ورتالىق كوممۋنيكاتسيالار قىزمەتىندەگى كەزەكتى ءباسپاسوز ءماسليحاتىنا الماتى وبلىسىنىڭ اكىمى اماندىق باتالوۆ قاتىستى. وندا ءوڭىر باسشىسى بيىلعى توعىز ايداعى الەۋمەتتىك-ەكونوميكالىق دامۋ قورىتىندىلارى مەن مەملەكەتتىك باعدارلامالاردىڭ جۇزەگە اسۋى تۋرالى باياندادى.
ءوڭىر باسشىسىنىڭ ايتۋىنشا, ەلباسى نۇرسۇلتان نازارباەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىندا جۇكتەلگەن جانە ايماق تۇرعىندارىنىڭ ءال-اۋقاتىن ارتتىرۋ باعىتىنداعى تاپسىرمالار ويداعىداي ورىندالىپ, قارقىندى ىلگەرىلەۋگە قول جەتكىزىلگەن. وڭ ديناميكا بارلىق سەكتورلاردا بايقالادى.
«ونەركاسىپتىڭ ءوسىمى 4,3 پايىزدى قۇراسا, بيىلعى قاراجات كولەمى 700 ملرد تەڭگەدەن اسادى. جەتىسۋ ءوڭىرى شىرىندار مەن الكوگولسىز سۋسىنداردىڭ نەگىزگى ءوندىرۋشىسى بولىپ تابىلادى, بىزدە جىلىنا 1 ملرد ليترگە دەيىن ءونىم وندىرەدى. يندۋستريالاندىرۋ كارتاسى اياسىندا فارماتسەۆتيكانىڭ جاڭا سالاسى قۇرىلعانىن ماقتانىشپەن جەتكىزەمىن. 9 فارماتسەۆتيكالىق زاۋىتتىڭ ءوندىرىس كولەمى ەسەپتى مەرزىمدە 2 ەسەدەن استام ءوسىپ, 13 ملرد تەڭگەگە دەيىن جەتتى. سونىمەن قاتار «قايرات» يندۋستريالىق ايماعىنىڭ ينفراقۇرىلىمىن سالۋ باستالدى. ونەركاسىپتىك ايماقتاردا بارلىعى 17 كاسىپورىن جۇمىس ىستەيدى», دەدى اماندىق عابباس ۇلى.
اكىم ينۆەستيتسيا تارتۋ ماقساتىندا جىل باسىنان بەرى 9 بيزنەس-كەزدەسۋ وتكەنىن, 7 ەلدىڭ وڭىرلەرىمەن, كومپانيالارىمەن مەموراندۋمدار مەن كەلىسىمدەر جاسالعانىن اڭگىمەلەدى. ينۆەستورلار, اسىرەسە قورعاس-شىعىس قاقپاسىنا ايتارلىقتاي قىزىعۋشىلىق تانىتقان. ناتيجەسىندە, جالپى قۇنى 644 ملرد تەڭگە بولاتىن 24 جوبا جوسپارلانعان ەكەن. جالعاسىپ كەلە جاتقان جۇمىستاردىڭ قورىتىندىسىنان ينۆەستيتسيالاردىڭ ءوسۋىن اڭعارۋ قيىن ەمەس.