– ايدوس اعا, باتىردىڭ ءرولىن ويناعىسى كەلەتىندەر كوپ, بىراق ادامنىڭ قالاۋ-تىلەگى بار دا, تالانت پەن مۇمكىندىك دەگەن دۇنيە تاعى بار. تەاتر مەن كينودا باھادۇرلەر بەينەسىنىڭ گالەرەياسىن جاساپ كەلە بىردەن-ءبىر اكتەر بولعاندىقتان, ءسىزدىڭ ونەردەگى امپلۋاڭىزدى وسى توڭىرەكتەن ىزدەگەنىمىز دۇرىس پا؟
– بۇرىن ونەر اينالاسىندا جۇرگەن رەجيسسەرلەر, اكتەرلەر ءۇشىن «امپلۋا» وتە ماڭىزدى بولاتىن. قازىر وسى ۇعىم ءوز-وزىنەن قاساڭ تارتىپ, قالتارىستا قالىپ بارا جاتىر ما دەيمىن. نەگە؟ ادام بولىپ جارالعاننان كەيىن وعان بۇكىل سەزىم ءتان: ول كۇلەدى, جىلايدى, ويلانادى, وپىنادى. ال تەاترعا كەلگەن اكتەر «مەن سالماقتى ادام ەدىم, ساتيرالىق ءرولدى ويناي المايمىن» دەپ قاراپ تۇرمايدى. اكتەرسىڭ بە – وينا. «شىن پالۋانعا وڭى مەن سولى ءبىر» دەگەندەي, ەگەر اكتەر كاسىبي بولسا, ول تراگەديانى دا, كومەديانى دا تاڭداپ جاتپاستان, بىردەي دارەجەدە ويناپ شىعادى.
ناشار اكتەر عانا «مەن كومەديالىق اكتەر ەدىم», بولماسا «قولايىما تراگەديا جاعاتىن ەدى» دەپ سان ءتۇرلى سىلتاۋ ايتىپ, دارىنسىزدىعىنا ءتۇرلى سەبەپتى دالەل قىپ جاتادى. شۇكىر, ماسكەۋدىڭ ششەپكين اتىنداعى تەاتر ۋچيليششەسىن ءتامامداپ جاتقاندا ديپلومدىق جۇمىسىم بولعان بوريس گودۋنوۆتان باستاپ, كۇنى بۇگىنگە دەيىن تەك گەرويلاردى عانا ويناپ كەلە جاتىر ەكەنمىن. امپلۋاعا بايلانىپ قالعان جەرىم جوق, تەاتر باسشىلىعى سەنىم ءبىلدىردى مە, اقتاپ شىعۋعا ءتيىسپىن.
– گەروي بولعاندا دا باي-ماناپ پەن باتىردىڭ رولىنە قۇيىلىپ تۇسەسىز.
ء–تۇر-تۇلعاسى, ءجۇرىس-تۇرىسى, داۋىسى دايىن اكتەر تۇرعاندا, رەجيسسەرلەر دە باتىردى الىستان ىزدەپ, اۋرە بولعىسى كەلمەيدى. تەاتر, ەڭ الدىمەن, ەستەتيكالىق تاربيەسى جوعارى تۇراتىن ورىن. كورەرمەن ساحنادان قوبى جاۋىرىن, ءاپايتوس ناعىز باتىردى, قارا سوزدەن قۇيىن تۇرعىزاتىن وت اۋىز, وراق ءتىلدى ناعىز ءبيدى, كەبەجە قارىن, كەردەڭ بايدى كورەمىن دەپ كەلەدى. ساحناداعى اكتەر, ول جاساعان بەينە كورەرمەننىڭ وسى تۇسىنىگىمەن قابىسپاي قالسا, ونىڭ قايتادان تەاتر ەسىگىن اشۋى ەكىتالاي. سىرتقى ۇقساستىق ءوز الدىنا, وبرازدىڭ استارىن اشۋ ءۇشىن سول كەيىپكەردىڭ ىشىنە كىرىپ, جان دۇنيەسىن كەيىپتەي الۋى بارىنەن دە ماڭىزدى. «رۋحاني جاڭعىرۋ» دەپ ەل ەندى عانا جاپپاي ايتا باستادى. ال تەاتردىڭ بايىرعى زامانداردان بەرگى مىندەتىنىڭ ءوزى ادامنىڭ رۋحىن وياتۋ, رۋحتاندىرا وتىرىپ جاسامپازدىققا, ادام رەتىندە جاقسى جاعىنا وزگەرىپ, جاڭعىرۋىنا قىزمەت ەتۋ.
