قازاقستان قاڭتاردان باستاپ بۇۇ قاۋىپسىزدىك كەڭەسىنىڭ توراعاسى قىزمەتىنە كىرىسكەنى بەلگىلى. بۇل ماڭىزدى شارا الەمدىك بۇقارالىق اقپارات قۇرالدارىنىڭ نازارىنان تىس قالعان جوق. وسى ورايدا ەلىمىزدىڭ بەدەلدى ۇيىمعا توراعالىق ەتۋى جونىندە جازىلعان جاڭالىقتاردى شولىپ شىققان ەدىك.
Xinhua: يادرولىق قارۋدى تاراتپاۋعا كوڭىل بولەدى
Xinhua بۇۇ قاۋىپسىزدىك كەڭەسىندە قازاقستان تاراپى ۇسىناتىن باستامالارىن سانامالاپ شىققان ەكەن. اگەنتتىك ءۇش باسىمدىقتى – جاپپاي قىرىپ-جويۋ قارۋىن تاراتپاۋ, ورتالىق ازيا مەن اۋعانستان جانە تاياۋ شىعىس ماسەلەسىن ەرەكشە اتاپ كورسەتەدى.
«قازاقستاننىڭ بۇۇ-داعى تۇراقتى وكىلى قايرات وماروۆ جاپپاي قىرىپ-جوياتىن قارۋدى تاراتپاۋ جانە سەنىم شارالارى جونىندە جوعارى دەڭگەيلى بريفينگ وتەتىنىن مالىمدەدى. «بىرقاتار مەملەكەت باسشىلارى مەن مينيسترلەرى شاراعا قاتىسادى» دەگەن ول جيىننىڭ قازاقستان پرەزيدەنتى نۇرسۇلتان نازارباەۆتىڭ توراعالىعىمەن جۇرگىزىلەتىنىن ءسوز ەتتى» دەلىنگەن اگەنتتىك جاريالاعان ماقالادا.
Xinhua-نىڭ اقپاراتىنا ساي, 18 قاڭتاردا وتەتىن شاراعا بۇۇ باس حاتشىسى انتونيو گۋتەرريش تە قاتىسادى. بۇدان بولەك, ق.وماروۆ ورتالىق ازيا مەن اۋعانستاننىڭ اراسىندا ارىپتەستىك ورناتۋ ماقساتىندا مينيسترلەر دەڭگەيىندە ءجارىسسوز وتەتىنىن حابارلاعان. وسى شاراعا قازاقستان سىرتقى ىستەر ءمينيسترى قايرات ءابدىراحمانوۆ توراعالىق ەتەدى.
«ق.وماروۆ 25 قاڭتاردا كەڭەستە تاياۋ شىعىس, سونىڭ ىشىندە پالەستينا احۋالى تالقىلاناتىنىن ايتتى. كۇن تارتىبىندە تۇرعان ماسەلەلەرگە سايكەس, كەڭەس مۇشەلەرى كونگوداعى قالپىنا كەلۋ شارالارىن باقىلايدى. سونداي-اق ۇيىم ورتالىق افريكا رەسپۋبليكاسىنا سالىنعان سانكتسيانى جاڭارتۋ جونىندە قارار قابىلداۋعا نيەتتى», دەيدى Xinhua.
The Hill Times: قازاقستان الەمگە ۇلگى
كانادا 2021-2022 جىلعا بۇۇ قاۋىپسىزدىك كەڭەسىنە مۇشە بولۋعا تالپىنىپ كورمەك. وسى ورايدا, ەلدەگى بەلدى باسىلىمداردىڭ ءبىرى The Hill Times وزدەرىنىڭ ديپلوماتتارى قازاقستاندىق ارىپتەستەرىنەن ۇلگى الۋ كەرەك دەپ ەسەپتەيدى.
«كانادا ءۇشىن قازاقستان ديپلوماتيالىق ساباق الاتىن ەل رەتىندە بىردەن ەسكە تۇسپەۋى مۇمكىن. الايدا پرەمەر-مينيستر دجاستين تريۋدو قازاقستاننىڭ قاۋىپسىزدىك كەڭەسىنە توراعا بولۋى بارىسىندا بۇل ەلدەن ۇلگى الۋىمىز كەرەك دەيدى», دەپ جازادى باسىلىم.
گازەتتىڭ دەرەكتەرىنە ساي, ەلىمىز قاۋىپسىزدىك كەڭەسىنە مۇشە بولۋ كەزەڭىن باسقا ەلدەرگە قاراعاندا كەشتەۋ باستاعان. ايتسە دە افريكا قۇرلىعىنداعى ديپلوماتيالىق قارىم-قاتىناسىن جاقسارتۋ ناتيجەسىندە قازاقستان باستى باسەكەلەسى تايلاندتان كوپ داۋىس جيناعان.
