بوكستان الەم چەمپيوناتىندا بار قارسىلاسىن جاپىرىپ ءوتىپ, فينالعا جەتىپ, اتاعى التى قۇرلىققا اسقان ازەربايجاندىق ماگومەدراسۋل مەدجيدوۆپەن تەڭ دارەجەدە ايقاسىپ, كۇمىس جۇلدە ولجالاعان قامشىبەك قوڭقاباەۆ قىزىلورداسىنا كەلدى. حالىق باتىر ۇلىن اۋەجايدان پاتشاداي كۇتىپ الدى. قۇرمەت-قوشەمەتىن اياماي, الاقانىندا ايالاي ۇستادى.
ايتپاقشى, وتكەن ايدا قىتايدىڭ تايبەي قالاسىندا 29-شى بۇكىلالەمدىك جازعى ۋنيۆەرسيادا وتكەن. وسى جارىستا ءبىزدىڭ زىلتەمىرشى رۇستەم سىباي ەكىنشى ورىن العان ەدى. الەمدىك ارەنادا ەل نامىسىن قورعاپ جۇرگەن قوس ۇلاندى وبلىس اكىمى قىرىمبەك كوشەرباەۆ ارنايى قابىلدادى. ەكى جىگىتكە ەلدىڭ ىقىلاسىن جەتكىزگەن ايماق باسشىسى «الداعى جارىستارىڭدا كۇمىستەرىڭ التىنعا اينالسىن» دەپ تىلەك ءبىلدىردى. سونىمەن قاتار, قوس سپورتشىنىڭ دا بولاشاقتا التىن الاتىنىنا, ەل نامىسىن ابىرويمەن قورعايتىنىنا سەنەتىنىن ايتتى.
– ەندى قۇرمەت پەن قوشەمەت, ماقتاۋ مەن ماراپات كوبەيەدى. ارينە, ەلدىڭ ىقىلاسىن شەكتەۋ قويا المايسىڭ. بىراق سوعان مالدانۋعا, بولدىم-تولدىم دەۋگە بولمايدى. التىن ۋاقىتتارىڭدى زايا كەتىرىپ الاسىڭدار. سول سەبەپتى دايىندىقتارىڭدى ودان سايىن ۇدەتىپ, الداعى وليمپيادادا توپ جارۋعا كۇش سالىڭدار,– دەپ اعالىق اقىلىن ايتتى قىرىمبەك ەلەۋ ۇلى.
جيىن سوڭىندا وبلىس اكىمى قامشىبەك قوڭقاباەۆقا اۆتوكولىكتىڭ, رۇستەم سىبايعا 2 ميلليون تەڭگەنىڭ, ال ولاردىڭ باپكەرلەرىنە 500 مىڭ تەڭگەنىڭ سەرتيفيكاتتارىن تابىستادى.
– ەڭبەكسىز جەڭىس تە بولمايدى. قوس سپورتشىنىڭ جۇلدەسى جاستاردىڭ جىگەرىن جانىپ, جاڭا بيىكتەرگە جەتەلەيدى. كوپتەگەن جاسوسپىرىمدەر سپورتقا قىزىعاتىن بولادى. سىزدەر ءبىزدىڭ ەلىمىزدىڭ حالىقارالىق سپورتتاعى مارتەبەسىنىڭ جوعارى ەكەندىگىن دالەلدەپ, جاتتىقتىرۋشىلار مەن جانكۇيەرلەردىڭ عانا ەمەس, بارشا قازاقستاندىقتاردىڭ ءۇمىتىن اقتادىڭىزدار,– دەدى قىرىمبەك ەلەۋ ۇلى.
قوس سپورتشىمەن سويلەستىك. قامشىبەكتەن «مەدجيدوۆپەن جۇدىرىقتاسار ساتتە كوڭىلىڭدە ءبىر ۇرەي بولعان جوق پا؟» دەپ سۇرادىق.
– جوق, ەشقانداي قورقىنىش تا, ۇرەي دە بولعان جوق. قارسىلاسىمنان ىعاتىن بولسام, وندا نەسىنە بوكسپەن شۇعىلدانىپ ءجۇرمىن؟ تەك ەل ءۇمىتىن اقتاي الماي قالامىن با, التىن جۇلدەگە قول جەتكىزە الامىن با, دەگەن ۋايىم عانا بولدى. جالپى, جارىسقا تىڭعىلىقتى دايىندىقپەن باردىق. سونىڭ ارقاسىندا وسىنداي جەتىستىككە جەتتىك»,– دەيدى ول. توكيو وليمپياداسىندا قوڭقاباەۆ 28 جاسقا كەلەدى ەكەن. سونى دا سۇرادىق. «اسا اۋىر سالماقتاعى سپورتشىلار باسقالارعا قاراعاندا ۇزاق ءپىسىپ-جەتىلەدى. مەن ءوزىمدى ەندى ءپىسىپ, بابىما كەلىپ جاتىرمىن دەپ ويلايمىن. بۇيىرتسا, ەكى وليمپياداعا قاتىسامىن»,– دەپ جاۋاپ قاتتى.
مىناداي قىزىق ءجايتتى بىلدىك. الەم چەمپيوناتىنىڭ فينالىنىڭ الدىندا قامشىبەكتىڭ باپكەرى عالىمجان بايعۇنديەۆكە قىرىمبەك كوشەرباەۆ تەلەفون شالىپتى. «قامشىبەك قارسىلاسىنىڭ قاتتى سوققىسىنا تاپ بولماسىن. وڭعا-سولعا قاشىپ, ويناپ ءجۇرىپ بوكستاسسىن. ءبىر ورنىندا تۇرىپ قالماسىن»,– دەپ كەڭەس ايتىپتى. بۇرىن ءوزى بوكسشى بولعان قىرىمبەك ەلەۋ ۇلىنىڭ جاناشىرلىق ءسوزىن عالىمجان باپكەر فينالدىڭ الدىندا قامشىبەككە جەتكىزىپتى. سولايشا, قوڭقاباەۆ ەلدە ءوزى ءۇشىن تاقىم قىسىپ وتىرعان ميلليونداعان ادامنىڭ بارىن سەزىنىپ, شارشى الاڭعا شىعىپتى.
رۇستەم سىباي بۇكىلالەمدىك ۋنيۆەرسياداعا التىن الۋ ءۇشىن بارعانىن ايتادى. «دايىندىعىم دا, بابىم دا كەلىسىپ تۇر ەدى. جاتتىعۋ كەزىندە بەلىمدى اۋىرتىپ الدىم. سونىڭ سالدارىنان ءبىر كەلىگە كەم كوتەرىپ, التىنعا ىلىگە الماي قالدىم. الدا جارىس كوپ. باستى ماقسات – توكيو وليمپياداسى. قامشىبەك ەكەۋمىز قاتار توپ جارامىز دەگەن سەنىمدەمىن»,– دەيدى زىلتەمىرشى.
جىل باسىنان بەرى قىزىلوردا وبلىسىنىڭ سپورتشىلارى ەل بىرىنشىلىكتەرىندە 563 مەدال جەڭىپ السا, ازيا, الەم چەمپيوناتتارىندا 53 مەدال يەلەندى. ەلىمىزدىڭ ۇلتتىق قۇراما كوماندالارىنا ايماقتان 420 سپورتشى ەنگەن.
ەرجان بايتىلەس,
«ەگەمەن قازاقستان»
قىزىلوردا.