وڭتۇستىك قازاقستاندا قالا ءومىرىن وڭتايلاندىرۋ ماقساتىندا «Smart-City» – «اقىلدى قالا» جۇيەسى ەندىرىلە باستادى. بۇل تۋرالى وقو اكىمىنىڭ ءباسپاسوز قىزمەتى حابارلادى.
بۇگىنگى تاڭدا, «اقىلدى قالانىڭ» ۇلگىلىك كونتسەپتسياسى بەكىتىلىپ, قولجەتكىزۋ ينديكاتورى ايقىندالعان. بۇل تۋرالى وبلىستىق اكىمدىكتە وتكەن «تسيفرلىق قازاقستان» مەملەكەتتىك باعدارلاماسىنىڭ ىسكە اسىرىلۋ بارىسى تالقىلانعان جيىندا ايتىلدى.
وبلىس اكىمى ج.تۇيمەباەۆتىڭ توراعالىمەن وتكەن ماجىلىستە ايماق باسشىسىنىڭ ورىنباسارى ت.سارسەمباەۆ اتالعان باعدارلامانىڭ وبلىستا ورىندالۋ بارىسىن باياندادى.
ءوڭىردى باسقارۋدا بۇل جۇيە ءتيىمدى ءتاسىل بولاتىنىن ايتقان وبلىس اكىمى بۇل باعىتتاعى جۇمىستار ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى ەلباسىنىڭ جولداۋى نەگىزىندە ارى قاراي دامىتىلۋ قاجەت ەكەنىن اتاپ ءوتتى.
«جولداۋدىڭ ونىنشى قادامىندا مەملەكەت باسشىسى «اقىلدى قالالار» وڭىرلىك دامۋدىڭ, يننوۆاتسيانى تاراتۋدىڭ جانە ەلىمىزدىڭ بارلىق اۋماعىندا تۇرمىس ساپاسىن ارتتىرۋدىڭ لوكوموتيۆتەرىنە اينالادى-دەپ اتاپ كورسەتتى. سوندىقتان دا حالىقتىڭ كومپيۋتەرلىك ساۋاتتىلىعىن ارتتىرۋ باعىتىنداعى جۇمىستاردى جانداندىرىپ, تسيفرلىق جۇيەگە كوشۋدى جوسپارلى تۇردە جۇزەگە اسىرۋىمىز قاجەت»,-دەدى ج.تۇيمەباەۆ.
سونىمەن جيىندا ءمالىم بولعانداي ۇلگىلىك كونتسەپتسياعا سايكەس «اقىلدى قالانى» دامىتۋ باعىتىنا 11 سالا ەنگىزىلگەن. ولار - ءبىلىم, دەنساۋلىق ساقتاۋ, تۇرعىن ءۇي-كوممۋنالدىق شارۋاشىلىعى, الەۋمەتتىك سالا, كولىك, مەملەكەتتىك باسقارۋ, اۋىل شارۋاشىلىعى, ەكولوگيا, تۋريزم, قاۋىپسىزدىكتى قامتاماسىز ەتۋ مەن قۇرىلىس سالاسى. بۇگىنگى تاڭدا تسيفرلىق كەڭسە تاراپىنان ءاربىر باعالاۋعا ەنگىزىلگىن سالالار بويىنشا تسيفرلىق تەحنولوگيالاردى ەنگىزۋ جوسپارى ازىرلەندى.
قازىردىڭ وزىندە شىمكەنت قالاسىندا ءبىلىم سالاسى بويىنشا ءبىرشاما سمارت جۇيەلەر جۇزەگە اسىرىلۋدا. ماسەلەن, وقۋشىلاردىڭ ءبىلىم ساپاسىن جاقسارتۋ ماقساتىندا وبلىستاعى 779 مەكتەپتە «كۇندەلىك» جۇيەسى ەنگىزىلدى. سونىمەن قوسا ادامي فاكتور مەن سىبايلاستىق ارەكەتتى بولدىرماۋ ماقساتىندا بالعىنداردى بالاباقشا مەن 1-سىنىپقا ەلەكتروندى تۇردە قابىلداۋ جوباسى ەنگىزىلدى. قازىرگى كەزدە وسى قىزمەتتىڭ ارقاسىندا 23 مىڭنان استام بالا قالانىڭ بالاباقشالارىنا ءساتتى ورنالاسسا, تىركەلۋ ءۇشىن 64 مىڭنان استام جولداما بەرىلگەن.
بۇدان بولەك, قالادا پەداگوگيكالىق ۇجىمدى ىرىكتەۋ جۇيەسىن اۆتوماتتاندىرۋ ماقساتىندا t-hunter باعدارلاماسى ەنگىزىلدى. وسى ارقىلى شىمكەنتتىك مۇعالىمدەر جۇمىسقا ەلەكتروندى تۇردە قابىلدانۋدا. جوبانى جۇزەگە اسىرۋ بارىسىندا 700-دەن استام ۇمىتكەر قاتىسىپ, ونىڭ 491 جالپى ورتا ءبىلىم بەرۋ ۇيىمدارىنا مۇعالىم رەتىندە جۇمىسقا الىنعان.
ەلەكتروندى فورماتقا كوشىرۋ بويىنشا جۇمىستار جۇيەلى تۇردە جۇرگىزىلەتىنىن جەتكىزگەن وبلىس اكىمىنىڭ ورىنباسارى وبلىستاعى ءبىلىم سالاسىن ءارى قاراي دامىتۋدىڭ جوسپارىن ۇسىندى.