– اكتەردىڭ تاعدىرىن ءتۇرى دە, تۇلعاسى دا ەمەس, ەڭ الدىمەن ءۇنى, داۋىسى شەشەتىنىن كوپ رەتتە بايقاپ ءجۇرمىز. ەشكىمگە ۇقسامايتىن باريتون داۋىسىڭىزدىڭ ارقاسىندا راديوداعى كىشكەنتاي كورەرمەندەرگە «ايدوس اتا» اتاندىڭىز, بۇل ءوزى ءاۋ باستان قويىلعان داۋىس پا؟
– ءبىر اكتەردىڭ داۋىسىن ۇستازى كاسىبي ءادىس-تاسىلمەن قويىپ بەرەدى, ەندى ءبىر اكتەر ۇزدىكسىز دايىندىق ارقىلى ءوز داۋىسىن ءوزى تاربيەلەپ الادى. وسى داۋىس ءۇشىن كەزىندە تالاي رەجيسسەرلەرمەن ارامىزدا رەنىش تە بولدى. «سەن نەگە داۋىسىڭدى وزگەرتىپ سويلەيسىڭ, ءوز تابيعي داۋىسىڭمەن سويلە» دەيدى ماعان. «تاربيە» كورمەگەن, تابيعي داۋىسىم ەكەنىنە سەنبەيدى. بەتىمە ايتپاسا دا, «قاتىنوسەك جىگىتتەر نە دەمەس دەيسىڭ سىرتىمنان» دەپ ماحامبەت اقىن ايتقانداي, «ايدوس اناعان ەلىكتەيدى, جوق, مىنا ءبىر اكتەرگە ەلىكتەيدى» دەپ تۋ سىرتىمنان سىبىرلاپ ايتىلعان ءسوز قۇلاعىما اراگىدىك جەتىپ جاتادى. ادام – ءپاندا, ال ءپاندانىڭ قاي سوزىنە رەنجيسىڭ؟ بىرىنشىدەن, مەن ەلىكتەيتىن-سولىقتايتىن جاستان باياعىدا ءوتىپ كەتكەنمىن. ەكىنشىدەن, ەشقاشان ەشكىمگە ەلىكتەپ كورمەپپىن. ونەر دەگەن – جانتالاس. جارىپ شىقساڭ – شىقتىڭ, شىقپاساڭ – جۇتىلاسىڭ.
– الپىسقا اياق باستىڭىز, جۇتىلماي امان قالعانىڭىزعا قاراعاندا قورعانىس قابىلەتىڭىز مىقتى بولدى عوي؟
– نەگىزى, باياعىدا, جۇتىلىپ كەتۋىم كەرەك ەدى, جۇتقىلارى كەلدى دە, بىراق تاماقتارىنان وتپەدىم. كوز الدىڭىزعا ەلەستەتىڭىز: ونەر دەگەن – تاۋ بولىپ جينالعان وتىننىڭ جانىندا بۇرق-سارق ەتىپ قايناپ جاتقان قارا قازان. وتىن وشىرمەي, اركىم ءبىر كەلىپ, شوعىن ۇرلەپ, ۇستىنە تامىزىق تاستاپ, ودان ءارى ساقىرلاتىپ قايناتا تۇسەدى. كەيبىرى لاۋلاعان وتقا, بۇرق-بۇرق ەتىپ قايناعان قازاننىڭ بۋىنا قاراپ تۇرىپ ءلاززات الاتىن شىعار. ال قازاننان اۋلاق, وزىممەن-ءوزىم جۇرگەن مەندە كىمنىڭ نە اقىسى بار؟ ءوزىمنىڭ جۇمىسىمدى جاقسى كورەمىن, ءسۇيىپ اتقارامىن, ساحناداعى سەرىكتەسىمدى بىلەمىن, ءرولىمدى بىلەمىن. ونەر ورتاسىنداعى الاۋىزدىق, توپ-توپقا ءبولىنۋ ءتۇبى توپالاڭ استىرماي تىنبايدى. كەزىندەگى قازاقتىڭ باسىنداعى ءتۇرلى ناۋبەت, قيامەت, زوبالاڭ تاپ وسى بولىنۋدەن بولدى. تەڭ جارتىسى شىبىنداي قىرىلىپ قالعان قازاق تاريحتىڭ قانداي شىرعالاڭىنان وتپەدى؟
