گۇلشارا ابدىقالىقوۆا ەىدۇ باس حاتشىسىمەن كەزدەستى

كەزدەسۋ بارىسىندا قازاقستاننىڭ ەىدۇ-مەن ءوزارا ءىس-قيمىل ورناتۋ, ەلىمىزدىڭ ەكونوميكالىق ءوسىمىنىڭ جاڭا مودەلىن قالىپتاستىرۋ جاعدايىندا ادامي كاپيتالدى دامىتۋ, سونداي-اق گەندەرلىك تەڭدىكتى ىلگەرىلەتۋ ماسەلەلەرى تالقىلاندى.

گ.ابدىقالىقوۆا نۇرسۇلتان نازارباەۆ تاراپىنان ەلىمىزدىڭ الەمدەگى وزىق دامىعان 30 مەملەكەتتىڭ دەڭگەيىنە كوتەرىلۋ جانە ەىدۇ-عا مۇشە بولۋ مىندەتى قويىلعانى جونىندە اتاپ ءوتتى. قازاقستان ءۇشىن ەىدۇ-مەن ىنتىماقتاستىق ستراتەگيالىق باسىمدىق جانە ول باسەكەگە قابىلەتتىلىكتىڭ ەۋرازيالىق باعدارلاماسى اياسىندا 2008 جىلدان باستاپ جۇزەگە اسىرىلۋدا.

2015 جىلى ەىدۇ-مەن ىنتىماقتاستىق باعدارلاماسىنا قول قويىلدى. ەىدۇ-نىڭ ۇزدىك تاجىريبەلەرى مەن ۇسىنىمدارىن يمپلەمەنتاتسيالاۋ ءۇشىن ءۇشىنشى جاڭعىرۋ اياسىندا ۇلتتىق جول كارتاسى بەكىتىلدى, وندا 535 ۇسىنىم قاراستىرىلعان.

قازاقستان مەملەكەتتىك باسقارۋدى جاڭعىرتۋعا كىرىسىپ, كونستيتۋتسيالىق رەفورما جۇرگىزدى. «تسيفرلى قازاقستان» باعدارلاماسى ازىرلەنۋدە. ادامي كاپيتالدى دامۋعا بارىنشا نازار اۋدارىلىپ وتىر. يۋنەسكو-نىڭ ء«بىلىم بەرۋدى دامىتۋ يندەكسى» بويىنشا قازاقستان 10 جىلدان بەرى الەمنىڭ 100-دەن استام مەملەكەتى اراسىنداعى ۇزدىك 8 ەلدىڭ قاتارىندا. ءۇش تىلدىلىك جانە اعىلشىن ءتىلىن كەڭىنەن وقىتۋ ساياساتى جۇرگىزىلۋدە. قازاق ءالىپبيىن كەزەڭ-كەزەڭمەن لاتىن قارپىنە كوشىرۋ جوسپارلانىپ وتىر. قوعامدىق سانانى جەدەل جاڭعىرتۋعا باعىتتالعان «رۋحاني جاڭعىرۋ» جالپىۇلتتىق باعدارلاماسى ىسكە اسىرىلا باستادى.

قازاقستاندا گەندەرلىك تەڭدىك ماسەلەلەرىنە جانە ەل دامۋىنداعى ايەلدەردىڭ رولىنە ەرەكشە ءمان بەرىلىپ وتىر. 2030 جىلعا دەيىنگى وتباسىلىق جانە گەندەرلىك ساياسات تۇجىرىمداماسى ىسكە اسىرىلۋدا. 2016 جىلى پارلامەنتتىڭ تومەنگى پالاتاسى قۇرامىنىڭ 27 پايىزى ايەلدەر بولدى.

سونداي-اق, مەملەكەتتىك حاتشى الماتى قالاسىندا ەۋرازيا اپتالىعىن وتكىزۋ يدەياسىن قولداعانى ءۇشىن باس حاتشىعا العىس ءبىلدىردى. ونىڭ ماقساتى – ورتالىق ازيا جانە ەىدۇ ەلدەرىنەن شىققان ساياسي قايراتكەرلەردى, حالىقارالىق جانە وڭىرلىك ۇيىم ساراپشىلارى مەن وكىلدەرىن بىرىكتىرۋ.

كەزدەسۋ سوڭىندا مەملەكەتتىك حاتشى گ.ابدىقالىقوۆا حالىقارالىق قوعامداستىقتىڭ سەنىمدى ارىپتەسى رەتىندە قازاقستان ەىدۇ-مەن ءوزارا ءىس-قيمىلدى ودان ءارى نىعايتۋ باعىتىن جالعاستىراتىنىن اتاپ ءوتتى.