باتىس قازاقستان وبلىسىنداعى شىڭعىرلاۋ اۋدانىنىڭ ورتالىعىندا مادەنيەت جانە دەمالىس ساياباعىندا ۇستازعا ەسكەرتكىش قويىلدى.
مۇعالىمدەر كۇنى قارساڭىندا اشىلعان بۇل ەسكەرتكىشتىڭ يدەياسى اۋدانداعى ءبىلىم سالاسى ارداگەرلەرىنەن شىعىپتى. باستامانى بارشا جۇرت قولداپ, اۋدانداعى ءبىلىم سالاسى قىزمەتكەرلەرى بىركۇندىك ەڭبەكاقىسىن اۋدارعان. تۋىندىنى اۋدانداعى تالاي ەسكەرتكىشتى سومداپ شىققان شەبەر زاكىرجان يسلامبەكوۆ جاساعان.
ەسكەرتكىشتىڭ اشىلۋ سالتاناتى شىڭعىرلاۋ اۋدانىنىڭ 89 جىلدىق تويىمەن تۇسپا تۇس كەلدى. سالتاناتتى شاراعا قۇشاق-قۇشاق گۇل ۇستاعان ۇستازدار كوپ جينالدى. تارىداي تىرشىلىك يەسىن تاۋداي تۇلعاعا اينالدىراتىن ۇلاعاتتى ۇستازعا ارنالعان مۇنداي ەسكەرتكىش بۇكىل ورال وڭىرىندە جوق ەدى. ءاربىر ادام بالاسى باس يەر اياۋلى جان – مۇعالىمنىڭ شىڭعىرلاۋداعى ءمۇسىنى جيىنتىق وبراز تۇرىندە بەينەلەنگەن. وقۋشى جەتكىنشەكتى جەتەلەپ, وڭ قولىمەن يىعىنان دەمەپ تۇرعان مۇعاليما الىس قيىرعا كوز تاستاعان. سول قولىندا – سىنىپ جۋرنالى. ال ءبۇلدىرشىننىڭ قولىندا – ءبىر شوق گۇل.
– ەلباسى نۇرسۇلتان نازارباەۆ ەلدىك دامۋ, ۇلتتىق بىرەگەيلىگىمىز تۇرعىسىنداعى «تۋعان جەر» باعدارلاماسىندا ءاربىر قازاقستاندىقتىڭ ءوز ەلىنە, جەرىنە دەگەن پاتريوتتىق سەزىمىن ارتتىرىپ, تۋعان اۋىلىنىڭ دامۋىنا ءوز ۇلەسىن قوسۋعا شاقىرعان بولاتىن. مىنە, بۇگىن جەرگىلىكتى ازاماتتاردىڭ كۇشىمەن ۇستازداردىڭ قۇرمەتىنە ارنالعان ەسكەرتكىش بوي كوتەردى. ءبىز بۇل كومپوزيتسيانى «عاسىر عالاماتى – ۇستاز» دەپ اتادىق. بۇل بۇكىل ادامزات بالاسىن ادالدىققا, ادامگەرشىلىككە, ۇلى دوستىققا, بەيبىتشىلىك پەن بىرلىككە تاربيەلەپ, بىلۋگە, ءىلىم الەمىنە شاقىرعان ۇستازداردىڭ ۇلى ەڭبەگىنە, ۇلى تۇلعاسىنا قويىلعان ەسكەرتكىش بولماق. مۇنداي ەسكەرتكىشتى ءبىز رەسپۋبليكا بويىنشا العاشقىلاردىڭ ءبىرى بولىپ ورناتىپ وتىرمىز, – دەدى شىڭعىرلاۋ اۋدانىنىڭ اكىمى البەرت ەساليەۆ.
ۇستازعا ارنالعان ەسكەرتكىشتى ى.التىنسارين اتىنداعى توسبەلگى, قازاقستان رەسپۋبليكاسىنىڭ ءبىلىم جانە عىلىم مينيسترلىگىنىڭ «قۇرمەت گراموتاسى», اۋدان اكىمىنىڭ «ۇزدىك مۇعالىم» نوميناتسياسىنىڭ يەگەرى ەلميرا ساپاشەۆا, شىڭعىرلاۋ ورتا مەكتەبىنىڭ 11-سىنىپ وقۋشىسى, «التىن بەلگى» ۇمىتكەرى دينارا اكبالەەۆا, ل.قىلىشەۆ اتىنداعى ءشيلى ورتا مەكتەبىنىڭ 10-سىنىپ وقۋشىسى, «ۇزدىك اتتەستات» يەگەرى دياس ساعىنعاليەۆ اشتى. مەكتەپ وقۋشىلارى ۇستازدىق پەن ۇلىلىق تۇرعىسىندا تاقپاقتارىن ارناپ, جاس ونەرپازدار دومبىرادان كۇي توكتى.
بيىلعى وقۋ جىلىندا شىڭعىرلاۋ اۋدانىندا جالپى ءبىلىم بەرەتىن 16 مەكتەپ جۇمىس ىستەيدى. وندا 1972 وقۋشى ءبىلىم الىپ جاتىر. 2016-2017 وقۋ جىلىنىڭ قورىتىندىسى بويىنشا اۋداندا 6 تۇلەك «التىن بەلگى», 1 وقۋشى «ۇزدىك اتتەستات» يەگەرى اتانعان بولاتىن.
قازبەك قۇتتىمۇرات ۇلى, «ەگەمەن قازاقستان» باتىس قازاقستان وبلىسى