«بۇل – ءبىر كەزدەرى جۇتقا ۇشىراپ, قانالعان حالىق ءۇشىن ۇلكەن جەتىستىك. ەلدىڭ وتكەن عاسىردىڭ 30-جىلدارىنداعى قيىن-قىستاۋ كەزەڭىنەن 2017 جىلعى بۇۇ قاۋىپسىزدىك كەڭەسىنە مۇشەلىككە سايلانعانعا دەيىنگى ءجۇرىپ وتكەن جولى ۇيىمعا 2021-2022 جىلدارى سايلانۋعا تالپىناتىن كاناداعا ۇلگى بولارلىق. كانادا ساياسي تۇرعىدا ءوزىن «ورتا كۇش» (middle power) دەپ ەسەپتەيدى, بىراق سولتۇستىگى رەسەيمەن, شىعىسى قىتايمەن شەكتەسكەن, وڭتۇستىگى مۇسىلمان الەمىمەن قورشالعان, ۇلى جىبەك جولىنىڭ بويىندا جاتقان قازاقستان تۋرا ماعىناسىندا ورتا كۇشكە اينالىپ ۇلگەردى», دەيدى The Hill Times.
باسىلىم بۇدان ءارى تاۋەلسىزدىك العان جىلدارى قازاقستاننىڭ ءوز ەركىمەن يادرولىق قارۋدان باس تارتقانىن, ءالى كۇنگە دەيىن جاپپاي قىرىپ-جوياتىن بومبالارعا قارسى بەرىك ۇستانىمى بار ەكەنىن تامسانا جازادى.
«قازىرگى تاڭدا حالىقارالىق ماسەلەلەردى شەشۋدە كانادانىڭ بۇۇ الدىندا بەدەلى تومەن. سالىستىرمالى تۇردە قاراساق, قازاقستان استانادا سيريا كەلىسسوزدەرىنىڭ 8 راۋندىن وتكىزىپ, دەەسكالاتسيا ايماقتارىن قۇرۋعا قول جەتكىزدى. كانادا بۇۇ قاۋىپسىزدىك كەڭەسىنە مۇشەلىككە ۇمتىلادى. ەندەشە, قازاقتاردىڭ مىسالىنان ۇلگى الىپ, يادرولىق قارۋى بار وڭتۇستىكتەگى كورشىمىزدەن اۋىلىمىزدى الىس قوندىرىپ, بەيبىتشىلىك پەن حالىقارالىق ارىپتەستىكتىڭ ۇزدىگى بولۋ ءۇشىن ءالى دە كەش ەمەس», دەلىنگەن گازەتتەگى ماقالادا.
FoxNews: جاڭا مۇشەلەرمەن تولىقتى
اقش-تىڭ بەدەلدى ارنالارىنىڭ ءبىرى FoxNews قاۋىپسىزدىك كەڭەسىندەگى جىل سايىنعى مۇشە مەملەكەتتەردىڭ اۋىسۋى جونىندە اقپارات تاراتتى.
«بۇۇ قاۋىپسىزدىك كەڭەسىنە جاڭا جىلدان كەيىن 6 مەملەكەت مۇشە بولىپ كىردى. ولار: ەكۆاتورلىق گۆينەيا, كوت-د’يۆۋار, كۋۆەيت, گوللانديا, پەرۋ جانە پولشا. قازاقستاننىڭ تۇراقتى وكىلى قايرات وماروۆتىڭ قاتىسۋىمەن وتكەن سالتاناتتى راسىمدە اتالعان ەلدەردىڭ تۋلارى كەڭەس عيماراتىنىڭ سىرتىنا قويىلدى. ق.وماروۆتىڭ مەملەكەتى قازىرگى تاڭدا قاۋىپسىزدىك كەڭەسىنە توراعالىق ەتەدى», دەيدى FoxNews.
ارنا قاۋىپسىزدىك كەڭەسكە مۇشە بولۋ حالىقارالىق قاۋىپسىزدىك پەن بەيبىتشىلىك ماسەلەسىن تالقىلاۋدا ورنىقتى ۇستانىمىن بىلدىرۋگە مۇمكىندىك بەرەتىنىن ايتادى.
