانداعى وزەكتى ماسەلەلەر تۋرالى ايتتى. اۋىل تۇرعىندارى وزدەرىن تولعاندىراتىن, اتاپ ايتقاندا تۇرعىن ۇيمەن قامتاماسىز ەتۋ, اۋىل شارۋاشىلىعى كووپەراتيۆتەرىنىڭ قىزمەتى, بالانى كۇتۋگە ارنالعان جاردەماقىنى تولەۋ ماسەلەلەرى تۋرالى ساۋالدار قويدى. ازاماتتار دارىگەرلىك ەمدەۋ مەن كوممۋنالدىق قىزمەتتەردىڭ باعاسى ءوسىپ بارا جاتقانىنا الاڭداۋشىلىق ءبىلدىردى. وقۋشىلار مەن مۇعالىمدەر ە. مۇقاەۆ پەن ن. تورەعاليەۆقا اۋىلدىق ەلدى مەكەندەردى كەڭ جولاقتى ينتەرنەتپەن قامتاماسىز ەتۋ جونىندەگى جۇمىستاردى جالعاستىرۋ تۋرالى ءوتىنىش ايتتى. سەناتورلار اۋدان ءۇشىن وزەكتى ماسەلەلەر بويىنشا دەپۋتاتتىق ساۋالدار ازىرلەپ, ءتيىستى مەملەكەتتىك ورگاندارعا جولداۋعا نيەتتەنىپ وتىر.

پارلامەنتشىلەر اۋىلدىڭ كۇندەلىكتى ومىرىمەن تانىسىپ, «ارۋلار الەمى» جاتتىعۋ زالىندا جانە «وركەن» ورتالىعىندا, سونداي-اق باسقا دا الەۋمەتتىك ينفراقۇرىلىم نىساندارىندا بولدى.

 

دەپۋتات س.ەڭسەگەنوۆ اتىراۋ وبلىسىندا مۇعالىمدەرمەن كەزدەستى

پارلامەنت سەناتىنىڭ دەپۋتاتى سارسەنباي ەڭسەگەنوۆ اتىراۋ وبلىسىنداعى قۇرمانعازى اۋدانىندا بولدى, سونداي-اق فاريزا وڭعارسىنوۆا اتىنداعى ورتا مەكتەپتىڭ مۇعالىمدەرىمەن جانە اتىراۋ كەنتىنىڭ تۇرعىندارىمەن كەزدەستى.

س. ەڭسەگەنوۆ ءوز سوزىندە مەملەكەت باسشىسى ن.نازارباەۆتىڭ ءتورتىنشى ونەركاسىپتىك رەۆوليۋتسيا جاعدايىنداعى ەلىمىزدىڭ دامۋىنا ارنالعان جولداۋىنىڭ نەگىزگى ەرەجەلەرىن ءتۇسىندىردى. ءبىلىم بەرۋ سالاسىنا قاتىستى سەناتور جولداۋداعى «ادامي كاپيتال – جاڭعىرۋ نەگىزى» تۋرالى جەتىنشى مىندەتتى جۇزەگە اسىرۋدىڭ ماڭىزىنا توقتالدى. ءبىلىم بەرۋ جۇيەسىن رەفورمالاۋ قازىرگى زامانداعى ەكونوميكانىڭ تالاپتارى مەن ەڭبەك نارىعىنا ساي بىلىكتى مامانداردى دايارلاۋعا باعىتتالۋى ءتيىس ەكەنى ايتىلدى.

س. ەڭسەگەنوۆ «100 ناقتى قادام» ۇلت جوسپارىندا پرەزيدەنت ءبىلىم بەرۋ جۇيەسىن الەمدەگى ۇزدىك ستاندارتتارى دەڭگەيىنە جەتكىزۋ جانە باسەكەگە قابىلەتتىلىگىن ارتتىرۋ تۋرالى تاپسىرما بەرگەنىن ەسكە سالدى. سەناتور سونداي-اق جاس ۇرپاق قازىرگى زامانعى تەحنولوگيالاردى تولىق يگەرۋ ءۇشىن بارلىق مەكتەپتەردىڭ ينتەرنەتكە قوسۋدىڭ ماڭىزدىلىعىن اتاپ ءوتتى.

 

سەناتور د. ادىلبەكوۆ بۋراباي اۋدانىندا بولدى

پارلامەنت سەناتىنىڭ دەپۋتاتى داۋرەن ادىلبەكوۆ اقمولا وبلىسىنداعى بۋراباي اۋدانىندا بولدى. سەناتور اۋداننىڭ الەۋمەتتىك-ەكونوميكالىق قورىتىندىلارىمەن تانىستى جانە جەرگىلىكتى تۇرعىندارمەن كەزدەستى.

جەرگىلىكتى ءوزىن-ءوزى باسقارۋ بيۋدجەتىنىڭ ءتورتىنشى دەڭگەيگە كوشىرىلۋىنە بايلانىستى ماڭىزدى ماسەلەلەر اۋداندىق اكىمدىكتەگى كەڭەستە تالقىلاندى. شاراعا اۋداندىق اكىمدىك باسشىلارى, اۋداندىق ءماسليحات دەپۋتاتتارى, مەملەكەتتىك كىرىس, قازىناشىلىق, ادىلەت, ستاتيستيكا باسقارمالارىنىڭ وكىلدەرى, جەرگىلىكتى پوليتسيا قىزمەتىنىڭ باستىعى, اۋماقتىق وكرۋگتەردىڭ اكىمدەرى, بيۋدجەت باعدارلامالارىنىڭ اكىمشىلەرى, بۇقارالىق اقپارات قۇرالدارىنىڭ تىلشىلەرى قاتىستى.