مەملەكەت باسشىسى نۇرسۇلتان نازارباەۆ ەكسپو-نىڭ جابىلۋ ءسالتاناتىندا سوز سويلەپ, كورمەنى قورىتىندىلادى.
«ەكسپو-2017 حالىقارالىق كورمەسىنىڭ جوعارى دەڭگەيدە جانە زور تابىسپەن وتكەنىن ماقتانىشپەن ايتقىم كەلەدى, - دەدى ول. – تاۋەلسىز قازاقستاننىڭ ابىرويىن اسقاقتاتقان ايرىقشا جەتىستىكتەردىڭ ءبىرى بولدى. ەلوردا ءۇش اي بويى 115 ەل مەن 22 حالىقارالىق ۇيىمنىڭ باسىن قوسقان ەكسپو شاعىن قالاشىعىنا اينالدى. بۇل كورمە قازاقستاننىڭ الەمگە تانىمالدىعى مەن تۋريستەردىڭ تانىمىن ارتتىردى. ەلىمىزگە كەلگەن مارتەبەلى مەيماندارعا حالقىمىزدىڭ قوناجايلىعىن كورسەتە الدىق. ءبىز بولاشاقتىڭ ەنەرگياسىنا قاتىستى بۇكىل الەمنىڭع تاجىريبەسىن ءوز جەرىمىزدە توعىستىردىق.
ەلباسى ەكسپو-2017 كورمەسىن 4 ميلليونعا جۋىق ادام ارالاپ كورگەنىن تىلگە تيەك ەتتى. «ولاردىڭ ۇشتەن ەكى بولىگى – جاستار مەن وقۋشىلار. بارشانىڭ نازارىن اۋدارعان اسەم قالاشىققا كۇن سايىن قىرىق-ەلۋ مىڭ ادام كەلىپ تۇردى. كورمەنى 180 مەملەكەتتەن جارتى ميلليون ادام تاماشالادى, ياعني ءاربىر التىنشى قوناق شەتەلدىك ەكەنىن اتاپ وتكىم كەلەدى. ەكسپو-نىڭ ەڭ تانىمال ورتالىعى – قازاقستاننىڭ پاۆيلونى – «نۇر الەم» سفەراسىن بۇكىل الەم بىلەتىن بولدى. كورمە باستالعالى بەرى بۇل ايماققا 1 ميلليون 300 مىڭ ادام كىرىپ-شىقتى. دۇنيەجۇزى كوز تىككەن ەكسپو بەدەلىمىزدى بيىكتەتتى, رۋحىمىزدى اسقاقتاتتى.
«كورمەنىڭ ءساتتى وتۋىنە مىڭداعان ادام اتسالىستى, ەڭ الدىمەن قازاقستان حالقىنا وسى يدەيانى قولداعانى ءۇشىن شىن ريزاشىلىعىمدى بىلدىرەمىن. بۇل جەردە ەكسپو قۇرىلىسىنا ارحيتەكتورلار, ينجەنەرلەر, قۇرىلىسشىلار, مەنەدجەرلەر, دەمەۋشىلەر, سەرىكتەستەر اتسالىستى. اسىرەسە جاس ۆولونتەرلەر - 4500 جاستارىمىز قاتىسىپ, وسى جەردە جۇمىس ىستەپ, كوپ شەتەلدىكتەرگە قالامىزدى كورسەتتى. كوپتەگەن مەملەكەتتەر, كومپانيالار جانە حالىقارالىق ۇيىمدار دا ءوز ۇلەستەرىن قوستى. بارشالارىڭىزعا ايتۋلى شاراعا بەلسەنە قاتىسقاندارىڭىز ءۇشىن شىن جۇرەگىممەن العىس ايتامىن. كورمەنى باسقارۋدى تاپسىرعان كومپانياعا, ونىڭ باسشىسى ەسىموۆ مىرزاعا ريزاشىلىعىمدى بىلدىرەمىن. بۇگىنگى سالتاناتقا كەلىپ وتىرعان مەملەكەت جانە ۇكىمەت باسشىلارىنا, حالىقارالىق كورمە بيۋروسىنا جانە بارلىق قوناقتارعا ەرەكشە راحمەتىمدى ايتقىم كەلەدى. استانا ارقاشان وزدەرىڭىزدى ىستىق ىقىلاسپەن, اسا قۇرمەتپەنەن قارسى الىپ وتىرادى. سىزدەرگە زور دەنساۋلىق, مول تابىس تىلەيمىن! جاساسىن قازاقستان!», دەپ لەبىز ءبىلدىردى پرەزيدەنت.
مەرەكەلىك جابىلۋ سالتاناتى «مۋزارت» توبىنىڭ, مايرا مۇحامەدقىزى, ءجاميلا سەركەباەۆا, لادا قىسىقوۆا قاتارلى ەسترادا جۇلدىزدارىنىڭ قاتىسۋىمەن كونتسەرتپەن جالعاستى.
اسحات رايقۇل, "ەگەمەن قازاقستان"