جارايدى, بۇرىنىراقتا سانامىز تومەن بولىپ سازايىمىزدى تارتتىق, ناداندىقتان نامىسىمىز تاپتالعان بولار, ال ەندىگىمىزگە نە جورىق؟ ەكىنىڭ ءبىرىنىڭ جوعارى ءبىلىمى بار, قولىندا قوس-قوستان ديپلومى ءجۇر, ەندەشە بولىنۋگە بولمايتىنىن بىلمەي مە؟ «التاۋ الا بولسا, اۋىزداعى كەتەتىنىن, تورتەۋ تۇگەل بولسا, توبەدەگى كەلەتىنىن» بىلەدى, بىلە تۇرا بولىنگەنىن قويمايدى. اباي «قازاق نە نارسەنى عادەت قىلسا, ونى ولگەندە نە بىرەۋدەن قورىققانىنان قويادى» دەيدى. ولگەندە قوياتىنىمىز تۇسىنىكتى عوي, ءوز اقىلىمىز بەن پاراساتىمىز جەتپەيدى ەكەن, ەندەشە قورقىتىپ قويدىرايىق. ىرىلىك تانىتۋدىڭ ورنىنا ىرىتكى سالىپ جۇرەتىندەردى زاڭمەن تىزگىندەيىك. بولاشاقتا ىنتىماقتى ۇلت بولىپ قالامىز دەسەك, مۇنى توقتاتۋ كەرەك. بۇگىنگى تۇرمىسىمىز, ءومىرىمىز ەشكىمنەن كەم ەمەس. ارينە, ەگەر بولىنبەسەك, بۇدان دا جاقسى ءومىر سۇرۋىمىزگە بولار ەدى. وتكەننەن ساباق الار ۋاقىت بولىپ ەدى بۇ قازاققا, نەگە ويلانبايدى, بىلمەيمىن...
– «قۇنانباي» ءفيلمى ءۇشىن ءتورت بىردەي ادام مەملەكەتتىك سىيلىق الدىڭىزدار. مارتەبەلى اتاقتى كينو سالاسىنان ەمەس, ءومىر بويى قىزمەت ەتىپ كەلە جاتقان تەاترداعى ءرولىڭىز ءۇشىن العاندا ءتىپتى تاماشا بولار ما ەدى دەگەن وي كەلەتىنى راس...
– سىيلىق – بۇل سەنىڭ ەڭبەگىڭنىڭ ناتيجەسى. تەاترداعى رولدەرىم ءۇشىن وسى سىيلىقتى بەرگەندە دە, وسىلاي قابىلداعان بولار ەدىم. ەڭبەكتىڭ جەمىسى, ەڭبەكتىڭ قۋانىشى, باسقا ەشنارسە ەمەس. سىيلىق مەنىڭ بويىما نە سويىما ەمەس, ەڭبەككە بەرىلىپ تۇر. بۇل فيلمدە باراقتى ويناپ, مەنىڭ دە باعىم جاندى. كينودان العانىم ءۇشىن ەش وكىنبەيمىن. ويتكەنى بىرىنشىدەن, تاريحي فيلم. ەكىنشىدەن, كەرەك فيلم. اباي سەكىلدى ۇلىعا ءومىر سىيلاعانىمەن, كولەڭكەسىندە كورىنبەي كەلە جاتقان قۇنانباي تالاي جىلدار تىنىستاپ جاتىپ قايتا ءتىرىلدى. وسى ۋاقىتقا دەيىن قالىپتاسىپ قالعان تۇسىنىكتەن تىسقارى تۇلعاسىمەن تانىلدى. بۇل – رۋحاني الەمنىڭ جاڭالىعى.
