لوندوندا قازاق كينوسىنىڭ اپتالىعى ءوتتى. «قازمۇنايگاز» بارلاۋ ءوندىرۋ» اق جانە «قازاقفيلم» كينوستۋدياسىنىڭ قولداۋىمەن وتكەن بۇل شارا بارىسىندا ءارتۇرلى جانرداعى 12 فيلم كوپشىلىك نازارىنا ۇسىنىلدى.
قازاق كينوسىنىڭ اپتالىعى بۇل ەلدە وتكەن ايتۋلى فەستيۆالدارمەن تۇسپا-تۇس كەلدى. ماسەلەن, بۇل كۇندەرى تانىمال جۇلدىزدار مادوننا مەن كيرا نايتلي قاتىسقان بريتاندىق قوس فەستيۆال جانە يران, كورەيا, رەسەي كينولارىنىڭ كورسەتىلىمى ءوتتى.
ءبىزدىڭ وتاندىق كينونىڭ شىمىلدىعى قازاقتىڭ سالت-ءداستۇرىن ناسيحاتتايتىن جانە ۇلتتىق الەمىمىزدى جارقىراتا اشىپ كورسەتەتىن سۇلتان قوجىقوۆتىڭ قايتالانباس ءفيلمى «قىز جىبەكپەن» اشىلدى.
باعدارلاما اياسىندا لوندوندىق كورەرمەندەر «ءترانسسىبىر ەكسپرەسى», «بالالىق شاعىمنىڭ اسپانى», «ستالينگە سىيلىق», «كوشپەندىلەر», «مۇستافا شوقاي», «جەرۇيىق», «ءبىرجان سال» فيلمدەرىن تاماشالادى. سونداي-اق جاقىندا عانا ۇلكەن ەكرانعا جولداما العان ەگور ميحالكوۆ-كونچالوۆسكيدىڭ «ا-عا ورالۋ», اقان ساتاەۆتىڭ «جويۋشى», قاناعات مۇستافيننىڭ «سەرپىن» جانە ت.ب. فيلمدەر دە اپتالىق اياسىندا كورەرمەندەرگە جول تارتتى.
لوندون جۇرتشىلىعىنىڭ قازاقستاندىق كينوعا دەگەن قىزىعۋشىلىعى ايتارلىقتاي جوعارى دەڭگەيدە بولدى. بۇعان دەيىن دە بۇل قالادا قازاقستاندىق ونەرپازداردىڭ قاتىسۋىمەن تالاي رەت تاماشا كونتسەرتتەر وتكەن بولاتىن. ال وتاندىق فيلمدەردىڭ ءدال وسىلاي كەڭىنەن ناسيحاتتالۋى مۇندا بۇرىن-سوڭدى بولعان ەمەس.
ورايى كەلگەندە ايتا كەتسەك, جەرگىلىكتى باسىلىمداردا, اتاپ ايتقاندا, «Financial Times», «Evening Standard», «Time Out», «The Sunday Times», «Metro», «Pulse UK», «City AM», «Kommersant UK» گازەتتەرىندە قازاق كينوسىنىڭ ءبۇگىنگى جەتىستىگىن تالداپ كورسەتكەن كوپتەگەن ماقالالار جاريالاندى. سونىمەن قاتار, لوندوننىڭ ورتالىقتارىندا «قازاقفيلم» كينوستۋدياسىن زاماناۋي ءونىم شىعارا بىلەتىن پەرسپەكتيۆالى ءوندىرىس رەتىندە تانىتاتىن ءىرى جارنامالار ءىلىندى.
وسى اپتالىققا قازاق كينوسىنىڭ مايتالمانى اسانالى ءاشىموۆ باستاعان ءبىر توپ رەجيسسەرلەر مەن بەرىك ايتجانوۆ, كارينا ابدۋللينا, قارلىعاش مۇحامەدجانوۆا سىندى ونەر يەلەرى قاتىسىپ, قازاق ونەرى جايلى كورەرمەندەرمەن وي ءبولىسىپ, پىكىر الماستى. جۇرتشىلىق تاراپىنان قويىلعان ساۋالدارعا جاۋاپ بەردى.
ال فەستيۆالدىڭ اشىلۋ سالتاناتىندا قازاقستاننىڭ ۇلىبريتانياداعى ەلشىسى قايرات ءابۋسەيىتوۆ كوپشىلىككە ەل تاۋەلسىزدىگىنىڭ 20 جىلدىعى تۋرالى ايتا كەلىپ, وسى فيلمدەر ارقىلى قازاق حالقىنىڭ ۇلتتىق مۇددەسى مەن ۇلتتىق بولمىسىن تانۋعا بولاتىنىن تىلگە تيەك ەتتى. وسىلايشا ەۋروپالىق اۋديتوريا تابيعي رەسۋرستارعا باي قازاقستاننىڭ رۋحاني تىرشىلىگىمەن دە جەتە تانىستى.
«ەگەمەن-اقپارات».