پارلامەنت ءماجىلىسىنىڭ «نۇر وتان» پارتياسى فراكتسياسى دەپۋتاتتارى ي.ارونوۆا, ۆ.ولەينيك, ا.سۋسلوۆ, ي.كليمەنكو, س.قۇسايىنوۆ, ا.راۋ قوستانايداعى «سارىارقااۆتوپروم» جانە «اگروماشحولدينگ» ماشينا جاساۋ زاۋىتتارىنىڭ ءوندىرىس الاڭىندا بولدى.
حالىق قالاۋلىلارى زاۋىتتاردىڭ تسەحتارىنداعى اۆتوموبيلدەردى قۇراستىرۋ جۇمىستارىنىڭ دانەكەرلەۋ, بوياۋ, جيناۋ جانە تاعى باسقا جۇمىستارىنان تۇراتىن تولىق ۇدەرىسىمەن تانىستى. «سارىارقااۆتوپروم» زاۋىتىندا بۇگىندە Peugeot, SsangYong, Iveco, JAC, Hyundai, ANKAI, سhevrolet Niva ي Ravon Nexia R3 سەكىلدى الەمدىك برەندتەر شىعارىلادى.
سونىمەن قاتار زاۋىت باسشىلارى حالىق قالاۋلىلارىنا JAC ەلەكتروموبيلىنىڭ بىرنەشە داناسىن كورسەتتى. ەكولوگيالىق تازا ءونىم سانالاتىن بۇل ماشينانىڭ ەلىمىز تۇتىنۋشىلارى ءۇشىن دە, ەكونوميكانىڭ ەكسپورتتىق الەۋەتىن كۇشەيتۋ ءۇشىن بولاشاعى زور. وسىدان ەكى-ءۇش جىل بۇرىن رەسەيدەگى ەكونوميكالىق داعدارىستىڭ سالقىنى تيگەن ماشينا جاساۋ ءىسى قازاقستاندا قايتا ورلەدى. بىلتىر ماشينا زاۋىتتارىندا ءونىم ءۇش ەسەگە كوبەيدى. زاۋىت وتكەن جىلى عانا ساپقا قويعان وقۋشىلار تاسيتىن اۆتوبۋس ءماجىلىس دەپۋتاتتارىنىڭ نازارىن ەرەكشە اۋداردى.
«ەلىمىزدە شاعىن جيناقتى مەكتەپتەر وقۋشىلارىن اۋىلدان اۋىلعا اۆتوبۋسپەن تاسيدى. ونداي مەكتەپتەردىڭ باسىم كوپشىلىگى قوستانايدا ەكەنى بەلگىلى. سوندىقتان اۋىلدارداعى مەكتەپ وقۋشىلارىن قوستاناي زاۋىتىنان شىعىپ جاتقان وتاندىق اۆتوبۋستارمەن تاسۋ قاجەت» دەدى پارلامەنت ءماجىلىسىنىڭ دەپۋتاتى يرينا ارونوۆا. دەپۋتاتتىڭ بۇل ءسوزىن ونىڭ ارىپتەستەرى قولدادى. البەرت راۋ اۆتوبۋستاردى اۋداندار ليزينگ باعدارلاماسى ارقىلى الۋىنا بولاتىنىن ايتتى.
ءنازيرا جارىمبەت, «ەگەمەن قازاقستان» قوستاناي