قوستانايعا ىسكەرلىك ساپارمەن كەلگەن پارلامەنت ءماجىلىسىنىڭ «نۇر وتان» فراكتسياسىنە كىرەتىن دەپۋتاتتار توبى «اگروماشحولدينگ» زاۋىتىندا قۇراستىرىلاتىن اۋىل شارۋاشىلىعى تەحنيكالارىن قارادى.
بۇل زاۋىت بەلورۋستىڭ اۋىل شارۋاشىلىعى تەحنيكالارىن وندىرەتىن اتاقتى «گومسەلماش» زاۋىتىنىڭ ءونىمىن قازاقستاندا قۇراستىرۋ قۇقىنا يە بولعان جالعىز ءوندىرىس ورنى ەكەنىن ايتۋ ءلازىم. وتكەن جىل اياعىندا قول قويىلعان كەلىسىمگە سايكەس ۇستىمىزدەگى جىلى زاۋىت استىق جينايتىن 500 كومبايندى ساپقا قويماق. سونىمەن قاتار, بۇگىندە ەلىمىزدەگى اۋىل شارۋاشىلىعى تەحنيكالارىنىڭ 50 پايىزىن «اگروماشحولدينگ» زاۋىتى وندىرگەن. البەرت راۋ قوستانايداعى قوس زاۋىت جۇمىسى العا باسقاندىعىن, وتكەن جىلدىڭ وزىندە ءونىم ءۇش ەسە كوبەيگەندىگى جونىندە جاقسى حابار جەتكىزدى.
«رەسەيدەگى وتكەن جىلدارداعى ەكونوميكالىق داعدارىس ءبىزدىڭ ماشينا جاساۋ وندىرىسىنە دە سالقىنىن تيگىزگەن بولاتىن. ءونىم 4 ەسەگە دەيىن قىسقارعان ەدى. ءوندىرىس كەۋدەسىن قايتا تىكتەدى. ەندى اۋىل شارۋاشىلىعىن تەحنيكا جونىنەن قولداۋ كەرەك. ول ءۇشىن رەسەيدەن ەسكى اۋىل شارۋاشىلىعى تەحنيكالارىن كادەگە جاراتۋ باعدارلاماسىن اكەلۋ كەرەك. وسىدان ءبىر جىل بۇرىن مۇنداي باعدارلاما جەڭىل كولىكتەر ءۇشىن بولدى, ول ناتيجەسىن بەردى. مىنە, وسىنداي جولمەن اۋىل شاپرۋاشىلىعىن قولداپ عانا ەمەس, تەحنيكالار پاركىن جاڭالاۋىمىزعا بولادى» دەدى البەرت پاۆلوۆيچ.
قۇرامىندا ي.ارونوۆا, ۆ.ولەينيك, ا.سۋسلوۆ, ي.كليمەنكو, س.قۇسايىنوۆ, ا.راۋ بار ءماجىلىس دەپۋتاتتارىنىڭ توبى ىسكەرلىك ساپار بارىسىندا «نۇرلى جەر» مەملەكەتتىك باعدارلاماسىن جۇزەگە اسىرىپ جاتقان قوستاناي اۋدانىنداعى «سەۆەرنىي» شاعىن تۇرعىن اۋدانىندا بولدى. مۇنان بۇرىن «نۇر وتان» پارتياسى وبلىستىق فيليالىندا وبلىستىق ءماسليحات دەپۋتاتتارىمەن كەزدەسكەن بولاتىن. الداعى ۋاقىتتا دا دەپۋتاتتار توبى وبلىس اۋداندارى مەن قالالارىن ارالاپ, ەڭبەك ۇجىمدارىندا بولىپ, ەكونوميكالىق جانە الەۋمەتتىك سالالارداعى وزەكتى دەگەن ماسەلەلەردى زەردەلەيتىن بولادى.
ءنازيرا جارىمبەت,
«ەگەمەن قازاقستان»
قوستاناي