بۇگىن ۇكىمەت وتىرىسىندا قر پرەمەر-ءمينيسترى باقىتجان ساعىنتاەۆ «نۇرلى جەر» تۇرعىن ءۇي قۇرىلىسى باعدارلاماسى بويىنشا وڭىرلەردە تۇرعىن ۇيلەردى حالىقتىڭ سۇرانىسى بويىنشا سالۋ قاجەتتىگىن ايتىپ, وبلىس باسشىلارىنا ەسكەرتۋ جاسادى.
«اتالمىش باعدارلامانىڭ ستاتيستيكاسىنا جۇگىنسەك, وڭىرلەردىڭ اراسىندا انتي پروپورتسيا بار ەكەنىن بايقايمىز. ياعني جوسپارلاۋ دۇرىس جۇرگىزىلىپ جاتقان جوق. وتكەن اپتانىڭ سارسەنبىسى كۇنى (قر پارلامەنتى ءماجىلىسىنىڭ جالپى وتىرىسىندا – اۆتور) دەپۋتتار حالىق تىعىز قونىستانعان وڭىرلەرگە مەكتەپتى از سالامىز دا, ال حالىق از وڭىرگە كەرىسىنشە ىستەيمىز دەپ ەسكەرتكەن ەدى», - دەدى ۇكىمەت باسشىسى.
وسى ورايدا باقىتجان ساعىنتاەۆ اتالعان جاعدايدىڭ «نۇرلى جەر» باعدارلاماسىن ورىنداۋ بارىسىندا دا قايتالانىپ وتىرعانىنا رەنىش ءبىلدىردى.
«نە بولدى؟ الماتى وبلىسىندا پاتەر الۋعا 37 مىڭعا جۋىق ادام كەزەكتە تۇر. وڭىردە جىلدىق جوسپار بويىنشا 82 پاتەر سالۋ قاراستىرىلعان. ال قاراعاندى وبلىسىندا پاتەر الۋعا 35 مىڭ ادام كەزەكتە كۇتۋدە. وندا جىلدىق جوسپار بويىشا 387 پاتەر سالىنۋ قاراستىرىلىپتى. ماڭعىستاۋ وبلىسىندا جاعداي كەرىسىنشە. پاتەر الۋعا 17 مىڭ ادام كەزەكتە تۇر, جىلدىق جوسپار بويىنشا 1132 پاتەر سالۋ جوسپارلاعان. اقتوبە وبلىسىندا 26 مىڭ ادام كەزەك كۇتۋدە. جىلدىق جوسپار بويىنشا 2 600 پاتەر سالۋ قاراستىرىلعان. وسى جاعدايدى شەشۋ كەرەك. ارينە, وڭىرلەردە تۇرعىن ۇيلەردىڭ كوپ سالىنعانى جاقسى. بىراق پاتەرگە سۇرانىس كوپ وڭىرلەردە مۇلدەم قۇرىلىس ءجۇرىپ جاتقان جوق. بۇلاي بولماۋى كەرەك. اسقار ۇزاقباي ۇلى (اسقار مامين, قر پرەمەر-ءمينيستىرىنىڭ ورىنباسارى – اۆتور) ماسەلەنى باقىلاۋعا الىڭىز», - دەدى ۇكىمەت باسشىسى.