ءوز اناڭ بويىڭا بەرگەن قۋات, تابيعات سىيلاعان تالانتپەن ۇشتاسسا, وندا ادامنىڭ باعى جانىپ, جۇلدىزى بيىكتەن كورىنەدى. قاناتتى قىرانداي كوككە سامعاپ, كورگەن كوزدى دە سۇيسىندىرەدى. مىنە, سونداي تالانتتى ازاماتتاردىڭ قاتارىنان تابىلىپ كەلە جاتقان قازاقستاننىڭ حالىق ءارتىسى, ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ كوركەمدىك جەتەكشىسى, «قۇرمەت» جانە «پاراسات» وردەندەرىنىڭ يەگەرى, پروفەسسور, تەاتر جانە كينو رەجيسسەرى تالعات تەمەنوۆتىڭ ءار جىلدارداعى جەتىستىگى جۇرتتى سۇيسىندىرۋمەن كەلەدى.
ول جاقىندا عانا «مادەنيەت قايراتكەرى» اتالىمى بويىنشا «التىن ادام» قۇرمەتتى اتاعىنا لايىق دەپ تانىلدى. بۇل ماراپات كۇنى كەشە عانا الماتىداعى اباي اتىنداعى مەملەكەتتىك اكادەميالىق وپەرا جانە بالەت تەاترىندا تابىس ەتىلدى. وسى ارادا بۇل اتاق تۋرالى از-كەم مالىمەت بەرەر بولساق, «التىن ادام» فەستيۆالى – «جىل تاڭداۋى» حالىقارالىق مارتەبەگە يە جانە تمد مەملەكەتتەرىنىڭ 5 ەلىندە: قازاقستان, قىرعىزستان, وزبەكستان, ۋكراينا, بەلورۋسسيادا ءوتىپ كەلەدى. «التىن ادام» ۇلتتىق جوباسى – ساياساتتاندىرىلماعان تاۋەلسىز جوبا بولىپ سانالاتىنىن دا ەسكە سالا كەتەيىك.
تابيعات بەرگەن تالانتىمەن ءوز وتانداستارىمىزدى ەمەس, الەم جۇرتشىلىعىنىڭ دا نازارىن اۋدارىپ, كوركەم دۇنيەلەرىمەن كوپتىڭ كوڭىلىنەن شىعا العان تالعات تەمەنوۆتىڭ «ادامدار اراسىنداعى بولتىرىك» اتتى تولىق مەتراجدى كوركەم ءفيلمى ماينداعى فرانكفۋرت قالاسىندا وتكەن 15 حالىقارالىق كينوبايگەسىنىڭ گران-پري, يتاليادا «كۇمىس ايۋ» جۇلدەسىنە سول سەكىلدى پورتۋگاليادا وتكەن حالىقارالىق كينوفەستيۆالدىڭ ارنايى جۇلدەسىنە يە بولعان ەدى.
ءوزى ستسەناريىن جازىپ, ءوزى قويعان كوركەم فيلمدەرى قاتارىندا «شاڭىراق», «قايداسىڭ سەن, چاپاي؟», «تورو», «قىزعىش قۇس», «ماحاببات بەكەتى» بولسا, «الما باعى», «كوگىلدىر تاكسي» (س.سماتاەۆپەن بىرىگىپ), «اققۋدىڭ كوز جاسى» سىندى پەسالار جازىپ, ساحنالاندى. تالعات دوسىمعالي ۇلى تەك كينو جانە تەاتر رەجيسسەرى بولۋىمەن قاتار قالىڭ جۇرتشىلىققا جازۋشى رەتىندە دە جاقسى تانىس. ونىڭ «قايىرلى تاڭ», «گۇلناز», «وي جاسىن» اتتى پوۆەستەر مەن اڭگىمەلەر جيناعى وقىرماندارىنىڭ ءىلتيپاتىنا بولەنىپ كەلەدى.
رەجيسسەر 2017 جىلى ش.ايتماتوۆتىڭ «قىزىل ورامالدى شىنارىم» اتتى شىعارماسىن ساحنالادى. «اققۋدىڭ كوز جاسى» دەپ اتالعان سپەكتاكلى ءى دۇنيەجۇزىلىك «استانا» تەاتر فەستيۆالىندە كورسەتىلدى. بۇل ەڭبەك كەلەسى جىلى لوندوندا وتەتىن ش.ايتماتوۆتىڭ 90 جىلدىق مەرەيتويىنا ارنالعان حالىقارالىق ونەر بايگەسىنە شاقىرتۋ الىپ وتىر. ال ء«بىزدىڭ قالانىڭ كىشكەنتاي حانزاداسى» كينوكارتيناسى پروكاتقا شىعىپ, يالتادا, قازاندا, شانحايدا وتكەن حالىقارالىق كينوفەستيۆالدە كورسەتىلەدى. ونەر تارلانى الەمدىك ونەر قايراتكەرلەرىنىڭ قاتارىندا جارىق كورگەن تۋىندىلاردى ساراپتايتىن قازىلار القاسىنىڭ قۇرامىندا بولىپ, ءوزىنىڭ ءبىلىم-بىلىگىن تانىتىپ ءجۇر.
ءسوزىمىز جالاڭ بولماس ءۇشىن مىسال كەلتىرەر بولساق ول حالىق قاھارمانى ءا.مامبەتوۆتىڭ 85 جىلدىعىنا ارنالعان «ساحنادان سالەم!» V حالىقارالىق تەاتر جانە VI ەتنيكالىق تەاترلار, كاسپي جاعالاۋى ەلدەرىنىڭ تەاتر فەستيۆالدەرىنە قازىلار القاسىنا توراعالىق ەتتى. قىرعىزستانداعى «ارت-وردو» حالىقارالىق تەاتر فەستيۆالىندە قازىلار القاسىنىڭ مۇشەسى, حالىقارالىق ەۋرازيا كينوفەستيۆالىندە نەگىزگى اتالىم بويىنشا ساراپشىلار القاسىنىڭ قۇرامىندا قىزمەت ەتتى. ءبىر سوزبەن ايتقاندا, ءتىل قۇدىرەتىن ۇعىنىپ, ءسوز ۇستاعان, كينو مەن تەاتر الەمىن جەتىك مەڭگەرىپ, كوركەم تۋىندىلار بەرگەن, تابيعاتقا تارتىپ تۋعان تالعات تەمەنوۆتىڭ دە قازاق ونەرىندە وزىندىك قولتاڭباسى بار. ونى وقىرماندار دا, كورەرمەندەر دە باعالاپ كەلەدى.
سۇلەيمەن مامەت,
«ەگەمەن قازاقستان»