استانا قالاسىنىڭ اكىمى اسەت يسەكەشەۆ كەشە جەدەل كەڭەس وتكىزدى. كەڭەسكە قالا اكىمىنىڭ ورىنباسارلارى, اۋدان اكىمدەرى, ءىىد, تجد, قالالىق كوممۋنالدىق قىزمەتتەردىڭ باسشىلارى قاتىستى, دەپ xابارلايدى استانا قالاسى اكىمدىگىنىڭ مەديا ورتالىعى.
كەڭەستە وتكەن تاۋلىكتە قالامىزدىڭ تىنىس-تىرشىلىگىن قامتاماسىز ەتۋ جونىندەگى اتقارىلعان جۇمىستار, تىرشىلىكتى قامتاماسىز ەتۋ وبەكتىلەرىنىڭ ۇزدىكسىز جۇمىس ىستەۋى, كريمينوگەندىك جاعداي بويىنشا قابىلدانعان شارالار, قالادا قۇقىقتىق ءتارتىپتى قامتاماسىز ەتۋ, قوعامدىق كولىكتەردىڭ تۇراقتى جۇمىسى جانە وتكەن بارلىق ءىس-شارالار بويىنشا ەسەپتەر تىڭدالدى.
ءتيىستى قۇرىلىمدىق بولىمشەلەردىڭ باسشىلارىنىڭ ايتۋىنشا, وتكەن تاۋلىكتە ەلوردادا جاعداي تۇراقتى بولعان.
سونداي-اق, قالا اكىمى قوعامدىق ءتارتىپتى قامتاماسىز ەتۋ, جولدار تازالىعىن ساقتاۋ جانە بارلىق قالالىق كوممۋنالدىق قىزمەتتەرگە بىرقاتار مىندەتتەر قويدى.
ەستەرىڭىزگە سالا كەتەيىك, وتكەن تاۋلىكتە ەلوردادا قالا تىرشىلىگى مەن قاۋىپسىزدىگىن قامتاماسىز ەتۋگە شامامەن 32 مىڭ ادام جۇمىلدىرىلدى.