– بىلەتىن ادامدار كينودان باعىڭىزدىڭ جانىپ جۇرگەنىن بايقايدى. ازىرگە گولليۆۋدتىڭ فيلمىنە تۇسكەن ءبىرىنشى قازاق ءوزىڭىز بولىپ تۇرسىز. الەم كينوسىنىڭ بۇگىنگى ءتاڭىرىسى قيىردا جاتقان ءسىزدى قايدان تاۋىپ ءجۇر؟
– بۇل اڭگىمەنى قوزعاسام, ىشىمدەگى وكپە-رەنىشىم دە قوسا قوزعالعانداي بولادى. 2014 جىلى الماتىعا گولليۆۋدتان ءبىر توپ پروديۋسەر مەن رەجيسسەردەن قۇرالعان توپ كەلىپ: «قازاقستاندا ماركو پولو تۋرالى فيلم تۇسىرەمىز», دەدى. كەلدى دە, كاستينگ جاريالادى. سىزگە وتىرىك, ماعان شىن, اۋزىمەن قۇس تىستەگەن جۇلدىزدارىمىزدىڭ ءبارى سامساپ سوندا ءجۇرىپتى. باتىرلار جىرىنىڭ ىشىنەن جارىپ شىعىپ كەلگەندەي بىلەگىنىڭ بۇلشىق ەتى بۇلتىڭداعان يىقتى, جاۋىرىندى, قوبىلاندىنىڭ نايزاسىنداي ۇزىن بويلى جىگىتتەر, سىمباتى كەلىستى سۇلۋ قىزدار امەريكالىقتاردىڭ سىنىنا توتەپ بەرۋ ءۇشىن نەشە كۇن بويى جانىن سالىپ سىناقتان ءوتىپ جاتىر ەكەن. بۇدان مەنىڭ حابارىم جوق. بىردە بەيتانىس قىز بالا حابارلاسىپ: ء«سىز كاستينگكە نەگە كەلمەيسىز؟» دەيدى. ءمان-جايدى تۇسىنگەننەن كەيىن باردىم, قاتىستىم. تاپ كينوسىناق جاسالاتىن كۇنى ءبىزدىڭ اكەمتەاترعا «قاس-قاعىم» سپەكتاكلىن كورۋ ءۇشىن ۆيلنيۋستەن كوميسسيا كەلەتىن بولدى. ەكەۋىنىڭ ۋاقىتى قاتار كەلىپ تۇر, نە ىستەمەك كەرەك؟
ونىڭ ۇستىندە اعىلشىن تىلىندەگى ءماتىندى دە دۇرىستاپ جاتتاماعان ەدىم. «تاڭەرتەڭ ءبىرىنشى بولىپ كىرەيىن دە, قاعازعا قاراپ وقىپ بەرەيىنشى» دەپ ەدىم, شەتەلدىكتەر وعان دا كەلىستى. ءسويتىپ اتتىڭ جالى, تۇيەنىڭ قومىندا, «ۇلگەرسەم ەكەن» دەگەن نيەتپەن تەاترعا كەلەتىن كوميسسيانى ويلاپ تۇرىپ, يكەمگە كەلمەيتىن شالا-شارپى تىلمەن اسىعىس-ۇسىگىس ءماتىندى وقىپ, سوڭعى جاعىن ءتىپتى جەدەلدەتە ايتىپ, جوعارى داۋىس ەكپىنىمەن اياقتاپ ەدىم, ۇستەل جاعالاي وتىرعان ونشاقتى امەريكالىق كينوگەرلەر ورىندارىنان تۇرىپ, قول سوقتى. ءىلتيپات قابىلداپ تۇرۋعا ۋاقىت جوق, الدى-ارتىما قاراماستان تەاترعا جۇگىرە جونەلدىم. ءسويتىپ ويدا جوق جەردەن گولليۆۋدتىقتاردىڭ نازارىنا مەن ىلىكتىم. فيلم مالايزيادا ءتۇسىرىلدى. ون سەريالى ءفيلمنىڭ ءبىرىنشى سەرياسىندا گەنەرال ارۋكانىڭ ءرولىن وينادىم. ارۋكا – شىڭعىسحاننىڭ كەزىنەن كەلە جاتقان, ۇرپاعى قۇبىلاي حاننىڭ اسكەرىن باستاعان, سوعىستىڭ تاكتيكاسىن جاسايتىن مىقتى قولباسشى بولعان ادام ەكەن. ەپيزود ەمەس, كورنەكتى ءرول.
