قىزىلوردا وبلىسىنىڭ سپورت جانە تۋريزم, دەنە تاربيەسى باسقارماسىنىڭ باستىعى سادىق مۇستافاەۆ اقەدىل جىگىت. ء“ىس تەتىگىن كادر شەشەدى” دەگەن قاناتتى ءسوزدىڭ اقيقاتىن وسى سادىقتىڭ سپورتتاعى جەتىستىكتەرىنەن كورەسىڭ.
ءبىر قىزىعى, سادىققا دەيىن وبلىس سپورتىن باسقارعاندار تۇسىندا وليمپيا ويىندارىندا ولجا سالماق تۇگىلى, قاتىسۋعا جولداما الۋىنىڭ ءوزى تاريحي وقيعاداي كورىنەتىن. مۇستافاەۆ باسشى بولىپ كەلگەلى ءبىر التىندى سونىڭ سايىپقىراندارىنان كۇتەتىن بولىپ داعدىلاندىق.
سول سادىق ايتادى: “سپورتشى بيىك دارەجەگە جەتۋ ءۇشىن وعان وبلىستىق, رەسپۋبليكالىق, قالا بەردى حالىقارالىق جارىستار كەرەك. سونىڭ تەزىنەن ءوتىپ, تاجىريبە جيناقتاسا, ءۇلكەن شەبەرلىككە جەتەدى. ول كەزدە سپورتقا ءبولىنگەن قارجى از بولدى. سوندىقتان, ەلدەن شىققان مىقتى جىگىت, ايتۋلى ازاماتتارعا ساۋىن ايتا ءجۇرىپ, سولاردىڭ جۇلدە تاعايىنداۋىمەن رەسپۋبليكالىق جارىستار وتكىزە باستادىق. مۇنىڭ جاقسىلىعى سول, جەڭىستەن دامەلى جىگىتتەرىڭنىڭ ءبارى قاتىسا الادى. كەيىن ىشىنەن مىقتىلارى ىرىكتەلىپ شىعادى”.
جۇمىس ىستەي بىلەتىن, تاستۇلەكتەرىنىڭ توماعاسىن ۋاقىتىندا سىپىراتىن ازاماتتاردىڭ كەسىگى وسىلاي بولادى. سول سادىقتىڭ داۋلەت نيازبەكوۆ دەگەن شاكىرتى بيىل گرەك-ريم كۇرەسىنەن ىستامبۇلدا وتكەن الەم چەمپيوناتىندا قورجىنعا العاشقى مەدالدى سالعانىن جانە ايتا كەتەيىك.
قازاعى كيىزدەي ۇيىققان, بەرەكەسى مول وڭتۇستىكتە دە ەشكىمگە ايتپاي-اق قايىرىمدى ىستەر اتقارىپ جۇرەتىن ازاماتتار بار. سونىڭ ءبىرى پارلامەنت ءماجىلىسىنىڭ دەپۋتاتى ءساۋىرباي ەسجانوۆ. ءارىسىن ايتپاعاندا, بەرىدە سيدنەي وليمپياداسىندا قازاقتىڭ داڭقىن ايداي الەمگە جايعان بەكزات پەن مۇقتارحانداي ەرلەرى بار وڭتۇستىك بوكسى كەيىنگى جىلدارى قوجىراڭقىراپ كەتتى. ال تالانتتارىمىزدىڭ تۇما بۇلاعىن جاسوسپىرىمدەر اراسىندا وتەتىن جارىستار اشادى. وسىنى باعامداعان ءساۋىرباي كولباي ۇلى قازىعۇرت اۋدانىندا بوكستان وبلىستىق جارىستىڭ تۇساۋىن كەسكەن. بيىل ەردىڭ جاسى ەلۋگە تولعان ايتۋلى ازاماتتىڭ جۇلدەسىنە ارنالعان 1996-1997 جىلدارى تۋعان ءجاسوسپىرىمدەر اراسىنداعى VII حالىقارالىق تۋرنير شىمكەنتتەگى جەڭىل اتلەتيكا مانەجىندە ءوتتى.
تەحنيكالىق دەلەگاتى حالىقارالىق دارەجەدەگى ايبا تورەشىسى, قازاقستاننان شىققان تۇڭعىش الەم چەمپيونى, رەسەيدەن ارنايى شاقىرىلعان قوناق – ۆالەري راچكوۆ. باس تورەشى – ايبا تورەشىسى ن. باتىروۆ.
قازاق دالاسى تالانتتارعا باي. ونى شىمكەنت تورىندە كەرىلگەن شارشى الاڭنان بايقادىق. جارىستىڭ ءبارىن شولماي, ەكى-ءۇش تالانتتى بوكسشىعا توقتالا كەتسەك, 46 كەلى سالماقتاعى وزبەكستاندىق بوكسشى ەلدار سارىباەۆتىڭ ۇرىس مانەرى ەستە ەرەكشە قالدى. بويى, قولى ۇزىن, شارشى الاڭدى جاقسى كورەدى, قارسىلاسىنىڭ ويىن تەز وقيدى. شابۋىلىنىڭ الدىن وراپ كەتەدى. سىناپتاي سىرعيدى. ساۋاتتى. ءدال ۇرادى.