«كەڭەس بۇۇ-داعى ەڭ قۋاتتى مەكەمە سانالادى. قىتاي, فرانتسيا, رەسەي, ۇلىبريتانيا جانە اقش تۇراقتى مۇشەلەر جانە ولاردىڭ ۆەتو قويۋ قۇقىعى بار. باسقا مەملەكەتتەر بۇۇ-عا مۇشە 193 ەلدىڭ ىشىنەن ەكى جىل مەرزىمگە سايلانادى. بىراق بيىل گوللانديا مەن يتاليا اتالعان مەرزىمدى ءبولىپ اتقارادى», دەيدى FoxNews.
Iran Daily: يران قاۋىپسىزدىك كەڭەسىنىڭ نازارىندا ەمەس
Iran Daily يراندا بولىپ جاتقان وقيعالارعا قاتىستى قازاقستاننىڭ تۇراقتى وكىلى قايرات وماروۆتىڭ مالىمدەمەسىنە توقتالعان. اگەنتتىكتىڭ حابارلا- ۋىنشا, پارسىلار ەلىندەگى جاعداي قك-ءنىڭ كۇن تارتىبىندە تۇرعان جوق.
«بۇۇ قاۋىپسىزدىك كەڭەسىنىڭ توراعاسى يرانعا قاتىستى كەزەكتەن تىس كەزدەسۋ وتكىزۋ جوسپارى جوق ەكەنىن ايتتى. بۇعان دەيىن اقش وكىلى نيكي حەيلي ەلدەگى نارازىلىق شەرۋىنە قاتىستى جەدەل وتىرىسقا شاقىراتىنىن مالىمدەگەن بولاتىن. «يران قاۋىپسىزدىك كەڭەسىنىڭ كۇن تارتىبىندە ەمەس. بىراق مۇشە مەملەكەتتەردىڭ ءبىرى ماسەلەنى كوتەرىپ, ونى تالقىلاۋعا شاقىرسا, وسى توڭىرەكتە جۇمىس ىستەۋگە ءازىرمىز. سوندىقتان ءبارى قك-ءنىڭ شەشىمىنە بايلانىستى», دەدى ق.وماروۆ نيۋ-يوركتەگى ءباسپاسوز جيىنىندا. بىراق ول وسى تاقىرىپتا پىكىرتالاس بولعانىن اتاپ ءوتتى», دەيدى Iran Daily.
اقش-تىڭ تۇراقتى وكىلى نيككي حەيليدىڭ الداعى ۋاقىتتا قاۋىپسىزدىك كەڭەسى مەن بۇۇ ادام قۇقىعى جونىندەگى كوميسسيانىڭ وتىرىسىن شاقىرىپ, يران احۋالىن قوزعايتىنىن ايتقان-دى. ن.حەيلي «يران حالقى ازاتتىق ءۇشىن كۇرەسىپ جاتىر, بۇۇ ءوز ءسوزىن ايتۋى كەرەك» دەگەن بولاتىن. اگەنتتىكتىڭ سوزىنە ساي, يراننىڭ بۇۇ-داعى وكىلدىگى ونىڭ سوزىنە نارازىلىق بىلدىرگەن.
Report.az: قاڭتاردىڭ جۇمىس جوسپارى تانىستىرىلدى
ازەربايجاندىق Report اگەنتتىگى بۇۇ قاۋىپسىزدىك كەڭەسى بەكىتكەن نەگىزگى تاقىرىپتار جونىندە تارقاتىپ جازعان. يادرولىق قارۋدى تاراتپاۋ باستى باسىمدىقتاردىڭ ءبىرى ەكەنىن ايتادى.
«قازاقستاننىڭ تۇراقتى وكىلى قايرات وماروۆ الداعى ايدىڭ جۇمىس جوسپارىن تانىستىرىپ, 18 قاڭتاردا جوعارى دەڭگەيدەگى تاقىرىپتىق بريفينگ وتەتىنىن مالىمدەدى. شاراعا قازاقستان پرەزيدەنتى نۇرسۇلتان نازارباەۆ توراعالىق ەتەدى. كەلەسى كۇنى قازاقستاننىڭ سىرتقى ىستەر ءمينيسترى قايرات ءابدىراحمانوۆتىڭ باسشىلىعىمەن ورتالىق ازيا مەن اۋعانستان اراسىنداعى ايماقتىق ارىپتەستىكتى نىعايتۋعا ارنالعان مينيسترلىك دەڭگەيىندەگى ءجارىسسوز وتەدى. وعان بۇۇ باس حاتشىسى انتونيو گۋتتەريش قاتىسادى», دەيدى Report.az.
شولۋدى ازىرلەگەن
اباي اسانكەلدى ۇلى, «ەگەمەن قازاقستان»