ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا قوزعالعان ولكەتانۋ ءىسىن دامىتۋ ماسەلەسى قىزىلوردادا وتكەن تاريحشىلار سليوتىندە تالقىلاندى.
2017 جىلدىڭ 27 جەلتوقسانىندا قىزىلوردا وبلىسىندا «رۋحانياتتى قولداۋ» قوعامدىق قورىنىڭ ۇيىمداستىرۋىمەن «تۋعان جەرگە تاعزىم» جوباسى اياسىندا تۇڭعىش رەت وتكەن تاريحشىلار سلەتىندە سىر ءوڭىرى تاريحىنىڭ زەرتتەلۋى مەن «ولكەتانۋ» ءپانىن وقىتۋدىڭ وزەكتى ماسەلەلەرى باياندالدى.
سلەت جۇمىسى اياسىندا سىر ءوڭىرىنىڭ الەۋمەتتىك-ەكونوميكالىق دامۋىنان سىر شەرتەتىن فوتوالبوم تۋرالى دايىندالعان بەينەروليك كورسەتىلدى. فوتوالبومنىڭ تۇساۋكەسەرىندە العاشقى ءسوز قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ پروفەسسورى, فيلولوگيا عىلىمدارىنىڭ دوكتورى باعدات كارىبوز ۇلىنا بەرىلدى. ولكەتانۋ ءپانىن وقىتۋدا قىزىلوردا ءوڭىرىنىڭ قاسيەتتى, كورىكتى جەرلەرى مەن ەسكەرتكىشتەرى كەسكىندەلگەن فوتوالبومنىڭ كومەگى كوپ بولاتىندىعى ايتىلدى.
سلەت جۇمىسى مەن فوتوالبوم تۇساۋكەسەرىنە وبلىستاعى, قالاداعى تاريح ءپانىنىڭ مۇعالىمدەرى مەن جوو عالىمدارى, زەرتتەۋشىلەر قاتىستى.