«كونستيتۋتسيالىق زاڭ ۇگىت-ناسيحات جۇمىستارىنىڭ ءباسپاسوز نەمەسە تەلەديدار ارقىلى بەرىلۋ ءتارتىبىن عانا قاداعالايدى. ال قازىرگى تاڭدا زاڭبۇزۋشىلىقتاردىڭ كوبى ينتەرنەت ارقىلى جۇزەگە اسىرىلىپ جاتىر. بەلگىلى ءبىر ادامعا داۋىس بەرۋ بويىنشا پىكىرگە, فوتوسۋرەتتەردى نەمەسە ۆيدەوماتەريالداردى تاراتۋعا, ونلاين داۋىس بەرۋگە قاتىستى زاڭنامانى وزگەرتۋ تۋراسىندا ۇسىنىستار كەلىپ ءتۇسىپ جاتىر», - دەيدى ول.
عيزات نۇرداۋلەتوۆ سونىمەن بىرگە, سايلاۋ كەزىندە پروكۋرورلاردىڭ جۇمىس كەستەسىن رەتتەۋ بويىنشا دا ويىن ءبىلدىردى.
«زاڭ پروكۋرورلارعا تولىق قۇراممەن سايلاۋ كۇنى جۇمىس اتقارۋعا مىندەتتەيدى. بۇل ءوز كەزەگىندە دەمالىس كۇندەر ءۇشىن قوسىمشا وتەم تولەۋدى تالاپ ەتەدى. بىراق پروكۋراتۋرادا سايلاۋعا مۇلدە قاتىسى جوق بولىمشەلەر دە بار. بيۋدجەتتىك قاراجاتتى ۇنەمدەۋ ءۇشىن ءدال وسى كۇندەرى پروكۋراتۋرا قاجەتتىلىكتى ءوزى رەتتەيتىندەي وزگەرىستەر قارالۋدا», - دەيدى عيزات نۇرداۋلەتوۆ.
ەسكە سالا كەتسەك, بۇگىن استانادا ادىلەت ءمينيسترى مارات بەكەتاەۆتىڭ توراعالىمەن زاڭ جوبالاۋ قىزمەتى ماسەلەلەرى جونىندەگى ۆەدومستۆوارالىق كوميسسيانىڭ كەزەكتى وتىرىسى ءوتتى. جيىندا وسك توراعاسىنىڭ ورىنباسارى «قر سايلاۋ تۋرالى» زاڭىنا بىرقاتار وزگەرىستەردى ەنگىزۋدى ۇسىنعان بولاتىن. ونىڭ ىشىندە كوميسسيا وكىلى سايلاۋ الدىندا ينتەرنەت-رەسۋرستارمەن جۇمىس جۇرگىزۋدى جۇيەلەۋدى اتاپ ءوتتى.