حانس كيسمان جانە مارتين پوست, گوللانديادان كەلگەن ساياحاتشىلار:
– ءبىرىنشى كەزەكتە «نۇر الەم» پاۆيلونىنا جول تارتتىق. تاڭەرتەڭ 9.00-دە كىرگەننەن, تۇسكە تامان ءبىر-اق شىقتىق. «جاسىل» ەنەرگيانىڭ يننوۆاتسيالارىنا تولى سەگىز قابات ءبىزدى تاڭ قالدىردى. اسىرەسە, سۋ ەنەرگياسىن قولدانۋدىڭ جاڭا تاسىلدەرى تۋرالى بىلدىك. گوللانديادا كولدەر مەن وزەندەر كوپ بولعاندىقتان, بۇل جاڭالىق ءبىز ءۇشىن اسا ماڭىزدى. بىزدەر ازىرگە موناكو, گەرمانيا جانە يسپانيا ەلدەرىنىڭ پاۆيلوندارىن ارالاپ ۇلگەردىك. بىرنەشە كۇن ۋاقىتىمىز بار, بارلىعىن تۇگەسىپ ۇلگەرەمىز دەگەن ويدامىز.
قازاق ەلورداسىنا كەلسەك, شاھار جاڭاشىلدىعىمەن ۇنادى. ءزاۋلىم عيماراتتاردىڭ بارلىعى-دەرلىك زامان تالابىنا ساي جاساقتالعان. ياعني, ساۋلەتتىك كەلبەتى, ساندىك اجارى بىردەن باۋراپ الادى. بۇرىن-سوڭدى مۇندا تابانىمىز تيمەگەن ەدى. ەندى كورگەنىمىزگە قۋانىپ ءجۇرمىز.
پاۆەل ستانكو, چەحيادان كەلگەن ساياحاتشى:
– استاناعا بۇگىن عانا ىسساپارمەن كەلدىم. دوستارىم – ەكسپو كورمەسىندەگى چەحيا پاۆيلونىنىڭ ۇيىمداستىرۋشىلارى. كەرەمەت مۇمكىندىكتى پايدالانىپ, حالىقارالىق شارانى ءوز كوزىممەن تاماشالايىن دەپ شەشتىم. العاشقىلاردىڭ قاتارىندا قازاقستان پاۆيلونىن كورگىم كەلەدى. سەبەبى, تانىستارىم پاۆيلوندى تانىمدىق جاعىنان ۇسىنارى كوپ دەپ ايتتى.
شىنىمدى ايتسام, كورمە قۇرىلىسىنىڭ سالىنۋ قارقىنىنا تاڭ قالدىم. تىم از ۋاقىت ارالىعىندا ۇلكەن تەرريتوريا ىشىندە ءزاۋلىم عيماراتتار تۇرعىزۋ – وڭاي ءىس ەمەس. مۇنى قازاقستاندىقتاردىڭ ۇيىمشىلدىعى, بىرلىگى, دوستىعى ارقاسىندا دەپ بىلەمىن. استانا وتە ۇناپ جاتىر.
دانا مەيىربەكوۆا, الماتى قالاسىنان كەلگەن ساياحاتشى:
– الماتىدان ۇلىم ەكەۋمىز ەكسپو-2017 حالىقارالىق كورمەسىن تاماشالاۋعا ادەيى كەلدىك. بۇكىل پاۆيلوندار تابيعات كۇشىن قالاي قولدانۋ كەرەك ەكەنىن تولىقتاي كورسەتەدى. ەنەرگيانى ءتيىمدى قولدانۋ ماسەلەسى بۇكىل الەم ءۇشىن وزەكتى. ەكسپو ارقىلى قازاقستان ەلى تانىلىپ جاتىر.
كورمە بارىسىندا كەرەمەت كونتسەرتتەر مەن شارالاردىڭ ءوتىپ جاتقانىنا قۋانىشتىمىن. «ديۋ سولەي تسيركى» مەن لا سكالا تەاترىنىڭ ونەر كورسەتۋى كورمە قوناقتارى ءۇشىن ۇلكەن سىيلىق دەپ ويلايمىن. وسى شارالاردىڭ ءبىز دە قوناعى بولعىمىز كەلەدى. باقىتىمىزعا وراي, بيلەتتەرىن الىپ ۇلگەردىك.
وسىنداي شارانىڭ ءبىتىپ جاتقانى كوڭىلگە از-كەم مۇڭ ۇيالاتادى. بىتپەسە ەكەن تىلەيمىز. امال نەشىك, ءار نارسەنىڭ اياعى بار. بولاشاقتا قازاقستاندا تاعى دا ەكسپو وتسە ەكەن دەگەن تىلەكشىلەردىڭ قاتارىنانبىز.
ماريا روزالي, مالايزيادان كەلگەن ساياحاتشى:
– مەن استاناعا مالايزيا ەلىنىڭ فورۋمىنا قاتىسۋعا كەلدىم. حالىقارالىق كورمەنىڭ ءوتىپ جاتقانىن ەستىپ, ءبىر كۇنىمدى ارنايى ءبولىپ, قالاشىقتى ارالاپ ءجۇرمىن. ەڭ ءبىرىنشى بايقاعانىم – ەرىكتىلەر وتە مەيىرىمدى جانە اعىلشىن ءتىلىن جەتىك مەڭگەرگەن. مەنىڭ بۇكىل سۇراقتارىما جاۋاپ بەرىپ, بارىنشا كومەك كورسەتۋگە تىرىستى.
