كەشە قازاقستان رەسپۋبليكاسىنىڭ سىرتقى ىستەر ءمينيسترى ە.قازىحانوۆ ەقىۇ-نىڭ از ۇلتتار ىستەرى جونىندەگى جوعارعى كوميسسارى ك.ۆوللەبەكتى قابىلدادى. كەزدەسۋ بارىسىندا ەكى جاق قازاقستان مەن جوعارعى كوميسسار ءوفيسى اراسىنداعى ىنتىماقتاستىقتىڭ قازىرگى جاعدايى مەن دامۋ كەلەشەگىن تالقىلادى.
قازاقستاننىڭ سىرتقى ساياسات ۆەدومستۆوسىنىڭ باسشىسى ۇلتارالىق تاتۋلىق پەن دىنارالىق كەلىسىمدى ساقتاۋ ءماسەلەلەرى قازاقستان ءۇشىن ستراتەگيالىق ماڭىزعا يە ەكەنىنە ءارى ەلىمىزدىڭ تۇراقتى دامۋىنىڭ باستى كەپىلى بولىپ سانالاتىنىنا ايرىقشا نازار اۋداردى. ە.قازىحانوۆ قازاقستان مەن جوعارعى كوميسسار ءوفيسى اراسىنداعى ىنتىماقتاستىقتىڭ قارقىندى سيپاتىن اتاپ ءوتىپ, ك.ۆوللەبەككە قازاقستان ەقىۇ-دا ءتوراعالىق اتقارعان جىلى كورسەتكەن كوپجاقتى كومەگى ءۇشىن, سونىڭ ىشىندە 2010 جىلى ماۋسىم-شىلدە ايلارىندا ەقىۇ توزىمدىلىك جانە كەمىتپەۋشىلىك ءجونىندەگى جوعارى دەڭگەيلى كونفەرەنتسياسىن, سول جىلى شىلدەدە «از ۇلتتار ءبىلىمى: تەڭدىك مۇمكىنشىلىگى مەن ينتەگراتسيا» تاقىرىبى بويىنشا ەكىنشى قوسىمشا جينالىسىن جانە قىركۇيەكتە ۆارشاۆاداعى ەقىۇ شولۋ كونفەرەنتسياسىن وتكىزۋ بارىسىندا قولداۋ بىلدىرگەنى ءۇشىن العىسىن ءبىلدىردى.
ك.ۆوللەبەك ۇلتارالىق كەلىسىمدى كۇشەيتۋ بويىنشا اشىق ديالوگ پەن ءجۇيەلى جۇمىسى ءۇشىن قازاقستان تاراپىنا ريزالىعىن ءبىلدىرىپ, ەكى جاق اراسىنداعى ىنتىماقتاستىق ودان ءارى دامي بەرەدى دەگەن سەنىمىن جەتكىزدى, دەپ حابارلادى سىرتقى ىستەر مينيسترلىگىنىڭ ءباسپاسوز قىزمەتى.