كاتالونيادا تاۋەلسىزدىك رەفەرەندۋمى ءوتتى

ءتارتىپ ساقشىلارى رەفەرەندۋمدى بولدىرماس ءۇشىن دەمونسترانتتارعا قارسى رەزەڭكەلى وقتار پايدالانعان. شامامەن 2300 داۋىس بەرۋ ورنىن اشۋ جوسپارلانعان بولسا, پوليتسەيلەر ونىڭ 319-ىن كۇشپەن جاۋىپتى.

جەرگىلىكتى ۋاقىت بويىنشا داۋىس بەرۋ 20:00-دە اياقتالۋى ءتيىس بولاتىن. بىراق قالاداعى جاعداي ەسكەرىلە وتىرىپ, ۇيىمداستىرۋشىلار كەزەكتە تۇرعاندارعا ودان كەيىن دە داۋىس بەرۋگە مۇمكىندىك بەردى.

رەسمي تۇردە داۋىس بەرۋ ۋاقىتى اياقتالعاننان كەيىن يسپانيا پرەمەر-ءمينيسترى ماريانو راحوي بۇل رەفەرەندۋمدى مويىندامايتىنىن, بارسەلونا بيلىگى قالا تۇرعىندارىن الداپ, زاڭسىز ۇيىمداستىرعانىن مالىمدەدى.

يسپانيا ىشكى ىستەرىنىڭ اقپارى بويىنشا قاقتىعىستا 12 پوليتسەي جاراقات العان. سونداي-اق, ەل بيلىگى 92 داۋىس بەرۋ ۋچاسكەسى ءتارتىپ ساقشىلارىنىڭ كۇشىمەن جابىلعانىن حابارلادى. ءوز كەزەگىندە يسپانيا پرەمەر-ءمينيسترىنىڭ ءبىرىنشى ورىنباسارى سورايا ساەنس سانتاماريا ءباسپاسوز كونفەرەنتسياسىندا ءتارتىپ ساقشىلارىنىڭ كۇش قولدانىپ, دۇرىس قادامعا بارعانىن جەتكىزدى.

قالا تۇرعىندارى مەن پوليتسەيلەر اراسىنداعى قاقتىعىس جەرگىلىكتى مەكتەپتەردىڭ بىرىندە ورىن العان. بەلسەندىلەر پوليتسيانىڭ سايلاۋ بيۋللەتەندەرىن سالاتىن جاشىكتەردىڭ تاركىلەۋىنە جول بەرمەۋگە تىرىسقان.

وسىعان دەيىن يسپانيا پرەمەر-ءمينيسترى ماريانو راحوي كاتالونيانىڭ تاۋەلسىزدىك جونىندە رەفەرەندۋم وتكىزۋى زاڭعا قايشى دەپ ەسەپتەيتىنىن ەسكەرتكەن بولاتىن. يسپانيا ۇكىمەتى كاتالونيا تۇرعىندارى 48 ساعات ىشىندە رايىنان قايتپاسا, ارنايى شارالار قولداناتىنىن مالىمدەگەن. تيىسىنشە, مادريد قالاسىنان ءتارتىپ ساقتاۋ جانە زاڭسىز رەفەرەندۋمدى وتكىزبەۋ ماقساتىندا وڭىرگە مىڭداعان ءتارتىپ ساقشىسى جىبەرىلگەن بولاتىن.

كاتالونيا بيلىگىنىڭ وكىلى جوردي تۋرۋل بىرنەشە ميلليون ادام داۋىس بەرۋگە قاتىسقانىن حابارلادى. وڭىردەگى 7,5 ميلليون ادامنىڭ 5,3 ميلليونى داۋىس بەرۋ قۇقىعىنا يە. ال رەفەرەندۋم ناتيجەسى قاشان جاريالاناتىنى بەلگىسىز.

كاتالونيا – يسپانيانىڭ سولتۇستىك-شىعىسىندا ورنالاسقان اۆتونومدى وبلىس. وزىندىك ءتىلى, ءداستۇرى بار.