ەركىن ەلدىڭ ەرلىك جىلناماسى

ادامنىڭ وي-ساناسى تەحنيكالىق پروگرەستى قارىشتاتىپ دامىتقان, عارىشتى يگەرە باستاعان حح عاسىردىڭ وزىندە باسىندا ەركىندىگى جوق حالقىمىز تىلىنەن, دىلىنەن ايىرىلىپ قالا جازدادى. تاۋەلسىزدىكتىڭ بولماۋىنان جەرىمىزدىڭ بۇتىندىگىنە قىزىل يمپەريانىڭ كوزىن سالعان, «قۇدا تۇسكەن» كەزى بولدى. مۇنىڭ بارلىعىن تاريح ۇمىتۋعا ءتيىس ەمەس.

1991 جىلى ەلىمىز تاۋەلسىزدىگىن جاريالادى. وشكەنىمىز جاندى, ولگەنىمىز ءتىرىلدى. حالقىمىز بوستاندىقتىڭ, ەركىندىكتىڭ لەبىن سەزىندى. بازبىرەۋلەر ءۇشىن تاۋەلسىزدىك قانتوگىسسىز قولعا وڭاي كەلە سالعانداي بولادى. جوق, ولاي ەمەس. «مىڭ ءولىپ, مىڭ تىرىلگەن» قازاق عاسىرلار بويى ءومىرىن تاۋەلسىزدىك ءۇشىن كۇرەسپەن وتكىزدى. تاريح قان سۋداي اققان ءىرى شايقاستاردى بىلەدى. تاۋەلسىزدىكتى العاننان كەيىن ونى تۇعىرىن بەكىتۋدىڭ ماڭىزى سول عاسىرلار بويعى كۇرەستەن كەم تۇسكەن جوق. قول باستاۋ دا, جول باستاۋ دا, ءسوز باستاۋ دا تاۋەلسىز ەلدىڭ تۇڭعىش پرەزيدەنتى نۇرسۇلتان نازارباەۆتىڭ يىعىنا ءتۇستى.

الدا بۇرىن الەم بىلمەيتىن قازاقستان دەگەن ەلدىڭ, قازاق دەگەن حالىقتىڭ بار ەكەنىن تانىتۋ مىندەتى تۇردى. ورتاق ءبىر قازانعا قاراعان ەكونوميكالىق بايلانىستاردىڭ ۇزىلگەن, جوسپارلى ەكونوميكانىڭ ورنىنا نارىق كەلگەن قىسىلشاڭ ۋاقىتتاردا تىعىرىقتان جول تابۋ كەرەك بولدى. وسىدان شيرەك عاسىر ۋاقىت بۇرىنعى داعدارعان قيىندىقتاردى بۇگىنگى اعا ۇرپاق وكىلدەرى باستان كەشتى. ەكونوميكالىق داعدارىس قالانى دا, اۋىلدى دا كۇيزەلتكەن كۇندەردى نەگە ۇمىتۋىمىز كەرەك؟ شارۋاشىلىقتاردىڭ ىدىراۋى, سوعان وراي ىشكى كوشى-قوننىڭ ۇدەۋى, جۇمىسسىزدىقتىڭ بەلەڭ الۋى ەلىمىزگە اۋىر تيگەن ەدى. بىراق ەلباسى نۇرسۇلان نازارباەۆتىڭ سىندارلى ساياساتى ارقاسىندا حالىقتىڭ رۋحى تۇسكەن جوق, ءار جۇرەكتە تاۋەلسىز ەلدىڭ ەرتەڭى جاقسى بولارىنا مىعىم سەنىم ۇيالادى. ەلباسى نۇرسۇلتان نازارباەۆتىڭ «تاۋەلسىزدىك ءداۋىرى» اتتى جاڭا كىتابىندا تاۋەلسىزدىك جىلدارى ونىڭ ىرگەتاسىن قالاۋدا اتقارىلعان قاداۋ-قاداۋ, ەركىن ەلدىڭ ەرلىگىنە ءتان جۇمىستاردىڭ جىلناماسى جاسالادى.

جاستار بۇگىن جەر ءجۇزى تانىعان, الپاۋىت مەملەكەتتەر ساناساتىن, دامىپ وتىرعان ەلدە ەركىن, ەشقانداي جاماندىق كورمەي ءوسىپ كەلەدى. ولار تاريحتى بىلمەي تاۋەلسىزدىكتىڭ قادىر-قاسيەتىن دە باعالامايدى. سوندىقتان ەلباسىنىڭ جاڭا كىتابىن جاستار وقۋى ءتيىس. ول ءۇشىن جوعارى, ورتا وقۋ ورىندارىندا فاكۋلتاتيۆتىك ساباق ارقىلى بولسا دا كىتاپ ستۋدەنتتەرگە تانىستىرىلۋى ءتيىس. ءبىزدىڭ ينستيتۋتتا بۇل تاقىرىپتا كونفەرەنتسيالار, جاستاردىڭ دەباتتارى, دوڭگەلەك ۇستەل وتىرىستارى ۇيىمداستىرىلاتىن بولادى. تاۋەلسىزدىك جىلدارىنىڭ جىلناماسىنداي كىتاپ ءار جاس­تى العا تالاپتاندىرادى, وي-ءورىسىن وسىرەدى دەپ بىلەمىن.

ابدراحمان نايزابەكوۆ, رۋدنىي يندۋستريالىق ينستيتۋتىنىڭ رەكتورى, تەحنيكا عىلىمدارىنىڭ دوكتورى, پروفەسسور

رۋدنىي