كورمەدەن جاسىل ەنەرگيا تۋرالى ءبىلىمىمدى جەتىلدىردىم. بولاشاقتا بۇل قۋات كوزدەرى الەمدى ساقتاپ قالادى دەپ ويلايمىن. عالامدىق جىلىنۋ كەزىندە وسىنداي بالامالى ەنەرگيا كوزدەرىن جەتىلدىرۋ ادامزاتتىڭ باستى ماقساتى بولۋ كەرەك. سول سەبەپتى, قازاقستاننىڭ ۇلكەن ىسكە قوسىپ جاتقان ۇلەسى ەلەۋلى. مەنىڭ ءبىر ارمانىم بار, ول – قازاق ۇلتتىق تاعامىنان ءدام تاتۋ. مۇنىڭ رەتى كەلمەي جاتىر ءازىر. بۇيىرتسا, قوناقجاي حالىقتىڭ قازى-قارتا, جال-جاياسىنىڭ ءتىل ۇيىرگەنىن سەزىنگىم كەلەدى.
يمان ال-مارزۋكي, بىرىككەن اراب امىرلىكتەرىنەن كەلگەن ەرىكتى:
– كورمەدە ءبىر اي كولەمىندە قىزمەت ەتۋدەمىن. استاناعا كەلگەنىمە وتە قۋانىشتىمىن. قالانىڭ عيماراتتارى ادەمى, ال ادامدارى مەيىرىمدى. جاقىندا بۋرابايعا بارىپ كەلدىم. تابيعاتى كەرەمەت جەر ەكەن. جالپى, اراب امىرلىكتەرى مەن قازاقستاننىڭ تابيعاتىندا ۇقساستىقتار بار ەكەنىن بىلەمىن. مۇندا دا ءشولدى ايماقتار بار. سوندىقتان وسىنداي وڭىرلەردە ەنەرگيانى ءتيىمدى قولدانۋ ماسەلەسى ەكى ەلگە بىردەي ماڭىزدى. سول جونىندە تاجىريبە الماستسۋعا كەلدىك.
سونىمەن قاتار, ءبىز كورمە قوناقتارىنا 2020 جىلى دۋباي قالاسىندا وتەتىن ەكسپو كورمەسىن تانىستىرۋدامىز. ونىڭ دا ماڭىزدىلىعى, ادامدارعا, قورشاعان ورتاعا پايدالىلىعى كوپ دەگەن پىكىردەمىن. قازاقستاننىڭ كورمە وتكىزۋ تاجىريبەسى بىزگە دە ساباق بولادى دەپ ويلايمىن. وسى دەڭگەيدەن كەم وتكىزبەسەك, جەتىستىككە جەتكەنىمىز دەپ بىلەمىن.
ينگريد, پۋكلان لانگا, گەرمانيادان كەلگەن ساياحاتشىلار:
– ءبىز – ورتالىق ازيا ەلدەرىن ساياحاتتاپ جۇرگەن جۇپپىز (كۇلەدى). قىرعىزستان مەن موڭعوليادا بولدىق. ەندى, مىنە قازاقستانعا كەلدىك. كورمەنىڭ تاقىرىبى وتە جاقسى تاڭدالعان. بۇكىل الەم ەلدەرى وسى ماسەلە توڭىرەگىندە ويلانۋ كەرەك. كورمەنىڭ ءزاۋلىم پاۆيلوندارىن كورىپ, ەسەڭگىرەپ قالدىق. قازاقتار وتە مىقتى حالىق ەكەن.
استانا قالاسىن ارالاعاندا دا ايرىقشا اسەرگە بولەندىك. بۇل مەملەكەتتىڭ قارقىندى دامۋ جولىنا تۇسكەندىگىن اڭعاردىق. كوپ ۇزاماي الپاۋىت ەلدەردىڭ قاتارىنان كورەتىنىمىزگە سەنىمدىمىز. ويتكەنى, قازاقستان قازىردىڭ وزىندە حالىقارالىق ارەنادا بەلسەندى.
كۋاتەمۋانو گيلەم, كونگودان كەلگەن ساياحاتشى:
– استاناعا كونگو ەلىن ەكسپو-2017 كورمەسىندە تانىستىرۋ ءۇشىن كەلدىم. ءۇش اي ىشىندە بىلگەنىم, كورگەنىم, تۇيگەنىم مول. استانا – جاڭادان سالىنعان كوركەم قالا. بۇنداي دەڭگەيدە ۇلكەن شارا وتكىزۋ ارقىلى جاس قالا ءوزىن الەمگە تانىتۋدا. جاڭعىرمالى ەنەرگيا تاقىرىبى كورمە كولەمىندە تولىقتاي قامتىلدى دەپ ويلايمىن.
تاعى ءبىر ۇناعانى, قازاق حالقى تولەرانتتى ەكەن. مۇندا ەشكىم ءبىر-ءبىرىن دىنىنە قاراپ ءبولىپ جاتپايدى. بارلىعى تاتۋ ءومىر سۇرۋدە. مەن وسىندا جىل سايىن وتەتىن دىنارالىق جانە كونفەسسياارالىق جيىنداردان حاباردارمىن. بۇل – مەملەكەت باسشىسىنىڭ كەرەمەت كورەگەندىگىنىڭ ارقاسىندا ۇيىمداستىرىلاتىن شارا. وسى ىسپەتتى جيىندار ەلدىڭ بەدەلىن اسىرىپ, تانىمالدىعىن كەڭەيتە تۇسەدى.
ايگۇل شەرنياز,
اسحات راقۇل,
«ەگەمەن قازاقستان»
سۋرەتتەردى تۇسىرگەن
ورىنباي بالمۇرات,
«ەگەمەن قازاقستان»