"بولاشاق" ستيپەندياسى يەگەرلەرىنىڭ ءتىزىمى جاريالاندى (تولىق ءتىزىم)

قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆانىڭ توراعالىعىمەن شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ كەزەكتى وتىرىسى ءوتتى.

وتىرىستى اشقان گ. ابدىقالىقوۆا مەملەكەت باسشىسىنىڭ ءبىلىمنىڭ رۋحاني جاڭعىرۋ كەزىندە زياتكەرلىك قوعام قالىپتاستىرۋداعى ماڭىزدى ءرولىن بەلگىلەگەنىن اتاپ ءوتتى. مەملەكەتتىك حاتشى «بولاشاق» ستيپەندياسى كونكۋرسىنىڭ ىرىكتەۋ كەزەڭىندە ەل دامۋىنىڭ باسىمدىلىقتارىنا نەگىزدەلە وتىرىپ, جوبالار مەن عىلىمي زەرتتەۋلەردىڭ مازمۇنىن ەسكەرۋ كەرەك ەكەنىن تىلگە تيەك ەتتى. ىسكە اسىرىلاتىن جوبالاردىڭ, اسىرەسە, تاعىلىمدامالار باعدارلامالارىنىڭ ىرگەلى جانە قولدانبالى مانىنە ەرەكشە نازار اۋدارۋ كەرەك.

كوميسسيا شەشىمى بويىنشا ماگيستراتۋرا جانە دوكتورانتۋرا باعدارلامالارى بويىنشا 270 ۇمىتكەرگە, سونداي-اق «تاعىلىمدامالار» ساناتى بويىنشا 39 ستيپەندياتقا تاعايىندالدى. ولاردىڭ ىشىندە 22 ادام «احقو قىزمەتكەرلەرى» ساناتى جانە 17 ادام «عىلىمي قىزمەتكەرلەر» ساناتى بويىنشا. 2017 جىلى 600 ستيپەنديا ءبولىندى.

جالپى 2017 جىلى «بولاشاق» حالىقارالىق ستيپەندياسىن تاعايىنداۋ ءۇشىن كونكۋرستىق ىرىكتەۋگە 947 ۇمىتكەر قاتىستى.

سونىمەن قاتار, وتىرىس بارىسىندا كوميسسيا شەشىمىمەن 2018–2025 جىلدارعا ارنالعان «بولاشاق» حالىقارالىق ستيپەندياسىن دامىتۋ جوسپارى جانە 2018 جىلعى باسىم ماماندىقتار تىزبەسى قابىلداندى. 2018 جىلعى ستيپەنديالاردىڭ شەكتى سانى 555 ورىندى قۇرايدى.

وتىرىس قورتىندىسى بويىنشا قازاقستان رەسپۋبليكاسىنىڭ مەملەكەتتىك حاتشىسى گ.ن.ابدىقالىقوۆا «بولاشاق» حالىقارالىق ستيپەندياسىن ىسكە اسىرۋ جونىندە بىرقاتار تاپسىرما بەردى.

ستيپەنديا يەگەرلەرىنىڭ ءتىزىمىن مىنا جەردەن كورە الاسىزدار.