ءماجىلىس جانە سەنات دەپۋتاتتارى وڭىرلەردە حالىقپەن كەزدەسۋدە.
پارلامەنت ءماجىلىسى توراعاسىنىڭ ورىنباسارى گۇلميرا يسيمباەۆا, ءماجىلىستىڭ الەۋمەتتىك-مادەني دامۋ كوميتەتىنىڭ توراعاسى گۇلنار يقسانوۆا جانە ءماجىلىس دەپۋتاتى سەرىك سەيدۋمانوۆ الماتى قالالىق كارديولوگيا ورتالىعىنىڭ جۇمىسىمەن تانىستى.
ەلىمىزدەگى ەڭ ىرگەلى اۋرۋحانالاردىڭ ءبىرى سانالاتىن اتالعان ورتالىقتا وتكەن جىلدىڭ وزىندە جۇرەككە 600-دەن استام اشىق وپەراتسيا جاسالعان. كەزدەسۋ بارىسىندا دەپۋتاتتار پارلامەنت ءماجىلىسىنىڭ قىزمەتى تۋرالى اڭگىمەلەپ, مەملەكەتتىك جانە ۇكىمەتتىك باعدارلامالاردىڭ, مىندەتتى الەۋمەتتىك مەديتسينالىق ساقتاندىرۋدىڭ, سونداي-اق جۇيەلى رەفورمالاردى جالعاستىرۋدىڭ ماڭىزدىلىعىنا توقتالدى. مەديتسينا قىزمەتكەرلەرى ءوز كەزەگىندە دەنساۋلىق ساقتاۋ سالاسىنداعى اقپاراتتىق جۇيەلەرگە, تسيفرلاندىرۋدى ەنگىزۋگە, كارديولوگيالىق قىزمەتتەگى اقپاراتتىق جۇيەلەردىڭ جاي-كۇيىنە جانە حالىقتى ءدارى-دارمەكپەن قامتاماسىز ەتۋگە قاتىستى ساۋالدارىن قويدى.
ارمان وكتيابر, «ەگەمەن قازاقستان»
الماتى
پارلامەنت سەناتىنىڭ دەپۋتاتتارى ماناپ كوبەنوۆ پەن نۇرجان نۇرسيپاتوۆ پاۆلودار وبلىسىندا بولدى. سەناتورلارعا اقسۋ فەرروقورىتپا زاۋىتىندا مەتاللۋرگتەر جۇمىسىنىڭ ناتيجەلەرى كورسەتىلدى.
سونداي-اق دەپۋتاتتار ەۆگەنەۆ اۋىلدىق وكرۋگىندە وتكەن جىلى پايدالانۋعا بەرىلگەن بىرقاتار الەۋمەتتىك نىسانداردا بولدى. سەناتورلار سۋمەن جابدىقتاۋ جەلىسىمەن تانىسىپ, قۇرىلىسىنا 160 ميلليون تەڭگە جۇمسالعان دەنەشىنىقتىرۋ-ساۋىقتىرۋ كەشەنىن ارالادى.
ساپارلارىن قورىتىندىلاعان سەناتورلار ايماقتىڭ الەۋمەتتىك دامۋىنداعى تابىستار مەن اۋىل شارۋاشىلىعى سالاسىن كوتەرۋدەگى جەرگىلىكتى كاسىپكەرلەر مەن شارۋا قوجالىقتارىنىڭ زور ۇلەستەرىن اتاپ ءوتتى. دەپۋتاتتار جۇزدەسۋ بارىسىندا وتاندىق ءونىم وندىرۋشىلەردى قولداۋعا قاتىستى ايتىلعان ۇسىنىستار زاڭ شىعارۋ جۇمىستارى بارىسىندا ەسكەرىلەتىنىن ايتتى.
فاريدا بىقاي, «ەگەمەن قازاقستان»
پاۆلودار
ءبىزدىڭ ساپارىمىزدىڭ باستى ماقساتى – ەل-جۇرتپەن جۇزدەسىپ, الەۋمەتتىڭ جاي-كۇيى مەن تىنىس-تىرشىلىگى جونىندە جان-جاقتى پىكىر الىسۋ, دەدى اقتوبەدەگى كەزدەسۋلەرى كەزىندە پارلامەنت ءماجىلىسىنىڭ دەپۋتاتتارى گلەب ششەگەلسكي مەن دانيا ەسپاەۆا.
