اپتا ءفيلمى: «كوكونىڭ قۇپياسى»

جىل: 2017

ەل: اقش

رەجيسسەر: لي انكريچ, ەدريان مولينا

باستى رولدەردە: ەنتوني گونسالەس, گاەل گارسيا بەرنال, بەندجامين برەتت, الاننا يۋباك, رەنە ۆيكتور, حايمە كاميل, الفونسو اراۋ, حەربەرت سيگەنسا, گابريەل يگلەسياس, لومباردو بويار

ستسەناري: لي انكريچ, ەدريان مولينا, مەتتيۋ ولدريچ

كومپوزيتور: مايكل دجاككينو

پروديۋسەر: دجون لاسسەتەر, دارلا ك. اندەرسون

جانر: كومەديا, فەنتەزي, دەتەكتيۆ, وتباسىلىق, قىزىق وقيعالى, مۋلتفيلم, ميۋزيكل

الەمدىك پرەمەرا: 30 قازان 2017

قازاقستانداعى پرەمەرا: 23 قاراشا 2017

جاس شەكتەۋى: PG - اتا-انالاردىڭ قاداعالاۋى ۇسىنىلادى

ۇزاقتىعى: 109 مينۋت

فيلم سيۋجەتى جان-تانىمەن مۋزىكانت بولعىسى كەلەتىن 12 جاسار ميگەل ەسىمدى بالانىڭ ارمانىنا قۇرىلعان. ميگەلدىڭ ارمانى مەكسيكادا اتى اڭىزعا اينالعان ءانشى ەرنەستو دە لا كرۋستىڭ ءىزىن جالعاستىرۋ. ال ونىڭ وتباسىندا مۋزىكاعا تىيىم سالىنعانى سونداي, ءۇيدىڭ ىشىندە ءبىر دە ءبىر نوتانىڭ دىبىستالماۋى قاتاڭ باقىلانادى. وتباسى ەتىكشىلىكتى اتا كاسىپ سانايدى, وسى سەبەپتى دە بالا ميگەل اسقاق ارمانىنان باس تارتىپ, وتباسىلىق كاسىپكە مويىنسۇنۋدىڭ از-اق الدىندا. بۇل قالادا «ولگەندەر كۇنى» مەيرامىندا قايتىس بولعانداردىڭ ارۋاقتارى وزدەرىن ءاردايىم ەسكە تۇتىپ جۇرەتىن تۋىستارىنىڭ ۇيىنە كەلەدى دەگەن سەنىم تۇراقتاعان. سونداي كۇندەردىڭ بىرىندە ميگەل الدەقاشان و دۇنيەلىك بولىپ كەتكەن اتا-بابالارىن كەزدەستىرىپ قالادى. وسىلايشا ايگىلى ءانشىنى ىزدەستىرىپ تابۋعا جولعا شىعادى. مۋلتفيلم سيۋجەتى ءار ارەكەتتىڭ ارمانعا جاسالعان ماڭىزدى قادام ەكەنىن ۇقتىرىپ, كورەرمەندى سىرتتاي تىلەكشى ەتىپ قويادى.

Pixar ستۋدياسىنىڭ سۋرەتشىلەرى بۇل جولى ولىلەر مەكەنىن تاقىر دالاعا اينالدىرىپتى. تەك ءار بۇرىشتان قىلتيعان قىرمىزى گۇلدەرىن تەگىن ءوسىپ تۇر دەپ ويلاپ قالماڭىز. مەكسيكادا بۇل گۇلدىڭ جۇپار ءيىسى ارۋاقتارعا جاقىندارىنىڭ ءۇيىن اداسپاي تابۋعا كومەكتەسەدى دەگەن سەنىم قالىپتاسقان. ال فيلمدەگى باس كەيىپكەردىڭ ءبىرى دانتە اتتى ءيتتىڭ بەينەسى ءۇشىن دە سۋرەتشىلەر از ەڭبەكتەنبەگەن. ماسەلەن, جانۋاردىڭ مىنەزى مەن اناتومياسىن يگەرۋ ءۇشىن ستۋدياعا كسولويتتسكۋينتلي پوروداسىنا جاتاتىن ءيتتى ارنايى الدىرتىپتى. مۇنداي يتتەردىڭ دەنەسى ءجۇنسىز كەلەدى ءارى تىستەرى ساناۋلى بولعاندىقتان ۇنەمى دەرلىك تىلدەرى سالاقتاپ جۇرەدى. سونىمەن بىرگە فيلمدە مايا, اتستەك ميفولوگياسىندا ءيتتىڭ وت پەن نايزاعاي قۇدايى كسولوتل رەتىندە اتالاتىندىعى ەسەپكە الىنعان.

مۋلتفيلمدەگى سانتا-سەسيليا تۇرعىندارىنان باستاپ و دۇنيەدەگى ەرنەستو دە لا كرۋستىڭ كەشىنە جينالعان قوناق-قاڭقالاردىڭ كيىمى مەكسيكالىق بيشىلەردىڭ ۇلگىسىنەن ناقپا-ناق كوشىرىلگەن. كارتيناداعى جان-جاقتى زەرتتەلىپ بارىپ جازىلعان اڭگىمەلەر مەن تولىمدى كەيىپكەرلەر بەينەسى سىنشىلار تاراپىنان وڭ باعاعا يە بولدى.

سيۋجەتتىڭ ءون بويىندا مەكسيكا حالىقتارىنىڭ سالت-ءداستۇرى جاتقانى تۋرالى فيلم رەجيسسەرىنىڭ مىنا ءسوزى اڭعارتادى.

«كارتينانى تۇسىرەمىز دەپ شەشكەن كۇنى العاشقى ەكسپەديتسيا جاساعىن قۇردىق. ءۇش جىل بويى مۋزەيلەردى, شىركەۋلەردى, شەبەرحانالاردى, بازالاردى, مەحيكو, واحاكەدەگى مولالاردى تۇگەل ارالادىق. تلاكولۋلا, ەل-تۋلە, سان-ماركوس, اباسولو تۇرعىندارىمەن تىلدەسىپ, ءومىر ءسۇرۋ سالتى, سۇيىكتى اسى تۋرالى سۇراپ بىلدىك. ەڭ باستىسى ولاردىڭ وتباسىنا دەگەن شەكسىز سۇيىسپەنشىلىكتەرىنە كۋا بولدىق», دەيدى لي انكريچ ءوزىنىڭ سۇحباتىندا.

«بولاشاق» كورپوراتيۆتىك قورىنىڭ باستاماسىمەن قازاق تىلىنە دۋبلياجدالعان فيلم بۇگىننەن باستاپ ەل كينوتەاترلارىندا كورسەتىلىپ جاتىر. انيماتسيالىق ءفيلمنىڭ دۋبلياج رەجيسسەرى شاح-مۇرات ورداباەۆتىڭ ايتۋىنشا, دۋبلياج جۇمىستارىنا 70-كە جۋىق مامان جۇمىلدىرىلعان.

ايا ءومىرتاي,

«ەگەمەن قازاقستان»