ال ەندى وكپەمدى ايتايىن. بۇكىل الەمنىڭ ەڭ ايگىلى ارتىستەرىنىڭ ارمانىنا اينالعان, قالاي دا جولىن تاۋىپ, باعىندىرۋدى ماقسات ەتەتىن گولليۆۋدتىڭ فيلمىنە تۇسكەن تۇڭعىش قازاق ەكەنمىن, «ە-ە-ە, امەريكا كينوسىنا ءىز تاستاعان العاشقى قازاعىم-اي» دەپ ەلەگەن ءبىر جان بولساشى. تىم-تىرىس. جايشىلىقتا «اتىپ كەتىپتى, اسىلىپ قاپتى» دەپ كىلەڭ جاماندىقتى عانا جارناما جاساپ, جاريالاعانشا اسىق بولىپ جۇگىرىپ جۇرەتىن جۋرناليستەر جاقسى جاڭالىقتى قابىلداۋعا كەلگەندە تاس كەرەڭ, سۋ قاراڭعى سوقىر بولىپ قالعان با, ءبىر باسىلىم ءماۋ دەمەدى. جارايدى, ول فيلمدە مەن بولماي-اق قويايىن, باسقا ءبىر اكتەر ءتۇسسىنشى, بىراق قازاق اكتەرى, قازاقستان ازاماتى ويناپ جاتىر ەمەس پە؟ بۇل جاڭالىق ەمەس پە سوندا؟ مەن وسىعان تاڭعالدىم. جاماندىقتى ىزدەۋدىڭ قاجەتى جوق, پالە-جالا دەگەن اياقتىڭ استىندا, ال جاقسى جاڭالىق كۇندە بولا بەرمەيدى عوي, ءبىر ۋاق جۇرتتان ءسۇيىنشى سۇراپ, جاقسىلىقتى ونەگە قىلساڭ قايتتى؟ وسىعان قامىقتىم.
– وزدەرىندە دە ازيات ءناسىلدى اكتەرلەر تولىپ جۇرگەندە, مۇحيتتىڭ ارعى جاعىنداعى امەريكالىقتاردىڭ جەر تۇبىندەگى قازاق اكتەرىن نە ءۇشىن قاجەت قىلعانىن اسا تۇسىنىڭكىرەمەي وتىرمىن...
– ونى تۇسىنبەيتىن تۇك تە جوق, ولاردى قازاق اكتەرىنەن بۇرىن, قازاق جەرىنىڭ تامىلجىپ تۇرعان تاماشا تابيعاتى قىزىقتىرعانعا ۇقسايدى. شارىن شاتقالىنىڭ داڭقى شارتاراپقا جايىلعانىن سوندا ءبىلدىم. كەگەن, نارىنقولدى بەتكە العاننان-اق بيىك تاۋدىڭ سىلەمدەرىنە تاڭداي قاعىپ, اۋىزدارىن اشا ءوزارا اعىلشىنشا الدەنەنى ايتىپ كەلە جاتقان ولار, سونادايدان مەنمۇندالاپ اشىق اسپان استىندا مىڭداعان جىلداردان بەرى تابيعاتتىڭ ەڭ قاتال مىنەزىنە شىدامدىلىق تانىتىپ, شيماي-شيماي جارتاستى قامالدارىنىڭ ءبىر دىڭگەگى دە كەتىلمەي كەلە جاتقان جاراتقاننىڭ عاجاپ سىيى شارىندى كورگەندە, مۇلدە ەستەرى شىعىپ كەتتى. ەلىم ءۇشىن, جەرىمنىڭ سۇلۋلىعى ءۇشىن, ءتاڭىردىڭ بىزگە وسىنشاما بايلىقتى اياماي قيىپ بەرگەنى ءۇشىن «ماركو پولونى» تۇسىرگەندەردىڭ الدىندا كەۋدەمدى كوتەرىپ, ءبىرىنشى رەت شىن مارقايدىم.
