اقتوبەدە دە بيزنەستىڭ الەۋمەتتىك جاۋاپكەرشىلىگى اياسىندا جەكپە-جەك سارايى سالىندى. بۇل تۋرالى 24.kz حابارلادى.
حالىقارالىق دەڭگەيدەگى سپورتتىق شارالار وتكىزۋگە ارنالعان نىساندى وڭىردەگى ءىرى قۇرىلىس كومپانياسى ءوز قارجىسىنا تۇرعىزعان. كەشەن «تۋعان جەر» رەسپۋبليكالىق فورۋمى كەزىندە اشىلدى. اۋماعى 6 مىڭ شارشى مەتر بولاتىن ءزاۋلىم سارايىندا بوكس, دزيۋدو, ەركىن كۇرەس جانە تاعى دا باسقا جەكپە-جەك تۇرلەرىنەن سايىستار ۇيىمداستىرىلادى. ول ءۇشىن بار جاعداي جاسالعان. جاتتىعۋ زالدارى مەن سپورت ۇيىرمەلەرىنەن بولەك, سىرتتان كەلەتىن سپورتشىلارعا اسحانا مەن دەمالىس بولمەلەرى دە قاراستىرىلعان. ال سپورتتىق سايىستاردى 800-گە جۋىق كورەرمەن تاماشالاي الادى.
- جاقىن ارادا ەرەسەكتەر اراسىنداعى الەم چەمپيوناتىندا پاريجدەن ەكىنشى ورىن الدىم. سپورتشىلارعا كوپ كومەك كورسەتىپ جاتىر. وسىدان كەيىن قالاي شىقپاسقا. زالدا كۇرەس ءتۇرى بار, بوكس ءتۇرى بار, ءبارى بار, الداعى ۋاقىتتا بالالار توپ جارادى دەپ ويلايمىن, - دەدى گرەك-ريم كۇرەسىنەن قر ەڭبەك سىڭىرگەن سپورت شەبەرى مەيرامبەك ايناعۇلوۆ.