...قازاق – تۇرىك ليتسەيى اشىلدى
ەرتەدە اتا-بابامىز «جەتى جۇرتتىڭ ءتىلىن ءبىل, جەتى ءتۇرلى ءبىلىم ءبىل» دەپ وسيەت ەتكەن ەكەن. بۇل ءتامسىلدىڭ ءمانى وزگەرمەي, ەلباسى جاس ۇرپاققا باسەكەگە قابىلەتتى ءبىلىم بەرۋ ماسەلەسىنە ەرەكشە نازار اۋدارىپ, ەلىمىزدە وسى باعىتتاعى جۇمىس جۇيەلى جالعاستىرىلىپ كەلەدى. سونىڭ دالەلى, تالعار اۋدانىندا تاريحى, ءدىنى مەن ءدىلى ءبىر تۇركيا مەملەكەتىنىڭ 6,5 ميلليون دوللار ينۆەستيتسيا سالۋى ناتيجەسىندە 320 ورىنعا ارنالعان جاڭا ءبىلىم شاڭىراعى پايدالانۋعا بەرىلدى.
ەكى ەل اراسىنداعى ءوزارا ىنتىماقتاستىققا التىن كوپىر بولعان وقۋ ورنىندا بالالار مەملەكەتتىك تىلمەن قوسا, تۇرىك, اعىلشىن جانە ورىس تىلدەرىن وقۋمەن قاتار, سالاماتتى ءومىر سالتىن قالىپتاستىرۋعا ارنالعان ورىندارمەن, قۇرال-جابدىقتارمەن جەتكىلىكتى قامتىلعان. سپورت زال, باسكەتبول, ۆولەيبول الاڭدارى دا بار.
وقۋ ورنىنىڭ جالپى اۋماعى – 1,5 گەكتار. وندا ءۇش قاباتتى مەكتەپ, 280 توسەكتىك جايلى جاتاقحانا ورنالاسقان. العاشقى قابىلدانعان 110 بالا شالعاي ەلدى مەكەندەردەن كەلگەن تالانتتى بالالار جانە الەۋمەتتىك جاعىنان جەتكىلىكسىز قامتىلعان وتباسىلارىنان شىققان جاسوسپىرىمدەر. وقىتۋ تەگىن, از قامتاماسىز ەتىلگەن بالالارعا ءبىلىم بەرۋ قورىنىڭ قۇرىلتايشىسى زياندين كاسانوۆتىڭ كومەگى دە زور.
جاڭا قازاق-تۇرىك ليتسەيىنىڭ اشىلۋ سالتاناتىنا تۇركيا رەسپۋبليكاسى پرەمەر-ءمينيسترىنىڭ ورىنباسارى بەكەر بوزداع جانە باسقا رەسمي ادامدار قاتىستى.
كۇمىسجان بايجان. الماتى وبلىسى.
* * *
...كولىكتەر بەرىلدى
ىشكى ىستەر باسقارماسىنا قاراستى جول پوليتسياسى قىزمەتكەرلەرىنىڭ جۇمىس ساپاسىن جاقسارتۋ ماقساتىندا زامان تالابىنا ساي كولىكتەر الۋ ءۇشىن بيىل وبلىس بيۋدجەتىنەن 111 ميلليون 578 مىڭ تەڭگە بولىنگەن بولاتىن. ياعني, جول پوليتسياسى قىزمەتكەرلەرى ەل تاۋەلسىزدىگىنىڭ 20 جىلدىعى قارساڭىندا 50 كولىككە قول جەتكىزدى. قازىر بۇل كولىكتەردىڭ بارلىعى دا ارنايى بايلانىس قۇرالدارى – كومپيۋتەرمەن, راتسيا جانە GPS جۇيەسى سياقتى جاڭا تەحنيكا جەتىستىكتەرىمەن جابدىقتالعان. قىزمەتتىك جاڭا كولىكتەرگە قول جەتكىزگەن جول ساقشىلارى ارنايى تۇردە جابدىقتالعان قۇرىلعىلاردىڭ تۇرعىندار قاۋىپسىزدىگىن ساقتاۋدا, وبلىس ورتالىعىنىڭ كوشەلەرىندە جۇرگىزۋشىلەر تاراپىنان زاڭ بۇزۋشىلىق دەڭگەيىنىڭ تومەندەۋىنە اسەر ەتەتىنىن ايتادى.
فاريدا بىقاي. پاۆلودار.
* * *
...قازاندىق ىسكە قوسىلدى
قوستاناي قالاسىنىڭ وڭتۇستىك بولىگىن جىلۋمەن قامتاماسىز ەتەتىن №3 جىلۋ قازاندىعى ىسكە قوسىلدى. جاڭا قازاندىقتىڭ قۋاتى 498 مەگاۆاتتقا جەتەدى. وعان 90 مەترلىك مۇنارا-مۇرجا ورناتىلدى. ول بۇرىنعىداي كىرپىشتەن ءورىلمەگەن, وتقا ءتوزىمدى زاماناۋي قۇرىلىس ماتەريالىنان جاسالعان. قوسىمشا ەكى بۋ جانە ءۇش سۋ قازاندىعى دا وسى مۇنارا-مۇرجانى پايدالانادى. قازاندىق قالانىڭ وڭتۇستىك بولىگىنە بەرىلەتىن جىلۋدى ارتتىرا ءتۇستى. ونى باسقارۋ اۆتوماتتاندىرىلعان.
قازاندىق جوباسىن جۇزەگە اسىرۋعا بيۋدجەتتەن 1,2 ميلليارد تەڭگە ءبولىندى. وسىعان دەيىن قوستاناي قالاسىنىڭ وڭتۇستىك ءبولىگىنە بەرىلەتىن جىلۋ جەتكىلىكسىز بولاتىن. مامانداردىڭ ايتۋىنا قاراعاندا, قازاندىقتىڭ جىلىتۋ كولەمىن ۇلعايتقاننان كەيىن تۇرعىندار جىلۋدان تارىقپايتىن بولادى.
ءنازيرا جارىمبەتوۆا. قوستاناي.