سونداي-اق ولار اۋىل شارۋاشىلىعىنا قاتىستى ماسەلەلەردى دە كوتەرىپ, بۇل باعىتتاعى مەملەكەتتىك باعدارلامالاردىڭ تيىمدىلىگىن ارتتىرۋ قاجەتتىلىگىنە توقتالدى. ال دەپۋتات قۇرالاي قاراكەن الەۋمەتتىك سيپاتتاعى جايلارعا باسىمدىق بەرسە, سەرگەي سيمونوۆ دەپۋتاتتاردىڭ زاڭ شىعارۋشىلىق قىزمەتىندەگى كەيبىر جايلارعا توقتالا كەلىپ, بۇل ىستە ەل مۇددەسى قاي كەزدە دە ءبىرىنشى ورىندا تۇراتىنىن مالىمدەدى. ونىڭ ويىنشا بۇعان كوپشىلىكتىڭ وي-پىكىرلەرى مەن ۇسىنىستارى باستى نەگىز بولماق.
تەمىر قۇسايىن, «ەگەمەن قازاقستان»
اقتوبە
پارلامەنت سەناتىنىڭ دەپۋتاتى رىسقالي ابدىكەروۆ قاراعاندى قالاسىندا ازاماتتاردى قابىلدادى. سەناتورمەن كەزدەسۋگە ءارتۇرلى الەۋمەتتىك ماسەلەلەر تولعاندىرعان وبلىس ورتالىعىنىڭ تۇرعىندارى كەلدى.
«قورعاۋ» ارداگەرلەر كەڭەسىنىڭ مۇشەسى ۆ. چايكا قابىلداۋ كەزىندە قالا مەن وبلىستى دامىتۋداعى اعا بۋىن وكىلدەرىنىڭ ءرولى تۋرالى ايتا كەلىپ, ولاردىڭ جاستار تاربيەسىنە اتسالىسۋى كەرەكتىگى تۋرالى ءوز ويىن ورتاعا سالدى. جالپى العاندا, دەپۋتاتقا 11 ازامات قابىلداۋعا كەلىپ, ەكى شاعىم بويىنشا وڭ شەشىم قابىلداندى. قابىلدانعان 5 شاعىم ءتيىستى مەكەمەلەرگە جىبەرىلدى. سونداي-اق 4 ازاماتتى تولعاندىرعان ماسەلەلەر بويىنشا ءتيىستى ءتۇسىندىرۋ جۇمىستارى جۇزەگە اسىرىلدى.
ميراس اسان, «ەگەمەن قازاقستان»
قاراعاندى
وڭتۇستىك قازاقستان وبلىسىنىڭ اكىمى جانسەيىت تۇيمەباەۆ جۇمىس ساپارىمەن كەلگەن پارلامەنت ءماجىلىسىنىڭ دەپۋتاتتارىمەن كەزدەستى. ولاردىڭ قاتارىندا ءۋاليحان قاينازاروۆ, بەرىك وسپانوۆ, ساپار احمەتوۆ جانە فاحريددين قاراتاەۆ بار.
كەزدەسۋدە وبلىستىڭ الەۋمەتتىك-ەكونوميكالىق دامۋى مەن الدا اتقارىلاتىن جۇمىستار ءسوز بولدى. – ەلباسىنىڭ باستاماسىمەن قولعا الىنعان مەملەكەتتىك باعدارلامالار وڭىردە بەلسەندى تۇردە جۇزەگە اسىپ كەلەدى, – دەدى وبلىس اكىمى.
ءوز كەزەگىندە ءماجىلىس دەپۋتاتتارى دا ءوز ويلارىن ورتاعا سالىپ, ساپارلارى بارىسىندا پرەزيدەنتتىڭ ساياساتىن ناسيحاتتاپ, الداعى جىلدارى اتقارىلاتىن جۇمىستاردى جۇيەلەۋدى ءجون كورىپ وتىرعاندارىن ايتتى.
بۇدان سوڭ حالىق قالاۋلىلارى بىرقاتار اۋدانداردى ارالاپ, جۇرتشىلىقپەن كەزدەستى.
باقتيار تايجان, «ەگەمەن قازاقستان»
وڭتۇستىك قازاقستان وبلىسى