بەلگىلى سپورت ءجۋرناليسى, 18 كىتاپتىڭ اۆتورى, 20 جىلدان استام ۋاقىت رەسپۋبليكالىق «ەگەمەن قازاقستان» گازەتىنىڭ شىعىس قازاقستان وبلىسىنداعى مەنشىكتى ءتىلشىسى قىزمەتىن اتقارعان وڭداسىن ەلۋباي شىعارماشىلىعىنا 50 جىل تولۋىنا وراي زايسان اۋدانىنا ارنايى بارىپ, جەرلەستەرىمەن جۇزدەسىپ قايتتى.
ءبىر ەمەس, بىرنەشە وليمپياداعا, الەم چەمپيوناتتارىنا بارعان جيھانكەز جۋرناليست ەڭ اۋەلى ءوزى تۋىپ-وسكەن سارجىرا اۋىلىنداعى مەكتەپتە ەلدىمەكەن جۇرتشىلىعىمەن, ءبىلىم ورداسىنىڭ ۇستازدارىمەن جانە وقۋشىلارمەن كەزدەسىپ, ەمەن-جارقىن اڭگىمە-دۇكەن قۇردى. «قايدا جۇرسەم دە سارجىرامدى اڭساپ تۇرامىن. بالا كەزىمىزدە مىنا ىرگەدەگى موجىك وزەنىنە بارىپ سۋعا تۇسەتىنبىز» دەپ بالالىق بال شاعىن ساعىنا ەسكە الىپ, مەكتەپ كىتاپحاناسىنا ءوزىنىڭ جانە باسقا دا اقىن-جازۋشىلاردىڭ 50 كىتابىن سىيعا تارتتى. ءبىر جىلدارى اۋىل مەكتەبىنە جابىلۋ قاۋپى تونگەندە و.ەلۋباي ءبىلىم ورداسىن امان ساقتاپ قالۋعا ۇلەس قوسقان ەكەن. سودان دا بولار پەرزەنتتىك پارىزىنا ادال قالامگەردى اۋىل تۇرعىندارى قۇشاق جايا, شاشۋمەن قارسى الىپ, جىلى لەبىزدەرىن ءبىلدىرىپ, شاپان جاۋىپ, سىي-قۇرمەت كورسەتتى. ال شاعىن عانا اۋىل سارجىرانىڭ بالالارى كەزدەسۋدى ءۇش تىلدە جۇرگىزىپ, شالعايدا جاتسا دا وركەنيەت كوشىنەن قالماي كەلە جاتقاندىقتارىن اڭعارتتى. تۋعان اۋىلىنان كەيىن ارداگەر جۋرناليست زايسان قالاسىنداعى م.داۋلەنوۆ اتىنداعى ورتا مەكتەپتە اۋدان جۇرتشىلىعىمەن كەزدەسۋ وتكىزدى. كەزدەسۋدى اشقان اۋدان اكىمى تەمىربەك قاسىمجانوۆ ەلباسىنىڭ «رۋحاني جاڭعىرۋ» باعدارلاماسى اياسىندا زايسان وڭىرىندە ارنايى باعدارلاما ازىرلەنىپ, ەلگە تانىمال تۇلعالاردىڭ قاتىسۋىمەن بىرقاتار تاعىلىمدى شارالاردىڭ ۇيىمداستىرىلعانىن اتاپ ءوتتى. ء«ساۋىر ايىنان بەرى كوپتەگەن شارالار وتكىزدىك. شىلىكتىنىڭ تۋماسى عازيز ءادىلحاننىڭ كەشىن ۇيىمداستىردىق. وسى رەتتە ءبىزدىڭ اۋداننىڭ عانا ەمەس, وبلىسىمىزدىڭ ماقتانىشى وڭداسىن ەلۋباي اعامىزعا ەلگە كەپ ەسەپ بەرسەڭىز, جەرلەستەرىڭىزبەن جۇزدەسسەڭىز دەپ ءوتىنىش جاساعان ەدىك. تىلەگىمىزدى جەرگە تاستاماي, تۋعان جەرىنە تاعزىم ەتىپ كەلگەنىنە العىس بىلدىرەمىز», - دەدى ول.
سپورت جۋرناليسىمەن وسكەمەننەن بىرگە كەلگەن قول كۇرەسىنەن الەمنىڭ ءۇش دۇركىن, ازيانىڭ 10 دۇركىن چەمپيونى, ەلىمىزدەگى قول كۇرەسى مەن گىر سپورتىنىڭ نەگىزىن قالاۋشى مۇقان اعزاموۆ كەزدەسۋدە ءسوز الىپ, و.ەلۋبايدىڭ سپورت سالاسىنا سىڭىرگەن ەڭبەگى زور ەكەنىن تىلگە تيەك ەتتى. جارتى الەمدى شارلاعان جيھانكەز جۋرناليست ءوز كەزەگىندە سيدنەي وليمپياداسىندا ولگا شيشيگينا مەن بەكزات ساتتارحانوۆتىڭ جەڭىسىنە كۋا بولعان ۇمىتىلماس ساتتەردى تەبىرەنە ەسكە الىپ, ۋنيۆەرسيتتە وركەستر قۇرامىندا بولىپ, ەسكەندىر حاسانعاليەۆ پەن نۇرعالي ءنۇسىپجانوۆتان ساباق العانىن اڭگىمەلەپ, قولىنا دومبىراسىن الىپ, كۇمبىرلەتىپ كۇي تارتىپ بەردى. كەزدەسۋ بارىسىندا بيىل الماتىدا وتكەن قىسقى ۋنيۆەرسيادا جايىندا سىر شەرتەتىن «الاتاۋدى دۇبىرلەتكەن 11 كۇن» اتتى كىتابىنىڭ تۇساۋكەسەرىن وتكىزدى.
ازامات قاسىم,
«ەگەمەن قازاقستان»
شىعىس قازاقستان وبلىسى,
زايسان اۋدانى.