ورتالىق كوممۋنيكاتسيالار قىزمەتىندە «نۇرجول» جەلەكجولىندا كولىك تۇراعى كەڭىستىگىن باسقارۋدىڭ اۆتوماتتاندىرىلعان جۇيەسىن ەنگىزۋگە ارنالعان ءباسپاسوز ءماسليحاتى ءوتتى.
شاراعا قاتىسقان استانا قالاسىنىڭ جولاۋشىلار كولىگى باسقارماسىنىڭ باسشىسى بەكمىرزا يگەنبەردينوۆ اۆتوماتتاندىرىلعان جۇيە 15 قاڭتاردان ىسكە قوسىلا باستايتىنىن ايتتى.
«ەلوردادا اقىلى كولىك تۇراعىن ەنگىزۋ جونىندەگى «استانانىڭ كولىك تۇراعى كەڭىستىگىن باسقارۋ» جوباسى ىسكە قوسىلدى. ونىڭ العاشقى كەزەڭى «نۇرجول» جەلەكجولىندا جۇزەگە اسىرىلدى. اتالعان ايماقتا 472 تۇراق ورنى بەلگىلەنىپ, جول تاڭبالارى سىزىلدى, اقپارات الۋ تاقتالارى مەن 12 پاركومات ورناتىلدى», دەدى ب.يگەنبەردينوۆ.
سونىمەن قاتار ول بيىلعى جىلى ەسىل, سارىارقا جانە الماتى اۋداندارىنىڭ اۋماعىندا 9 مىڭنان استام كولىككە ارنالعان تۇراق اشىلاتىنىن جەتكىزدى.
«اۆتوكولىك يەلەرىنە تۇراق اقىسىن تولەۋدىڭ ءتۇرلى نۇسقالارى ۇسىنىلادى. ولار پاركومات ارقىلى قولما-قول اقشا, بانك كارتاسىمەن, SMS جولداۋ نەمەسە جەكە كابينەت ارقىلى, «كاسسا 24» تەرمينالدارى مەن ارنايى ءموبيلدى قوسىمشا كومەگىمەن تولەۋ مۇمكىندىكتەرىنە يە. تۇراق اقىسى تاڭعى 8-دەن كەشكى 8-گە دەيىن ساعاتىنا – 100 تەڭگە. تۇراق سەسسياسى باستالعان ساتتەن باستاپ العاشقى 30 مينۋت تەگىن», دەدى ول.
ايتا كەتەتىن تاعى ءبىر جايت, قالامىزدا قازىردىڭ وزىندە «استانا» تەمىر جول ۆوكزالى اۋماعىنداعى اقىلى تۇراق جۇمىس ىستەۋدە.
راۋان قايدار, «ەگەمەن قازاقستان»