"ەدەن" ارەنادا وتكەن بۇل ويىن ەل فۋتبولىنىڭ تاريحىنا ەنگەنى انىق.
ويىن باستالماس بۇرىن «سلاۆيانىڭ» قۇرامىنا قاراپ ۇزاق وتىردىم. بىلاي قاراساڭىز فۋتبولشىلارىنىڭ قۇرامى كادىمگىدەي تىسقاققانداردان قۇرالعان. يان لاشتۋۆكا «شاحتەر» دونەتسك كومانداسىنىڭ نەگىزگى قاقپاشىسى بولعان. ميگەل دانني تۋرالى دا كوپتەگەن ەستەلىكتەر بار. «زەنيت» ساپىندا جارقىلداپ, سۋپەركۋبوكتىڭ فينالىندا «مانچەستەر يۋنايتەد» قاقپاسىنا گول سوققان پورتۋگاليالىقتى تانىستىرىپ جاتۋدىڭ ءوزى بەكەر. قازاقستاندىق فۋتبول جانكۇيەرلەرى تەگىس تانيدى. 2012 جىلى «ەڭ ادەمى گولدى» كىم جەڭگەنىن بىلەتىن شىعارسىزدار؟ سول شاقتا «فەنەرباحچەنىڭ» ويىنشىسى بولعان ميروسلاۆ ستوح قازىر «سلاۆيانىڭ» ساپىندا. وسىدان 2 جىل بۇرىن قازاقستان ۇلتتىق قۇراماسىمەن بىرگە پلزەندەگى چەحيا – قازاقستان ويىنىنا بارعان ەدىم. ول ماتچ تا قازىر كوز الدىمدا سۇلبالانىپ تۇر. 75-مينۋتقا دەيىن جەڭىپ تۇردىق. الاڭعا الماسىپ كىرىپ, 2 گول سالىپ, سالىمىزدى سۋعا جىبەرگەن ميلان شكودا «سلاۆيانىڭ» ءبىر اتارى. 2004 جىلى قازاقستان قۇراماسى ۋەفا جالاۋىنىڭ استىندا العاشقى ويىنىن ۋكرايناعا قارسى وتكىزدى ەمەس پە؟ ءيا, ءدال سول تاريحي ماتچتا ءبىز سوڭعى سەكۋندتا گول جىبەرىپ, تەڭ ناتيجەدەن ايىرىلىپ قالدىق. گولدى رۋسلان روتان سوقتى. ول «سلاۆيادا» 29 نومەرمەن ونەر كورسەتەدى. توماش نەتسيدتى قويىڭىزشى, «تسسكا» ساپىندا سۇرمەرگەن بولسا, كەزىندە بولعان شىعار. ءبىزدىڭ قازاق فۋتبولىنا قارسى ەشتەڭە ىستەمەدى. ال مىنا حاليل التىنتوپ الگى 2010 جىلى سيدەلنيكوۆتىڭ قاقپاسىنا عالامات گول سوققان حاميت التىنتوپتىڭ سىڭارى عوي. جالپى, قاراپ وتىرساق, ەستەلىكتەر سونداي ءبىر جىلى دەي المايسىز. بارلىعى قازاقستان فۋتبولىنا كەسىرىن تيگىزىپ كەتكەن. تاجىريبيەلى, وزدەرىنىڭ سپورتتىق عۇمىرلارىندا جوعارعى ناتيجەلەردى تىركەگەن اياقدوپشىلار.
1-تايم
كەزدەسۋ باستالىسىمەن قوس كوماندا بىردەن شابۋىل جاساۋعا اسىقپادى. ەكەۋى دە ەمەن-جارقىن پاس الماسىپ, وزدەرىنىڭ كىشىگىرىم دايىنداعان قيتۇرقى كومبيناتسيالارىن ىسكە اسىرىپ كورگىسى كەلدى. الايدا, سونداي ءبىر عالامات شابۋىلداردىكورە المادىق. ال ويىننىڭ 25-مينۋتىنا قاراي ءبىزدىڭ قاقپامىزدىڭ الدىندا بۇرىشتامالار كوبەيىپ, قاۋىپتى ساتتەر پايدا بولا باستادى. «سلاۆيا» قاقپاشىسى يان لاشتۋۆكا جاۋراعاننان دەنە قىزدىرىپ, ارلى-بەرلى جۇگىرىپ ءجۇردى. ال 38-مينۋتتان باستاپ شابۋىلعا شىعا باستاعان ەلوردالىقتار ستاندارتتى جاعداي ورىنداۋعا مۇمكىندىك الدى. ايىپ الاڭىنا كوتەرىلگەن پاس بايقاۋسىزدا مارين ءانيچيچتىڭ الدىنا كەلە قادى. قورعاۋشىمىز بوس قاقپاعا گول سوقتى. الايدا, قاپتالداعى تورەشى وفسسايد جاعدايى بولعاندىعىن كورسەتتى. دەگەنمەن, باس تورەشى انيچيچكە دوپتىڭ توماش نەتسيدكە ءتيىپ كەلگەنىن انىق كورىپتى. اقىلداسا كەلە سالىنعان گولدىڭ ءادىل بولعانىن ءبىلدىرتتى. تابلوداعى كورسەتكىش 0:1.
2-تايم
ەكىنشى تايم باستالىسىمەن «سلاۆيا» شابۋىلعا شىقتى. ال قازاقستاندىقتار قورعانىسقا ساق بولىپ, اراكىدىك قارىمتا شابۋىلدارعا يەك ارتىپ ءجۇردى. 78-مينۋتقا دەيىن قاقپاشىمىز نەناد ەريچ ۋاقىت سوزۋمەن اينالىسىپ جۇرگەن جەرىنەن سارى قاعاز الدى. ودان ءارى قاپتاعان بۇرىشتامالار دەگبىرىمىزدى قاشىردى. قورعاۋشىلارىمىز شابۋىلداردى ءبىرىنىڭ ارتىنان ءبىرىن قايتارىپ جاتتى. ورتادا جۇرگەن سەرىكجان مۇجىقوۆتىڭ ورنىنا ستانيمير ستويلوۆ قورعاۋشى سەرگەي مالىيدى شىعاردى. بويى ۇزىن ورتالىق قورعاۋشى كومانداعا اۋاداي قاجەت بولىپ تۇردى. الاڭ جيەگىندە ستويلوۆتىڭ كومەكشىسى گريگوري بابايان 80-مينۋتتان باستاپ بايىز تاۋىپ وتىرا المادى. اياقتان تىك تۇرىپ, شاكىرتتەرىنە اقىل ايتۋمەن بولدى. جۇيكەنى توزدىرىپ كەتكەن سوڭعى 10 مينۋت عاسىردان ۇزاققا سوزىلدى. تورەشىنىڭ سوڭعى ىسقىرىعى قازاقستاندىق كلۋبتى پلەي-وفف ساتىسىنا الىپ شىقتى. قازاقستان فۋتبولىنىڭ التىن تاريحىنا ەنەتىن بۇل ويىندى تريبۋنادا تولقىپ وتىرىپ كورگەن مەندە دە ارمان جوق, قازاق فۋتبولىنىڭ جانكۇيەرلەرىندە دە ارمان جوق. العا, «استانا, العا قازاقستان!
ەرمۇحامەد ماۋەن,
«ەگەمەن قازاقستان», پراگا, چەحيا.