فۋتبولدان قازاقستان ۇلتتىق قۇراماسىنىڭ شابۋىلشىسى باۋىرجان تۇرىسبەك 2018 جىلعى الەم چەمپيوناتىنا ىرىكتەۋ كەزەڭ اياسىنداعى ارمەنياعا قارسى كەزدەسۋ الدىندا جۋرناليستەر سۇراعىنا جاۋاپ بەردى.
- كوبىسى الداعى ويىننىڭ ءبىز ءۇشىن ماڭىزى جوق دەپ ايتىپ ءجۇر. دەگەنمەن, ءبىز ءوز الاڭىمىزدا وينايمىز جانە بار كۇشىمىزدى سالىپ, جەڭىسكە جەتۋگە تىرىسامىز.
- رۋمىنياداعى قيىن ساپاردان كەيىن قالىپقا كەلىپ ۇلگەردىڭىزدەر مە؟
- قالىپقا كەلۋىمىزگە از عانا ۋاقىت بولدى. كەشە جاتتىعۋ وتكىزدىك. قازىرشە ءبارى ويداعىداي. قازاقستان چەمپيوناتىنداعى ويىن كەستەسىنىڭ اراسى تىعىز قويىلعان. مەنىڭشە, ەرتەڭگى ويىنعا 100 پايىز دايىن بولامىز.
- ەرتەڭ الاڭعا ءبىرىنشى مينۋتتان باستاپ شىعامىن دەپ ويلايسىز با؟ قانشا دەگەنمەن وتكەن ويىندا گول سوقتىڭىز عوي؟
- ءار ويىنشى ءوز الدىنا ۇلتتىق قۇراماعا ويىنىمەن كومەك بەرۋدى ويلاپ تۇرادى. مەنىڭ بار ويىم – قۇرامانىڭ جەڭىسكە جەتۋىنە كومەكتەسۋ.
- ەرتەڭگى ويىندا ۇلتتىق قۇرامانىڭ نەگىزگى ويىنشىلارى الاڭعا شىعا المايتىن سەكىلدى؟
- بۇل ۇلتتىق قۇراما. كومانداعا ءوز كلۋبىنداعى ەڭ ۇزدىك دەگەن فۋتبولشىلار شاقىرىلادى. سوندىقتان ءبىز ءبىر-ءبىرىمىزدىڭ ورنىمىزدى اۋىستىرا الامىز.
- ارمەنيا قۇراماسىنىڭ دەڭگەيى ءبىزدىڭ قۇرامامەن بىردەي دەگەنگە كەلىسەسىز بە؟
- وسى ىرىكتەۋ كەزەڭدە ارمەنيا ايتارلىقتاي ۇپاي جيناعان جوق. فۋتبولدا جەڭىلمەيتىن كوماندا جوق. ەرتەڭگى ويىندا ءۇش ۇپاي يەلەنەتىن مۇمكىندىك بولادى دەپ ۇمىتتەنەمىن.
- باس جاتتىقتىرۋشى الەكساندر بوروديۋك رۋمىنياعا قارسى ويىندا فۋتبولشىلارعا جىلدامدىق جەتىسپەدى دەدى. كەلىسەسىڭ بە؟
- كەلىسەمىن, راسىمەن بىزگە جىلدامدىق جەتىسپەدى. باس جاتتىقتىرۋشى ويىننان كەيىن بىزگە بىرنەشە قاتەلىكتەرىمىزدى كورسەتتى. بۇيىرسا, قاتەلىكتەردەن ساباق الىپ, ەرتەڭگى ويىندا جانكۇيەرلەردى قۋانتامىز دەگەن ۇمىتتەمىن.