«ماككابي» كومانداسىنىڭ كاپيتانى شەران يەيني ايتۋىنشا, «استانا» ەكىجاقتى كەزدەسۋدە فاۆوريت الايدا, جاعدايدى تولىققاندى ءوز قولىنا الىپ, جەڭىسكە جەتكىسى كەلەدى. بۇل تۋرالى ول ءباسپاسوز ءماسليحاتىندا ايتتى.
– ماتچتىڭ قانداي ەسەپپەن اياقتالاتىنىن بىلمەيمىن. بىراق كۇپتى كوڭىلىمىز وتكەن ويىندا قالدى دەپ ۇمىتتەنەمىن. ءوز الاڭىمىزدا ەندى ەسە قايتارۋ ءۇشىن بارىمىزدى سالامىز.
– سوڭعى كەزدەرى جانكۇيەرلەرىڭىز ءجيى سىنعا الىپ ءجۇر...
– بۇل تۇسىنىكتى عوي, ولار كوماندادان تەك جاقسى ناتيجە كۇتەدى. ءبارىمىزدىڭ 100% بەرىلىپ ويناعانىمىزدى قالايدى. ارينە, ءار كەزدەسۋدە جەڭىسكە جەتۋ ءۇشىن ءبىز دە ايانىپ قالمايمىز.
– كوماندا سوڭعى كەزدەرى كوپ گول جىبەرەتىن بولىپ ءجۇر. مۇنىڭ سەبەبى نەدە دەپ ويلايسىز؟
– قورعانىستا ساق ويناپ, شابۋىلدى ناتيجەلى اياقتاۋ – كوماندانىڭ باستى مىندەتى. ءبىز بىرگە قورعانىپ, بىرگە شابۋىلعا شىعامىز. سوندىقتان بۇل ولقىلىعىمىزدى تەك ءبىر پوزيتسياداعى ويىنشىلارعا جابا سالۋ دۇرىس ەمەس.
– «استانانى» بۇل كەزدەسۋدە فاۆوريت دەپ ەسەپتەيسىز بە؟
– سوڭعى كەزدەسۋگە قاراپ, ەكى كوماندانىڭ دەڭگەيىن سالىستىرساق, وندا بۇل ويىندا «استانا» ءسوزسىز فاۆوريت. بىراق, جاعدايدى تولىققاندى ءوز قولىمىزعا الىپ, جەڭىسكە جەتكىمىز كەلەدى. ءبىز بۇل كەشتە جانكۇيەرلەر كۇتكەن ويىندى كورسەتە الامىز. «ۆيلياررەالمەن» بولعان كەزدەسۋدە ءوزىمىزدى قۇددى ءوز ۇيىمىزدە ويناپ جاتقانداي سەزىندىك. ەرتەڭ دە جانكۇيەرلەر بارىنشا قولداۋ كورسەتەدى دەگەن سەنىمدەمىن.
– باپكەرىڭىز كوماندادا بىرنەشە ويىنشىنىڭ جاراقات الىپ قالعانىن ايتتى...
– فۋتبولدا باستىسى فۋتبولشىلاردىڭ ءبىر-ءبىرىن ءتۇسىنىپ ويناۋى. ەگەر قاتاردان بىرەۋ شىعىپ قالسا, ورنىن تولتىرۋىمىز كەرەك. ءبىزدىڭ مىندەتىمىز بۇل پروتسەستى نەعۇرلىم تەزىرەك اياقتاۋ.
الماس ماناپ, «ەگەمەن قازاقستان» – نەتانيادان (يزرايل)