تابيعاتىمەن تالايدى تامساندىرعان تۇركيا – ءدال قازىر تۋريزممەن تىنىستاپ تۇر. قوناقتان ۇزىلمەي, ورداسىن قۇتتى قىلۋ ءۇشىن تۇرىك اعايىندارىمىز «تۇركيا تۋرى» ۆەلوجارىسىن جىل سايىن ۇيىمداستىرادى. كارى قۇرلىقتا بۇل سپورتقا قىزىعاتىن جانكۇيەر كوپ, ءارى تەلەكورسەتىلىمىن كۇللى جاھان جۇرتى تاماشالايدى. بيىلعى جارىسقا ات-سايمانىن سايلاپ, «استانا» ۆەلوشاباندوزدارى دا ات تەرلەتىپ كەلىپ قالدى. جارىستاعى باستى ماقسات – جەڭىمپاز جەيدەسىن كيۋ.
تۇركيادا باستاۋ العان 2017 جىلعى الەمدىك تۋردىڭ العاشقى كەزەڭى الانيا قالاسىندا باستالدى. بۇل كەزەڭدە ۆەلوشاباندوزدار كەمەر قالاسىنا دەيىنگى 177 شاقىرىم تاسجولدى ءجۇرىپ ءوتتى. العاشقى كەزەڭدە ۆەلوسپورتشىلار جارىسقا بوي ۇيرەتىپ, ءبىر-ءبىرىن الەۋەتىنە سىرتتاي باقىلاۋ جۇرگىزەتىنى بار. دەگەنمەن, مارە سىزىعىنا 1,5 شاقىرىم قالعاندا «استانانىڭ» ءتورت بىردەي شاباندوزى ۇلكەن كۇشپەن العا ۇمتىلدى. الايدا, قارسىلاستارى دا قاراپ قالمادى. «بورا حەنگسگروح» كومانداسىنىڭ وكىلى سەم بەننەت ءبىرىنشى تۋردا شاشاسىنا شاڭ جۇقتىرماي, مارەگە ءبىرىنشى بولىپ كەلدى. ال «استانا» كومانداسى ساپىندا ەڭ جاقسى ناتيجەنى مينالي ريكاردو كورسەتتى. ول مارە سىزىعىن التىنشى بولىپ كەستى. ەلوردانىڭ اتىمەن سىنعا تۇسەتىن ۇجىمنىڭ قالعان جىگىتتەرى تەك العاشقى جيىرمالىقتىڭ قاتارىنان كورىندى.
«استانا» كومانداسىنىڭ سپورتتىق ديرەكتورى دميتري سەدۋننىڭ ايتۋىنشا, اتالعان جارىستا جاس ۆەلوشاباندوزدارىمىزدىڭ اياق الىسىن بايقاپ, كوماندالىق ەسەپتە جەڭىسكە جەتۋدى دە كوزدەيتىندەرىن ايتادى. ء«بىز ارقاشان دا جوعارعى كورسەتكىشتەرگە ۇمتىلامىز. بەس بىردەي قازاقستاندىق ۆەلوشاباندوزدى «تۇركيا تۋرىنا» قاتىستىرىپ وتىرمىز. سولاردىڭ ونەرىنە باعا بەرەمىز. رۋسلان تىلەۋباەۆ, جاندوس بيجىگىتوۆ, نيكيتا ستالنوۆ, سەرگەي چەرنەتتسكي سەكىلدى جىگىتتەر ۆەلوسپورتىمىزدىڭ بولاشاقتارى. ءدال قازىر وسى اتالعان شاباندوزداردىڭ سىنالاتىن ءساتى. ودان بولەك, كوماندالىق ەسەپتە جەڭىسكە جەتۋدى دە كوزدەيمىز. ارينە, كۇن سايىنعى جاعدايعا بايلانىستى ماقساتتى دا وزگەرتىپ تۇرامىز. مۇندا تەك مىقتىلار عانا بيىكتەن كورىنەتىنىن ەستەن شىعارماعانىمىز ءجون», دەيدى ول.
ال «استانا» ۆەلوشاباندوزى دميتري گرۋزدەۆ, جارىس كورىگى ەكىنشى كەزەڭنەن باستاپ قىزاتىنىن ايتادى. سونداي-اق ول ءداستۇرلى «تۇركيا تۋرىندا» جەڭىسكە جەتۋدى كوزدەيدى. «ەكىنشى كەزەڭدە تاۋلى ايماق بولادى. سوندىقتان دا, تازا سپرينتەرلەر جەڭەدى دەپ ايتۋ قيىن. العا وزىپ شىققان شاباندوزداردىڭ ۋاقىتى تىم كوپ بولسا, ولاردى قۋىپ جەتە المايدى. دەمەك, ەكىنشى كەزەڭ اۋىر وتەدى دەگەن ءسوز. دەگەنمەن, بيىلعى «تۇركيا تۋرىنداعى» باستى ماقساتىم – جارىس جەڭىمپازى اتانۋ», دەيدى گرۋزدەۆ.
«تۇركيا تۋرىنا» ەلىمىزدىڭ «استانا» ۆەلوكومانداسىنان بولەك اقش, گەرمانيا, ءباا, يتاليا, يسپانيا, رەسەي, پولشا, بەلگيا, برازيليا جانە تۇركيانىڭ ۇلتتىق قۇراماسى سەكىلدى 13 قۇرلىقارالىق جانە كاسىبي كوماندالار باق سىناۋدا. الداعى كۇندەرى «تۇركيا تۋرىنىڭ» تاعى ءتورت كەزەڭى وتەدى. جارىس جەڭىمپازى ىستانبۇلدا انىقتالادى.
ەرمۇحامەد ماۋلەن,
تۇركيادان