– «ماركو پولو» سەريالىن كورىپ وتىرىپ, قۇبىلاي حاننىڭ ۇلىنىڭ قول باستاپ, كەسكىلەسكەن قاندى شايقاسقا كىرىپ بارا جاتقانىن كورىپ, بىزدەگى بيلىكتە جۇرگەن ازاماتتار تۇگىلى قاتارداعى شەندىلەردىڭ بالالارىنىڭ اسكەرگە بارمايتىنىن ويلادىق. وتان, ەل, جەر دەگەن اسقاق ۇعىمداردىڭ ادام ايتسا سەنگىسىز وزگەرىسكە ۇشىراعانىن وسىنداي مىسالدار بايقاتادى. ويى دا, بويى دا الاسارىپ بارا جاتقان جىگىتتەردىڭ قادىر-قاسيەتىن كوتەرۋدىڭ قانداي جولىن كورەسىز؟
– ەنتەلەپ كەلگەن جاۋدىڭ ەنتىگىن ەس جيعىزباي باسقان قۇبىلايدىڭ زامانىنداعى ەرلەر مەن بۇگىنگىنىڭ جىگىتىنىڭ باسقا بولۋى زاڭدىلىق – اراعا تۇسكەن عاسىرلار سەبەبى مەن سالدارىن اقتاپ الادى. ول ءداۋىردىڭ بايلىعى – دوڭگەلەپ جاتقان جەر ەدى. جەرگە تالاس, جەر ءۇشىن بولعان شايقاستار ەرلەردىڭ نامىسىن جانىدى, جىگەرىنە جىگەر قوسىپ, ايباتتى, قايراتتى قىلدى. تاريحي وقيعالاردىڭ بەتالىسى مەن بۋىرقانىسى ەرلەردى تابيعي تۇردە سوعان قاراي ىڭعايلاپ جاراتتى. كىم كۇشتى بولسا, ادىلەت پەن شىندىق سونىڭ قولىندا بولدى. سوعىستا جەڭۋ-جەڭىلۋ اسكەردىڭ رۋحىنا بايلانىستى ەدى.
ماكەدونسكيلەر ءار ساربازدىڭ دەنساۋلىعىنا دەيىن كوڭىل بولگەنى سونداي, موينىنا سارىمساقتى تۇمار سياقتى ءىلىپ قويعان ەكەن. ال بۇگىنگىنىڭ بالاسىنىڭ كۇش-قۋاتىنىڭ, ادامي ار-وجدانىنىڭ تومەندەپ بارا جاتقانى ماعان الىپساتار زاماننىڭ كىناسىنەن بولىپ وتىرعان سياقتى كورىنەتىنى بار. «بيزنەس» دەپ بۇركەمەلەنەتىن, تيىن ساناتقان بۇل الىپساتارلىق «ساۋدادا دوستىق جوق» دەگىزىپ, جاقىندى جات, كەشەگى دوستى بۇگىن جاۋ جاساپ جاتىر. بيزنەستىڭ ءوسىپ-وركەندەتەتىن جاعىنا بوي ۇرسا جاقسى عوي, ءبىر ادامنىڭ قولىنان تيىنعا الىپ, باسقاعا الدەنەشە ەسە ارتىق تەڭگەگە ساتىپ, ءوز بويىنداعى ەڭ ۇلكەن بايلىق – ۇياتىن دا قوسا ساتىپ بايىپ جاتقاندار بۇگىنگى تۋعان جاس بالالاردىڭ ۇلگى-ونەگە تۇتار تۇلعاسىنا اينالعانى جانعا باتادى. اسكەردى ازىرەيىل قىلىپ, تەلەديداردان كۇندە ءبىر تابىتتى كوتەرگەندەردى كورسەتىپ جاتقاندا, اينالىپ قاشاتىن ۇلداردى كىنالاۋعا بولا ما؟
ول جەردەگى ءتارتىپتى جۇيەگە كەلتىرىپ, كەڭەستىك كەزدەگىدەي كەز كەلگەن ۇل بالا بورىشىن وتەۋدى ارماندايتىنداي جاعداي جاساپ, ناسيحاتىن كۇشەيتۋ كەرەك. وتباسىندا ءوسىپ كەلە جاتقان ءبىر تال, ەكى تال ۇلدى ورىنسىز ەركەلەتكەندى قويىپ, ءىلىمدى-ءبىلىمدى بولىپ ءوسۋى ءۇشىن اياماي قارجى سالىپ, جاسىنان ەڭبەككە تاربيەلەگەن دۇرىس. ءبارىن ايت تا, ءبىرىن ايت, ەركە بولسا دا, ەبەدەيسىز بولسا دا كىلتىن تاپسا, بالا تاربيەگە كونەر-اۋ, الدىمەن اتا-انانىڭ وزىنە تاربيە قاجەت پە دەيمىن ءدال قازىر...
– اڭگىمەڭىزگە راحمەت.
اڭگىمەلەسكەن
ايگۇل احانبايقىزى,
«ەگەمەن قازاقستان»