وزبەكستان بوكسشىلارى تەحنيكالىق دايىندىققا دەنە قۋاتىن جاقسى قوساتىندىعىن بۇرىن دا بايقاپ جۇرەتىنبىز. شىرشىق قالاسىنان كەلگەن ەلدار “وزدەرىڭىزدىڭ باۋىرلارىڭىزبىن عوي”, دەگەندەي پىشىنىمەن تانىلىپ ەدى. تۇيسىگىمىز الداماپتى. قازاق ەكەن. جاتتىقتىرۋشىسىمەن سويلەستىك. “البان, ونىڭ ىشىندە قوڭىر بورىك”, دەيدى ءبىز يلانبايتىنداي. وزبەكستان بوكسى بىزگە تالاي تالانتتى قازاق بوكسشىلارىن سىيلاعان. ول – جاستار اراسىنداعى الەم چەمپيونى مارات قياسوۆ, ول – ەرەسەكتەر اراسىنداعى الەم چەمپيونى ەردوس جاڭابەرگەنوۆ, ول – بەيجىڭ وليمپياداسىنىڭ جەڭىمپازى باقىت سارسەكباەۆ.
س.ەسجانوۆتىڭ تۋرنيرىنە ارنايى كەلگەن قازاقستان بوكس قۇراماسىنىڭ باس باپكەرى مىرزاعالي ايتجانوۆتىڭ سارىباەۆ تۋرالى سىر تارتقانىنان ەلداردىڭ دا تۋعان جەرگە ەرتە مە, كەش پە ورالاتىندىعىن توپشىلادىق.
جاعىمدى اسەر قالدىرعان بوكسشىلاردىڭ ءبىرى 66 كەلى سالماقتا جەڭىمپاز بولعان شىمكەنتتىك ەسەن بەكبولات. بۇل جىگىت قازىردىڭ ءوزىندە الەم چەمپيوناتىنىڭ ولجاسىنا تالاسۋعا دايىن سەكىلدى. ال اسا اۋىر سالماقتا قارسىلاسىپ, ەكىنشى راۋندتا ەكى رەت نوكداۋنعا جىبەرىپ, ايقىن باسىمدىقپەن ۇتقان, قولى اۋىر قۇرمانتاي نۇروۆ تۋرالى داڭقتى بوكسشىمىز مۇحتارحان دىلدابەكوۆ جۇزىندە نۇر ويناپ اڭگىمەلەگەن. “بوكسقا كەلگەنىنە ەكى-ءۇش اي عانا, كوپ جاتتىقتىرۋشىلارىمىز بالامىزدى تالدىرىپ تاستايدى», دەپ سپاررينگكە قويمايدى”, دەيدى. مۇحتارحاننىڭ ءوزى ۇلكەن بوكسقا 18 جاسىندا كوكپاردان كەلگەنى بۇگىندە كوپكە ءمالىم.
قازاقشا قۇلاشتاپ ۇراتىن قۇرمانتاي مۇحتارحان اعاسىنداي الەم چەمپيوناتى, وليمپيا ويىندارىنىڭ فينالىندا ويناپ جاتسا, قازاقتىڭ بورىكتى اسپانعا اتاتىن كەزى عوي.
ءتورت كۇنگە سوزىلعان جارىس مارەسىنە جەتتى. جاقىنبەك رايىمبەك (44 كگ), ەلدار سارىباەۆ (46 كگ), ابىلقاسىم بەكجان (48 كگ), ناۋرىزبەك اباەۆ (50 كگ), جالولوددين مويلينوۆ (52 كگ), راۋان زاتۋللا (54 كگ), دۋلات جۇمابەك (57 كگ), ازامات امانگەلدى (60 كگ), نۇرداۋلەت ءوسپانالى (63 كگ), ەسەن بەكبولات (66 كگ), بيبولات ءدىنيسلام (70 كگ), باقرامبەك رامازان (75 كگ), الىشەر ءابدىراشيتوۆ (80 كگ), ال ەڭ اۋىر سالماقتا قۇرمانتاي نۇروۆ التىننان القا تاقتى.
جەڭىمپازداردى وڭتۇستىكتە ارنايى ساپارمەن جۇرگەن پارلامەنت ءماجىلىسىنىڭ دەپۋتاتتارى ماراپاتتادى. ءسات توقپاقباەۆ اق تىلەگىن ايتتى. ءساۋىرباي ەسجانوۆ جەڭىمپازدار مەن ءجۇلدەگەرلەرگە جۇلدە تاپسىرىپ, الەم چەمپيونى ۆالەري راچكوۆقا ارنايى سىي-سياپات جاسادى.
جارىس بارىسىندا كوپتەگەن تالانتتى جاسوسپىرىمدەر بايقالدى. داڭقتى سپورتشىلار وتكەن جول وسى. تاي-قۇناندار بايگەسىنەن كەيىن كۇنى ەرتەڭ تالاي قۇلاگەرلەردىڭ قارا ءۇزىپ شىعاتىندىعى ءسوزسىز عوي.
باقتيار تايجان.
شىمكەنت.